ଭୁବନେଶ୍ୱର, ୮।୪ (ବ୍ୟୁରୋ): ରାଜଧାନୀ ଭୁବନେଶ୍ୱରକୁ ପୂର୍ଣ୍ଣାଙ୍ଗ ସ୍ମାର୍ଟସିଟିରେ ପରିଣତ କରିବାକୁ ଗୋଟିଏ ପରେ ଗୋଟିଏ ପ୍ରକଳ୍ପ ଆରମ୍ଭ ହେଉଛି। ବିଡିଏ, ବିଏମ୍ସି ଓ ସ୍ମାର୍ଟସିଟି ପକ୍ଷରୁ ମାଳ ମାଳ ଯୋଜନା ପ୍ରସ୍ତୁତ କରାଯାଉଥିଲେ ମଧ୍ୟ ସମୟ ସହିତ ଅଧିକାଂଶ ନାଲି ଫିତା ତଳେ ଚାପି ହୋଇ ଯାଉଛି। ବହୁ ପ୍ରକଳ୍ପ ଅନିଶ୍ଚିତତା ମଧ୍ୟରେ ଗତି କରୁଥିବାବେଳେ ‘ସିଟିଜ୍ ପ୍ରକଳ୍ପ’କୁ ନେଇ ସେମିତି କିଛି ଆଶଙ୍କା ଦେଖାଦେଇଛି। ସ୍ମାର୍ଟସିଟି ମିଶନ୍ରେ ସହରର କିଛି ନିର୍ଦ୍ଦିଷ୍ଟ ଅଞ୍ଚଳକୁ ଗୁରୁତ୍ୱ ଦିଆଯାଉଥିବାବେଳେ ଏହି ପ୍ରକଳ୍ପରେ ସହରର ବିଭିନ୍ନ ସ୍ଥାନର ବିକାଶ କରାଯିବାର ଯୋଜନା ରହିଛି। ଭୁବନେଶ୍ବରରେ ‘ସିଟିଜ୍ ପ୍ରକଳ୍ପ’ କାର୍ଯ୍ୟକାରୀ କରିବା ପାଇଁ ସହରାଞ୍ଚଳ ବିକାଶ ମନ୍ତ୍ରଣାଳୟ, ରାଜ୍ୟ ସରକାର ଓ ସ୍ମାର୍ଟସିଟି ମଧ୍ୟରେ ୨୦୧୯ ମାର୍ଚ୍ଚ ୫ରେ ଏକ ତ୍ରିପାକ୍ଷିକ ଚୁକ୍ତିନାମା ସ୍ବାକ୍ଷରିତ ହୋଇଥିଲା। ଏହି ପ୍ରକଳ୍ପରେ କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରଣାଳୟ ସହିତ ଫ୍ରାନ୍ସ ଉନ୍ନୟନ ସଂସ୍ଥା (ଏଏଫ୍ଡି), ୟୁରୋପିଆନ ୟୁନିୟନ (ଇୟୁ) ଓ ନ୍ୟାଶନାଲ ଇନଷ୍ଟିଚ୍ୟୁଟ ଅଫ୍ ଅର୍ବାନ ଆଫାୟାର୍ସ (ଏନ୍ଆଇୟୁଏ) ଭୁବନେଶ୍ୱରକୁ ସହଯୋଗ କରୁଛି। ତେବେ ୩ ବର୍ଷ ପରେ ମଧ୍ୟ ପ୍ରକଳ୍ପ ଆରମ୍ଭ ହେବାର ନାଁ ଧରୁନି। ପ୍ରକଳ୍ପ ଅଧୀନରେ ସହରର ୨ହଜାର ୪୭୦ ଏକର ଖୋଲା ସ୍ଥାନର ବିକାଶ କରାଯିବାର ଥିଲା। ସହରବାସୀଙ୍କୁ ଉନ୍ନତ ସେବା ସହିତ ରାଜଧାନୀର ଐତିହ୍ୟ ଓ କୀର୍ତ୍ତିରାଜି ସୁରକ୍ଷା ଦିଗରେ କାର୍ଯ୍ୟ କରାଯାଇଥାନ୍ତା। ରାସ୍ତା, କଳ, ପାର୍କ, ଖୋଲା ସ୍ଥାନ, କ୍ରୀଡ଼ା ଓ ଖେଳ ପଡ଼ିଆ ସମେତ ଔଷଧୀୟ ଉଦ୍ୟାନ ଆଦି କରାଯିବାର ବ୍ୟବସ୍ଥା ରହିଥିଲା। ଏଥିପାଇଁ ମୋଟ୍ ୧୮୯୬୯ କୋଟି ଟଙ୍କାର ବ୍ୟୟ ଅଟକଳ ରଖାଯାଇଥିଲା। ତେବେ ପ୍ରୋତ୍ସାହନ ଓ ଅଧିକାରୀଙ୍କ ଖାମଖିଆଲ ତଥା ଅବହେଳା କାରଣରୁ ପ୍ରକଳ୍ପର ଶିଳାନ୍ୟାସ ମଧ୍ୟ ହୋଇ ପାରୁନାହିଁ। ଅପରପକ୍ଷେ ଏହି ପ୍ରକଳ୍ପ ଅଧୀନରେ ଥିବା ଏକାଧିକ ଯୋଜନା ଏବେ ବାଦ୍ ପଡିଛି।
ଏ ସମ୍ପର୍କରେ ସ୍ମାର୍ଟସିଟି ଜେନେରାଲ ମ୍ୟାନେଜର (ସିଟି ପ୍ରୋଜେକ୍ଟ) ଦିପ୍ତୀରାଣୀ ସାହୁ କହିଛନ୍ତି, ପ୍ରକଳ୍ପ ଟେଣ୍ଡର ପ୍ରୋସେସିଂ ଷ୍ଟେଜ୍ରେ ଅଛି। ଟେଣ୍ଡର ପ୍ରକ୍ରିୟା ସରିଲେ ଖୁବ୍ ଶୀଘ୍ର କାମ ଆରମ୍ଭ ହେବ। ଏହି ପ୍ରକଳ୍ପ କେବଳ ସ୍ମାର୍ଟସିଟିର ନୁହେଁ, ଏହା ବିଡିଏ, ବିଏମ୍ସି, କ୍ରୀଡା ବିଭାଗର ମିଳିତ ସହଯୋଗରେ କରାଯାଉଛି। ପୂର୍ବରୁ ଧାର୍ଯ୍ୟ ହୋଇଥିବା ପ୍ରକଳ୍ପରେ କିଛିଟା ପରିବର୍ତ୍ତନ କରାଯାଇଛି। ସଂଶୋଧିତ ପ୍ରକଳ୍ପ ଅନୁଯାୟୀ ସହରର ମୁଖ୍ୟ ଡ୍ରେନ୍ ନଂ. ୭ ଓ ୧୦ର ସୌନ୍ଦର୍ଯ୍ୟକରଣ କରାଯିବ। ଏହି ନାଳରେ ଯାଉଥିବା ପାଣି ଯେମିତି ଅପରିଷ୍କାର ନ ରହିବ, ତାହା ଉପରେ ଗୁରୁତ୍ୱ ଦିଆଯିବ। ବିଏମ୍ସି ସହିତ ମିଶି ଏହାର ଆଖପାଖକୁ ସ୍ବଚ୍ଛ ଓ ସୁନ୍ଦର ରଖିବା ସହିତ ଆକର୍ଷଣୀୟ କରାଯିବ। ସେହିପରି ବିଡିଏ ସହିତ ଅନୁବନ୍ଧିତ ହୋଇ ପାର୍କ ଅନ୍ ଡିମାଣ୍ଡ (ପିଓଡ଼ି) କରାଯିବ। ପାର୍କଗୁଡିକର ଉନ୍ନତିକରଣ ସହିତ ଏଠାରେ ସାଧାରଣ ଲୋକଙ୍କ ପାଇଁ ବିଭିନ୍ନ ଆନୁସଙ୍ଗିକ ବ୍ୟବସ୍ଥା ରହିବ। ନିକୋ ପାର୍କଠାରେ ହେବାକୁ ଥିବା ଔଷଧୀୟ ଉଦ୍ୟାନ ଏହାର ପାଇଲଟ୍ ପ୍ରକଳ୍ପ ହୋଇଥିବାରୁ ଏହା ଉପରେ ବିଶେଷ ଗୁରୁତ୍ୱାରୋପ କରାଯାଉଛି। ଏହାର ନିର୍ମାଣ କାର୍ଯ୍ୟ ଓ ବିଦ୍ୟୁତ୍ କାମ ଆରମ୍ଭ ହୋଇଥିବା ସେ ସୂଚନା ଦେଇଛନ୍ତି। ତେବେ ସଂଶୋଧିତ ବଜେଟ ସଂକ୍ରାନ୍ତରେ ସେ ସୂଚନା ଦେବାକୁ ମନା କରିଥିଲେ।
