କଟକ, ୨୮ା୨(ଶିଳ୍ପା ପ୍ରିୟଦର୍ଶିନୀ): ଐତିହାସିକ ବାରବାଟୀ ଷ୍ଟାଡିୟମର ରୂପାନ୍ତରିକରଣ ଏବଂ ନବୀକରଣ ପାଇଁ ମଙ୍ଗଳବାର ଭିତ୍ତିପ୍ରସ୍ତର ସ୍ଥାପନ କରାଯାଇଛି ।
ଏହି ଅବସରରେ ବାରବାଟୀ ଷ୍ଟାଡିୟମ ପରିସରରେ ଏକ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଛି। କାର୍ଯ୍ୟକ୍ରମରେ ଅତିଥି ଭାବେ କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରା, ଆଇପିଏଲର ଚେୟାରମ୍ୟାନ ଅରୁଣ ସିଂ ଧୁମାଲ, ଓସିଏ କୋଚ ଦିନେଶ ମୋଙ୍ଗିଆ, ଟିମ ଇଣ୍ଡିଆ ପୂର୍ବତନ ଖେଳାଳ ଇର୍ଫାନ ପଠାନ, ଦେବାଶିଷ ମହାନ୍ତି, ଶିବ ସୁନ୍ଦର ଦାସ, ପ୍ରଜ୍ଞାନ ଓଝା, ମହିଳା କୋଚ ସାଗତିକା ରଥ, ଆନ୍ତର୍ଜାତିକ ମହିଳା ଖେଳାଳୀ ରସନାରା ପରବିନ୍, ମାଧୁରୀ ମେହଟା, ଓସିଏ ଟେକ୍ନିକାଲ ମୁଖ୍ୟ ଭେଙ୍କେଟ ରାଓ ଓ ଅଲିମ୍ପିଆନ ଅନୁରାଧା ବିଶ୍ୱାଳ ମଂଚାସୀନ ରହିଥିଲେ। ଅନ୍ୟପଟେ ଉକ୍ତ ଅବସରରେ ମେୟର ସୁବାସ ସିଂ, ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ, ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ, କଟକ ସଦର ବିଧାୟକ ଚନ୍ଦ୍ରସାରଥୀ ବେହେରା, ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ, ବିଜେଡି ନଗର ସଭାପତି ମଧୁସୂଦନ ସାହୁ, ନିରାମୟ ଉପଦେଷ୍ଟା ଡ. ରଞ୍ଜନ ବିଶ୍ୱାଳ ଉପସ୍ଥିତ ରହିଥିଲେ। ରାଜ୍ୟରେ କ୍ରୀଡା ଖାସ କରି କ୍ରିକେଟର ବିକାଶ ହେବାକୁ ଯାଉଛି, ବହୁ ସଂଖ୍ୟାର ନୂତନ କ୍ରୀଡା ପ୍ରତିଭା ଜନ୍ମ ନେବେ ଓ ସମସ୍ତଙ୍କ ସ୍ବପ୍ନ ଏବେ ସାକାର ହେବ ବୋଲି ନିଜ ବକ୍ତବ୍ୟରେ କହିଥିଲେ ତୁଷାରକାନ୍ତି ବେହେରା। ସେହିପରି ପୂର୍ବତନ ଖେଳାଳୀ ଇର୍ଫାନ ପଠାନ ଏପରି ଯୋଜନା ପାଇଁ ଓଡିଶା କ୍ରିକେଟ ଆସୋସିଏସନ ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ପ୍ରଦାନ କରିଥିଲେ। ଆଜି ଯେଉଁ କ୍ରିକେଟ ଏକାଡେମୀ ଉଦଘାଟନ କରାଯାଇଛି ଆଗାମୀ ଦିନରେ ଅଧିକ ଖେଳାଳି ସାମ୍ନାକୁ ଆସିବେ ବୋଲି କହିଥିଲେ ଦେବାଶିଷ ମହାନ୍ତି। ସେହିପରି ଓସିଏ ସଭାପତି ପ୍ରଣବ ପ୍ରକାଶ ଦାସ କହିଛନ୍ତି ଯେ, ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରୁଛି। ବିଶ୍ୱର ଆକର୍ଷଣ ଷ୍ଟାଡିଅମ ହେବା ନେଇ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିଥିଲି ଯାହାକି ଆଜି ସତରେ ପୂରଣ ହୋଇ ପାରିଛି ବୋଲି ସେ କହିଥିଲେ। ପୂର୍ବତନ ଓସିଏ ସମ୍ପାଦକ ଆଶୀର୍ବାଦ ବେହେରା କହିଛନ୍ତି ଯେ, ଖୁବ କମ ସମୟରେ ବାରବାଟୀ ଷ୍ଟାଡିଅମର ନବୀକରଣ କାର୍ଯ୍ୟ ଶେଷ ହେବ। କାର୍ଯ୍ୟକ୍ରମ ଶେଷରେ ଉପସ୍ଥିତ ସମସ୍ତ ଅତିଥିଙ୍କୁ ସମ୍ବର୍ଦ୍ଧିତ କରାଯାଇଥିଲା।
