ନୂଆଦିଲ୍ଲୀ,୨୪।୫: ମହାକାଶ ଗବେଷଣା କ୍ଷେତ୍ରରେ ବୈଜ୍ଞାନିକମାନଙ୍କୁ ଏକ ବଡ଼ ସଫଳତା ମିଳିଛି। ପୃଥିବୀରୁ ଚନ୍ଦ୍ରପୃଷ୍ଠକୁ ଯାତ୍ରା କରିବା ପାଇଁ ଏକ ନୂତନ ଏବଂ କମ୍ ଇନ୍ଧନ ଖର୍ଚ୍ଚ ହେବାଭଳି ମାର୍ଗ ଆବିଷ୍କାର କରାଯାଇଛି। ମହାକାଶ ଯାନଗୁଡ଼ିକ ଏହି ନୂଆ ମାର୍ଗରେ ଗଲେ ପ୍ରକୃତିର ମାଧ୍ୟାକର୍ଷଣ ଶକ୍ତିର ଅଧିକ ସଦୁପଯୋଗ କରିପାରିବେ, ଯଦ୍ଦ୍ବାରା ବହୁ ପରିମାଣର ମୂଲ୍ୟବାନ୍ ଇନ୍ଧନ ସଞ୍ଚୟ ହୋଇପାରିବ। ସ୍ପେସ୍-ଡଟ୍-କମ୍ର ଏକ ରିପୋର୍ଟ ଅନୁଯାୟୀ, ବୈଜ୍ଞାନିକମାନଙ୍କ ଏକ ଦଳ କମ୍ପ୍ୟୁଟର ମଡେଲିଂ ସାହାଯ୍ୟରେ ଏହି ଗୁରୁତ୍ୱପୂର୍ଣ୍ଣ ସନ୍ଧାନ କରିଛନ୍ତି।
ମହାକାଶ ଅଭିଯାନ ସର୍ବଦା ବ୍ୟୟବହୁଳ ହୋଇଥିବାରୁ ଏହାର ଯୋଜନା ପାଇଁ ବହୁ ସମୟ ଓ ଶ୍ରମ ଲାଗିଥାଏ। ତେବେ ବୈଜ୍ଞାନିକମାନେ ‘ଥିଓରି ଅଫ୍ ଫଙ୍କଶନାଲ କନେକ୍ସନ୍ସ’ ବ୍ୟବହାର କରି ପ୍ରାୟ ୩ କୋଟି (୩୦ ମିଲିୟନ) ସମ୍ଭାବ୍ୟ ମାର୍ଗର ସିମୁଲେସନ (କୃତ୍ରିମ ମଡେଲ୍) ପ୍ରସ୍ତୁତ କରିଥିଲେ। ସେଥିମଧ୍ୟରୁ ୨,୮୦,୦୦୦ ସିମୁଲେସନକୁ ଆଧାର କରି ଏହି ଲୁକ୍କାୟିତ ଏବଂ ଶସ୍ତା ମାର୍ଗର ସନ୍ଧାନ ମିଳିଛି। ପ୍ରସିଦ୍ଧ ପତ୍ରିକା ‘ଆଷ୍ଟ୍ରୋଡାଇନାମିକ୍ସ’ରେ ଏହି ଗବେଷଣା ସମ୍ପର୍କିତ ତଥ୍ୟ ପ୍ରକାଶ ପାଇଛି।
ସାଧାରଣତଃ ମହାକାଶ ଯାନଗୁଡ଼ିକ ଗତି କରିବା ପାଇଁ ‘ଇଣ୍ଟରପ୍ଲାନେଟାରି ଟ୍ରାନ୍ସପୋର୍ଟେଶନ ନେଟୱର୍କ’ ବା ପ୍ରାକୃତିକ ମାଧ୍ୟାକର୍ଷଣ ପଥ ଉପରେ ନିର୍ଭର କରନ୍ତି। ଗବେଷକମାନେ ଜାଣିବାକୁ ପାଇଛନ୍ତି ଯେ, ପୃଥିବୀର ନିକଟତର ପାର୍ଶ୍ୱ ଦେଇ ଚନ୍ଦ୍ରର କକ୍ଷପଥରେ ପ୍ରବେଶ କରିବା ଅପେକ୍ଷା, ଏହାର ବିପରୀତ ପାର୍ଶ୍ୱ ଦେଇ ଗତି କଲେ ଅଧିକ ମାଧ୍ୟାକର୍ଷଣ ବଳ ମିଳିଥାଏ। ଏହି ନୂତନ ମାର୍ଗ ଦ୍ୱାରା ପୂର୍ବରୁ ଜଣାଥିବା ସବୁଠାରୁ ଶସ୍ତା ମାର୍ଗ ତୁଳନାରେ ପ୍ରତି ସେକେଣ୍ଡରେ ପ୍ରାୟ ୫୮.୮୦ ମିଟର ବେଗର ଇନ୍ଧନ ସଞ୍ଚୟ କରାଯାଇପାରିବ। ବ୍ରାଜିଲସ୍ଥିତ ସାଓ ପାଓଲୋ ବିଶ୍ୱବିଦ୍ୟାଳୟର ସହଗବେଷକ ଭିଟୋର ମାର୍ଟିନ୍ସ ଡି ଓଲିଭେରା କହିଛନ୍ତି, ‘କେବଳ ପୃଥିବୀର ନିକଟତର ମାର୍ଗ ସହଜ ବୋଲି ଭାବିବା ଅନୁଚିତ। ଆଧୁନିକ ପ୍ରଣାଳୀର ବ୍ୟବହାର ଦ୍ୱାରା ଏଭଳି ଅନେକ ଅକୁହା ଓ ଅନାଲୋଚିତ ସମାଧାନ ସାମ୍ନାକୁ ଆସିପାରିବ।’
ଏହି ନୂତନ ପଥର ଅନ୍ୟ ଏକ ବଡ଼ ସୁବିଧା ହେଉଛି ନିରନ୍ତର ଯୋଗାଯୋଗ। ପୂର୍ବରୁ ଆର୍ଟେମିସ୍-୨ ମିଶନ ସମୟରେ ମହାକାଶଯାନଟି ଚନ୍ଦ୍ରର ଠିକ୍ ପଛ ପଟକୁ ଚାଲିଯିବା ଯୋଗୁ ପୃଥିବୀ ସହ କିଛି ସମୟ ପାଇଁ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। କିନ୍ତୁ ବୈଜ୍ଞାନିକମାନଙ୍କ ଦ୍ୱାରା ପ୍ରସ୍ତାବିତ ଏହି ନୂଆ କକ୍ଷପଥ ଯୋଗୁ ଯୋଗାଯୋଗରେ କୌଣସି ବାଧା ସୃଷ୍ଟି ହେବ ନାହିଁ। ପର୍ତ୍ତୁଗାଲର କୋଇମ୍ବ୍ରା ବିଶ୍ୱବିଦ୍ୟାଳୟର ମୁଖ୍ୟ ଗବେଷକ ଆଲାନ କାର୍ଡେକ ଡି ଆଲମେଡା ଜୁନିୟର କହିଛନ୍ତି, ଏହି ପ୍ରଣାଳୀକୁ ଆଗାମୀ ଦିନରେ ଅନ୍ୟ ମହାକାଶ ଅଭିଯାନରେ ବ୍ୟବହାର କରାଯାଇପାରିବ। ତେବେ ବୈଜ୍ଞାନିକମାନଙ୍କ ମତରେ, ଏହା ଚୂଡ଼ାନ୍ତ ସମାଧାନ ନୁହେଁ। ବର୍ତ୍ତମାନର ମଡେଲରେ କେବଳ ପୃଥିବୀ ଓ ଚନ୍ଦ୍ରର ମାଧ୍ୟାକର୍ଷଣକୁ ହିସାବକୁ ନିଆଯାଇଛି। ଆଗାମୀ ଦିନରେ ଯଦି ଏଥିରେ ସୂର୍ଯ୍ୟଙ୍କ ମାଧ୍ୟାକର୍ଷଣ ଶକ୍ତିର ପ୍ରଭାବକୁ ସାମିଲ କରାଯାଏ, ତେବେ ଭବିଷ୍ୟତରେ ଏହାଠାରୁ ଆହୁରି ଅଧିକ ସହଜ ଏବଂ ଶସ୍ତା ମାର୍ଗ ମିଳିପାରିବ ବୋଲି ଆଶା କରାଯାଉଛି।
