ଚମ୍ପୁଆ,୨୨ା୧୨(ଡି.ଏନ.ଏ.): ଅବହେଳିତ ଅବସ୍ଥାରେ ରହିଛି ପର୍ଯ୍ୟଟନ ସ୍ଥଳୀ କେଶରୀ କୁଣ୍ଡ। ୨୪ ବର୍ଷ ହେଲା ପର୍ଯ୍ୟଟନ ସ୍ଥଳର ମାନ୍ୟତା ଲାଭ କରିଥିବା ବେଳେ ଆଜି ପର୍ଯ୍ୟନ୍ତ ଭଲ ରାସ୍ତା, ପାର୍କିଂ ଓ ବିଦ୍ୟୁତ୍ ବ୍ୟବସ୍ଥା କରାଯାଇନାହିଁ। ପୁରାଣ କଥାବସ୍ତୁରେ ସ୍ଥଳର ମାହାତ୍ମ୍ୟ ରହିଛି। ଲୋକେ ଏଠାରେ ପିତୃପୁରୁଷଙ୍କୁ ପିଣ୍ଡଦାନ କରିଥାନ୍ତି। ମାତ୍ର ମୌଳିକ ସୁବିଧା ନ ଥିବାରୁ ସ୍ଥଳ ପର୍ଯ୍ୟଟକଙ୍କୁ ଆକୃଷ୍ଠ କରିପାରୁନାହିଁ। ପର୍ଯ୍ୟଟନ ସ୍ଥଳକୁ ଗୁରୁତ୍ୱ ଦେଇ ସୌନ୍ଦର୍ଯ୍ୟ ତଥା ଉନ୍ନୟନ କାର୍ଯ୍ୟ କରିବାକୁ ସ୍ଥାନୀୟ ବାସିନ୍ଦା ଦାବି କରୁଛନ୍ତି।
ଚମ୍ପୁଆ ସଦର ମହକୁମାଠାରୁ ମାତ୍ର ୧୦ କି.ମି. ଦୂରରେ ଥିବା କେଶରୀ କୁଣ୍ଡ ୨୦୦୮ରୁ ପର୍ଯ୍ୟଟନ ସ୍ଥଳୀର ମାନ୍ୟତା ପାଇଛି। ବୈତରଣୀ ନଦୀର କୁଳୁକୁଳୁ ନାଦ ଓ ବିସ୍ତୀର୍ଣ୍ଣ ବାଲୁକା ଶଜ୍ୟା, ସବୁଜ ବନାନୀ ଭରା ପ୍ରାକୃତିକ ପରିବେଶ ସହିତ ପୁଣ୍ୟତୋୟା ଚିରସ୍ରୋତା ବୈତରଣୀ କେଶରୀ କୁଣ୍ଡକୁ ମନୋରମ କରି ଗଢ଼ି ତୋଳିଛି। ଏଥିସହ ନଦୀ ଗର୍ଭରେ ଥିବା ବିରାଟ ପଥର ଚଟାଣ ସ୍ଥଳର ସୌନ୍ଦର୍ଯ୍ୟ ବଢ଼ାଇ ଦେଉଛି। ବଣଭୋଜି ପାଇଁ ଏହା ଏକ ଉତ୍ତମ ସ୍ଥାନ ହୋଇଥିଲେ ହେଁ ଚଳିତ ମାସ ବର୍ତ୍ତମାନ ସୁଦ୍ଧା କଁା ଭଁା କିଛି ସ୍ଥାନୀୟ ବଣଭୋଜି ଦଳକୁ ଛାଡ଼ି ଦେଲେ ସେମିତି ଆଖିଦୃଶିଆ ପର୍ଯ୍ୟଟକଙ୍କ ଆଗମନ ହୋଇନାହିଁ।
ମୟୂରଭଞ୍ଜ ଓ କେନ୍ଦୁଝର ଜିଲାକୁ ଭାଗ କରୁଥିବା ଏହି ନଦୀର ଗୋଟିଏ ପଟେ କେଶରୀ ଗାଁ ଓ ଅନ୍ୟପାଖରେ ସରେଇ ଗାଁ ଅବସ୍ଥିତ। ନଦୀ ଗର୍ଭରେ ଥିବା ପଥର ଚଟାଣରେ ୩ ଗୋଟି କୁଣ୍ଡ ଏହାର ମାହାତ୍ମ୍ୟ ବଢ଼ାଇଥାଏ। ବିଶେଷ ଭାବରେ ମକର ସଂକ୍ରାନ୍ତି ଦିନ ଏଠାରେ ଏକ ବିରାଟ ମେଳାର ଆୟୋଜନ ହୋଇଥାଏ। ନଦୀକୁ ଓହ୍ଲାଇବା ପାଇଁ ପାହାଚ ବ୍ୟବସ୍ଥା କରାଯାଇଛି। ଏଥିସହ ପୂର୍ତ୍ତ ଓ ଗୃହ ନିର୍ମାଣ ବିଭାଗ ପକ୍ଷରୁ ରାଜ୍ୟ ପର୍ଯ୍ୟଟନ ବିକାଶ ଅଧୀନରେ ୨୦ ଲକ୍ଷ ଟଙ୍କା ବ୍ୟୟରେ ସଂଯୋଗୀ ରାସ୍ତା ଓ ଯାନବାହନ ରହଣି ସ୍ଥଳର ଭିତ୍ତିପ୍ରସ୍ତର ସ୍ଥାପନ ହୋଇଛି। ଏ ପର୍ଯ୍ୟନ୍ତ କାମ ଆରମ୍ଭ ହୋଇନାହିଁ।
ଔପନ୍ୟାସିକା ପଦ୍ମିନୀ ମିଶ୍ର କୁହନ୍ତି, ଐତିହାସିକ ଭିତ୍ତିଭୂମିରେ ରାଜା ଯଯାତି କେଶରୀ କରିଥିବା ଦଶାଶ୍ୱମେଧ ଯଜ୍ଞରେ କନୌଜରୁ ଆସିଥିବା ବ୍ରାହ୍ମଣମାନଙ୍କ ପରାମର୍ଶରେ ନଦୀ ତଟରେ ଶିବ ଲିଙ୍ଗ ସ୍ଥାପନ କରି ପୂଜାର୍ଚ୍ଚନା କରିଥିଲେ। ଏହି ସ୍ଥାନକୁ ଦ୍ୱିତୀୟ ଗଙ୍ଗା ଭାବେ ଗ୍ରହଣ କରି ଶ୍ରାଦ୍ଧ ଓ ଅସ୍ତି ବିସର୍ଜନ କାର୍ଯ୍ୟ କରାଯାଇ ପିତୃ ପୁରୁଷଙ୍କୁ ଅର୍ପଣ କରାଯାଇଥାଏ। ବିଶେଷ ଭାବରେ ଏଠାରେ ଥିବା ତିନି ଗୋଟି କୁଣ୍ଡରେ ସ୍ନାନକଲେ ପାପକ୍ଷୟ ହୋଇଥାଏ ବୋଲି ବିଶ୍ୱାସ ରହିଥିବା ସେ କହିଥିଲେ। ସ୍ଥାନୀୟ ଅଧିବାସୀ ବିଧୁଭୂଷଣ ପତିଙ୍କ କହିବା ଅନୁଯାୟୀ, ଏଠାରେ ଆମୋଦ ପ୍ରମୋଦର ବ୍ୟବସ୍ଥା ନାହିଁ। ଏପରିକି ପିଇବା ପାଣି, ରାସ୍ତାଘାଟର ଉନ୍ନତି ହୋଇ ନ ଥିବା ବେଳେ ବିଦ୍ୟୁତ୍ ଓ ପର୍ଯ୍ୟଟକ ରହିବା ପାଇଁ ବ୍ୟବସ୍ଥା ନାହିଁ। ଫଳରେ ପର୍ଯ୍ୟଟକ ଏଠାକୁ ଆସୁ ନାହାନ୍ତି। ଏଥିପ୍ରତି ସରକାରୀସ୍ତରରେ ପଦକ୍ଷେପ ଗ୍ରହଣ କରାଗଲେ ଏହା ଏକ ଉନ୍ନତ ପର୍ଯ୍ୟଟନ ସ୍ଥଳୀ ହୋଇ ପାରିବ ବୋଲି ସେ କହିଛନ୍ତି।
