ଜେରୁଜେଲମ୍,୨୭ା୬: ଇସ୍ରାଏଲ୍ର ରାମିଲା ସହରରେ ହେବ୍ର୍ୟୁ ୟୁନିଭର୍ସିଟି ଅଫ୍ ଜେରୁଜେଲମ୍ର ପ୍ରତ୍ନତତ୍ତ୍ୱ ଟିମ୍ ପ୍ରାକ୍ ଐତିହାସିକ ଯୁଗର ମଣିଷଙ୍କ ଦେହାବଶେଷ ଠାବ କରିଛିି। ହୋମୋ ଜାତୀୟ ସମେତ ଆଧୁନିକ ମଣିଷ ସହ ଏହା ମେଳ ଖାଉନାହିଁ। ଇସ୍ରାଏଲ୍ର ଗବେଷକମାନେ ଗୁରୁବାର ଦାବି କରିଛନ୍ତି ଯେ ସେମାନେ ଏକ ନୂଆ ପ୍ରକାର ପ୍ରାଚୀନ ମାନବର ଅସ୍ଥି ପାଇଛନ୍ତି। ମାନବ ସଭ୍ୟତା ସମ୍ପର୍କରେ ଏଥିରୁ ଅନେକ କିଛି ଜଣାପଡ଼ିବ ବୋଲି କୁହାଯାଉଛି। ରାମିଲା ସହର ନିକଟରେ ପ୍ରତ୍ନତତ୍ତ୍ୱ ଖନନ ବେଳେ ମିଳିଥିବା ଏହି ଅବଶେଷ ସମ୍ପର୍କରେ ସାଇନ୍ସ ଜର୍ନାଲରେ ଏକ ଅଧ୍ୟୟନ ପ୍ରକାଶ ପାଇଛି। ୟୋସି ଜାଇଡନରଙ୍କ ନେତୃତ୍ୱରେ ତେଲ୍ ଆଭିଭ ୟୁନିଭର୍ସିଟିର ନୃତତ୍ତ୍ୱବିତ୍ ଏବଂ ପ୍ରତ୍ନତତ୍ତ୍ୱବିତ୍ମାନେ ଏହାକୁ ‘ନେଶର ରାମିଲା ହୋମୋ ଟାଇପ୍’ ନାଁ ଦେଇଛନ୍ତି। ପ୍ରାୟ ୧୪୦,୦୦୦ରୁ ୧୨୦,୦୦୦ ବର୍ଷ ପୂର୍ବେ ଜୀବିତ ଥିବା ନେଶର ରାମିଲା ମାନବର ଆକୃତିରେ ଉଭୟ ନିଏଣ୍ଡରଥାଲ ଓ ପ୍ରାଚୀନ ହୋମୋର ବୈଶିଷ୍ଟ୍ୟ ରହିଛି। ଏହାର କଙ୍କାଳ ଢାଞ୍ଚା ସମ୍ପୂର୍ଣ୍ଣ ଭିନ୍ନ। ଏଥିରେ ଥୋଡ଼ି ନ ଥିବାବେଳେ ବଡ଼ ବଡ଼ ଦାନ୍ତ ରହିଛି। ୪୦୦,୦୦୦ ବର୍ଷ ପୁରୁଣା ପ୍ରାକ୍ ଐତିହାସିକ ଯୁଗର ଏକ ଜୀବାଶ୍ମ ସହ ଏହାର ସମ୍ପର୍କ ଥାଇପାରେ। ନିଏଣ୍ଡରଥାଲ ମାନବ ପ୍ରଥମେ ୟୁରୋପରେ ଦେଖାଦେଇ ପରେ ଦକ୍ଷିଣକୁ ସ୍ଥାନାନ୍ତର ହୋଇଥିବା ସିଦ୍ଧାନ୍ତ ଉପରେ ଏହି ଆବିଷ୍କାର ପ୍ରଶ୍ନଚିହ୍ନ ଲଗାଇଛି।
