କେନ୍ଦଝର,୧୭ା୯(ସ୍ବ.ପ୍ର.): କେନ୍ଦୁଝର ଜିଲାରେ ହାତୀ ଓ ମଣିଷ ମଧ୍ୟରେ ତିକ୍ତତା ରୋକିବା ପାଇଁ ନାନା ପଦକ୍ଷେପ ଗ୍ରହଣ କରାଯାଉଛି। ହାତୀ ଜଙ୍ଗଲ ଛାଡ଼ି ଜନବସତି ମୁହାଁ ହେଉଥିବାରୁ ଆଗୁଆ ସୂଚନା ଦେବା ପାଇଁ ଆରମ୍ଭ ହୋଇଛି ଭଏସ୍ ଓ ଟେକ୍ଷ୍ଟ ମେସେଜ ବ୍ୟବସ୍ଥା। ଏଥିରେ ସ୍ଥାନୀୟ ଅଞ୍ଚଳର ଲୋକଙ୍କ ମୋବାଇଲରେ ଆଗୁଆ ମେସେଜ ଦିଆଯାଉଛି। ଫଳରେ ଲୋକମାନେ ସତର୍କ ହୋଇ ଘରୁ ପଦାକୁ ବାହାରିବେ ନାହିଁ କିମ୍ବା ଜଙ୍ଗଲକୁ ଯିବେ ନାହିଁ। ସେହିପରି ସତର୍କତା ଅବଲମ୍ବନ କରିବେ। ତେବେ ଅନେକ ଅଞ୍ଚଳରେ ଖରାପ ମୋବାଇଲ ନେଟଓ୍ବାର୍କ କାରଣରୁ ବା ବିଦ୍ୟୁତ ସମସ୍ୟା ଯୋଗୁ ମୋବାଇଲ ଚାର୍ଜ ନ ଥାଏ। ଏଣୁ ଏପରି ସ୍ଥାନରେ ଆଗୁଆ ମାଇକ ଯୋଗେ ସଚେତନତା ମଧ୍ୟ କରାଯାଉଛି।
ପ୍ରକାଶ ଯେ, କେନ୍ଦୁଝର ଜିଲାରେ ଶନିବାର ୧୪ଟି ଗ୍ରୁପରେ ପାଖାପାଖି ୧୩୭ ହାତୀ ଚଳପ୍ରଚଳ କରୁଛନ୍ତି। ଏଣୁ ୧୪ଟି ଗ୍ରୁପ ଉପରେ ହାତୀ ସ୍କ୍ବାଡ ନଜର ରଖିଥିବା ବେଳେ ମାଇକରେ ସୂଚନା ଦେବାକୁ ସ୍ବତନ୍ତ୍ର ମାଇକ ଦଳ ମଧ୍ୟ ରହିଥିବା ଜଣାପଡ଼ିଛି। ବନ ବିଭାଗ ପକ୍ଷରୁ ଜଣାପଡ଼ିଛି ଯେ, କେନ୍ଦୁଝର ଡିଭିଜନରେ ବିଭିନ୍ନ ହାତୀ ଚଳପ୍ରଚଳ ଗ୍ରାମଗୁଡ଼ିକର ଲୋକଙ୍କ ଫୋନ୍ ନମ୍ବର ନେଇ ଡାଟା ବେସ୍ ପ୍ରସ୍ତୁତ କରାଯାଇଛି। ହାତୀ ଯେଉଁ ଅଞ୍ଚଳ ମୁହାଁ ହୋଇଥାଏ ସେହି ଅଞ୍ଚଳର ଲୋକଙ୍କୁ ମୋବାଇଲ ମେସେଜ ବା ଭଏସ ମେସେଜ ଦ୍ୱାରା ଆଗୁଆ ସୂଚନା ଦିଆଯାଇଥାଏ। ଫଳରେ ଲୋକମାନେ ଯାତାୟାତ କରନ୍ତି ନାହିଁ । ସେହିପରି ଏହି ମେସେଜ ସ୍ଥାନୀୟ ସରପଞ୍ଚ, ଜିଲା ପରିଷଦ ସଭ୍ୟା/ସଭ୍ୟ ବିଧାୟକ, ବିଡିଓ, ତହସିଲଦାରମାନଙ୍କୁ ମଧ୍ୟ ଦିଆଯାଇଥାଏ। ଫଳରେ ସମସ୍ତେ ହାତୀର ଗତିବଧି ଓ ଚଳପ୍ରଚଳ ବିଷୟରେ ଅବଗତ ରହିବା ସହ ସେମାନଙ୍କ ଦାୟିତ୍ୱବୋଧ ରହିବ। ସମସ୍ତେ ଆବଶ୍ୟକ ପଦକ୍ଷେପ ନେଇ ପାରିବେ ବୋଲି ଡିଏଫ୍ଓ କେନ୍ଦୁଝର ଏଚ୍.ଡି. ଧନରାଜ କହିଛନ୍ତି।
