ଖଜୁରୀପଡ଼ା, ୧୬ା୯( ବିଦୁର ବେହେରା): ଛାତ୍ରୀଛାତ୍ରଙ୍କୁ ପାଠ ପଢିବା ପାଇଁ ଅଭିଭାବକ ସ୍କୁଲ ଛାଡନ୍ତି। ଶିକ୍ଷୟତ୍ରୀ ଶିକ୍ଷକମାନେ ଛାତ୍ରୀଛାତ୍ରଙ୍କ ଦାୟିତ୍ୱ ନେଇ ପାଠ ପଢାଇଥାନ୍ତି। ମାତ୍ର ସେମାନଙ୍କ ଦାୟିତ୍ୱରେ କିଛିଟା ଅବହେଳା ପାଇଁ ଛାତ୍ରୀଛାତ୍ରମାନେ ବିପଦରେ ପଡିଥାନ୍ତି। ଏପରି ଏକ ଘଟଣା କନ୍ଧମାଳ ଜିଲା ଖଜୁରୀପଡା ବ୍ଲକରେ ଘଟିଛି। ଶିକ୍ଷୟିତ୍ରୀ ଶିକ୍ଷକଙ୍କ ଅବହେଳାରୁ ଜଣେ ଛାତ୍ରୀଙ୍କ ହାତ ଭାଙ୍ଗଛି। ଏହାର ପ୍ରତିବାଦରେ ମଙ୍ଗଳବାର ଅଭିଭାବକମାନେ ବିଦ୍ୟାଳୟ ଫାଟକରେ ତାଲା ପକାଇଥିଲେ। ଖଜୁରୀପଡ଼ା ବ୍ଲକ ଅନ୍ତର୍ଗତ ଟିଟ୍ରାପଙ୍ଗା ପଞ୍ଚାୟତର କଲାଡି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ଏପରି ଦେଖିବାକୁ ମିଳିଛି।
ବାଲବାଟିକା ଛାତ୍ରୀ ଆଇସା ଦିଗାଲ ସୋମବାର ସ୍କୁଲ ପରିସରରେ ଖେଳୁଥିବା ବେଳେ ପଡ଼ିଯାଇ ଗୁରୁତର ହୋଇଥିଲେ। ତାଙ୍କ ହାତ ଭାଙ୍ଗିଯାଇ ଗଭୀର ଆଘାତ ଲାଗିଥିଲା। ପ୍ରଧାନ ଶିକ୍ଷୟିତ୍ରୀ ସୁଭାଷିନୀ ରଣଭୁଇଁସା ଘଟଣାକୁ ଗୁରୁତ୍ୱ ନ ଦେଇ ଆଇସାଙ୍କୁ ଘରକୁ ସେହି ବିଦ୍ୟାଳୟରେ ପଢୁଥିବା ତାଙ୍କ ଭାଇ ହାତରେ ପଠାଇ ଦେଇଥିଲେ । ଏ ନେଇ ଆଇସାଙ୍କ ଜେଜେ ମା’ ଅମ୍ବିକା ଦିଗାଲ ସ୍କୁଲକୁ ଆସି ଶିକ୍ଷୟିତ୍ରୀ ଶିକ୍ଷକଙ୍କୁ ପଚାରିବାରୁ ଖେଳ ଶିକ୍ଷକ ଅଜିତ୍ ପ୍ରଧାନ ତାଙ୍କୁ ଦୁର୍ବ୍ୟବହାର କରିଥିଲେ ବୋଲି ସେ ଅଭିଯୋଗ କରିଛନ୍ତି। ଆହତ ଆଇସାଙ୍କୁ ଚିକିତ୍ସା ପାଇଁ ପରିବାର ଲୋକେ ଫୁଲବାଣୀ ମେଡିକାଲରେ ଭର୍ତ୍ତି କରିଥିଲେ। ସେଠାରେ ତାଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ଡାକ୍ତର ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରିଛନ୍ତି।
ଏହାର ପ୍ରତିବାଦ କରି ଆହତ ଛାତ୍ରୀଙ୍କ ଚିକିତ୍ସା ଦାବିକରି ଗ୍ରାମବାସୀ ଓ ସ୍କୁଲ କମିଟି କର୍ମକର୍ତ୍ତା ମଙ୍ଗଳବାର ସକାଳେ ଏକ ଘଣ୍ଟା ଧରି ସ୍କୁଲ ମୁଖ୍ୟ ଫାଟକରେ ତାଲା ପକାଇ ରଖିଥିଲେ। ଖବର ପାଇ ସରପଞ୍ଚ ସଞ୍ଜୀବ ଲୋଚନ ପ୍ରଧାନ ଘଟଣା ସ୍ଥଳରେ ପହଞ୍ଚତ୍ ଉତ୍ତ୍ୟକ୍ତ ଗ୍ରାମବାସୀଙ୍କୁ ବୁଝାଶୁଝା କରିଥିଲେ। ଆହତ ଛାତ୍ରୀଙ୍କୁ ଚିକିତ୍ସା କ୍ଷେତ୍ରରେ ସହଯୋଗ କରାଯିବ। ଦୁର୍ବ୍ୟବହାର କରିଥିବା ଖେଳ ଶିକ୍ଷକ ପ୍ରଧାନଙ୍କ ବଦଳି ପାଇଁ ସୁପାରିଶ କରିବେ ବୋଲି ପ୍ରତିଶ୍ରୁତି ଦେବା ପରେ ଗ୍ରାମବାସୀ ସ୍କୁଲ ଫାଟକରୁ ତାଲା ଖୋଲିଥିଲେ। ଖେଳ ଶିକ୍ଷକଙ୍କ ବଦଳି ନ ହେଲେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଏ ନେଇ ବିଇଓ ବିନୋଦ ବିହାରୀ ଦିଗାଲଙ୍କୁ ପଚାରିବାରୁ ସେ କହିଲେ, ଘଟଣା ସମ୍ପର୍କରେ ସେ ଅବଗତ ଥିଲେ। ଜଣେ ଶିକ୍ଷୟିତ୍ରୀ ଅବା ଶିକ୍ଷକ ହୁଅନ୍ତୁ ଆହତ ଛାତ୍ରୀଙ୍କୁ ନେଇ ଘରେ ଛାଡ଼ିବା କଥା। ନଚେତ୍ ମେଡିକାଲ ନେବା କଥା। ସେମାନେ ସେପରି କରିନାହାନ୍ତି। ସିଆରସିସି ସୁଜାତା ପ୍ରଧାନ ମଧ୍ୟ ପହଞ୍ଚତ୍ ଅଭିଭାବକଙ୍କୁ ବୁଝାଶୁଝା କରିଥିଲେ। ଡିଇଓ ରାଜେଶ କୁମାର ସ୍ବାଇଁଙ୍କୁ ପଚାରିବାରୁ ସେ କହିଛନ୍ତି, ଘଟଣାର ତଦନ୍ତ ପରେ ପ୍ରଧାନ ଶିକ୍ଷୟିତ୍ରୀ ଓ ଖେଳ ଶିକ୍ଷକ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
