ଜୁରିଚ୍, ୩୧।୮: ସମ୍ମାନଜନକ ଡାଇମଣ୍ଡ ଲିଗ୍ ମିଟ୍ ଗୁରୁବାରଠାରୁ ଏଠାରେ ଆରମ୍ଭ ହେବ। ନୂଆ ବିଶ୍ୱ ଚାମ୍ପିୟନ ଭାରତର ନୀରଜ ଚୋପ୍ରା ଡାଇମଣ୍ଡ ଲିଗ୍ରେ ମଧ୍ୟ ଚମତ୍କାର ପ୍ରଦର୍ଶନ ଜାରିରଖି ସ୍ବର୍ଣ୍ଣ ପଦକ ବିଜୟ ଲକ୍ଷ୍ୟରେ ରହିଛନ୍ତି। ବୁଦାପେଷ୍ଟରେ ଅନୁଷ୍ଠିତ ବିଶ୍ୱ ଚାମ୍ପିୟନଶିପ୍ରେ ଗତ ରବିବାର ୮୮.୧୭ ମିଟର ଜାଭେଲିନ୍ ଥ୍ରୋ କରି ନୀରଜ ପ୍ରଥମଥରପାଇଁ ଚାମ୍ପିୟନ ହୋଇଥିଲେ। ୨୦୨୨ ସଂସ୍କରଣରେ ରୌପ୍ୟ ପଦକ ହାସଲ କରିଥିବା ନୀରଜଙ୍କ ପାଇଁ ଏହାଥିଲା ପ୍ରଥମ ବିଶ୍ୱ ଚାମ୍ପିୟନଶିପ୍ ଟାଇଟଲ। ଭାରତର ଏହି ସୁପରଷ୍ଟାର ଆଥଲେଟ୍ ବିଶ୍ୱର ତୃତୀୟ ଜାଭେଲିନ୍ ଥ୍ରୋୟରଭାବେ ଉଭୟ ଅଲିମ୍ପିକ୍ସ ଓ ବିଶ୍ୱ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ଜିତିବାରେ ସକ୍ଷମ ହୋଇଥିଲେ। ଏହି ତାଲିକାରେ ଥିବା ଅନ୍ୟ ୨ ଆଥଲେଟ୍ ହେଲେ ଚେକ୍ ରିପବ୍ଲିକର ଜାନ୍ ଜେଲେଝ୍ନି ଓ ନରଓ୍ବେର ଆନ୍ଦ୍ରିଆସ ଥୋର୍କିଲ୍ଡସେନ। ଜେଲେଝ୍ନି ୧୯୯୨, ୧୯୯୬ ଓ ୨୦୦୦ରେ ଅଲିମ୍ପିକ୍ ସ୍ବର୍ଣ୍ଣ ଏବଂ ୧୯୯୩, ୧୯୯୬ ଓ ୨୦୦୧ରେ ବିଶ୍ୱ ଚାମ୍ପିୟନଶିପ୍ ଟାଇଟଲ ଜିତିଥିଲେ। ସେହିପରି ଥୋର୍କିଲ୍ଡସେନ ୨୦୦୮ ଅଲିମ୍ପିକ୍ସ ଏବଂ ୨୦୦୯ ବିଶ୍ୱ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ହାସଲ କରିଥିଲେ।
୨୦୨୦ ଟୋକିଓ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ବିଜେତା ୨୫ ବର୍ଷୀୟ ନୀରଜ ଚଳିତ ସିଜନରେ ଅପରାଜେୟ ରହିଛନ୍ତି। ବିଶ୍ୱ ଚାମ୍ପିୟନଶିପ୍ ବିଜେତା ହେବା ପୂର୍ବରୁ ସେ ଦୋହା (ମେ-୫) ଓ ଲାଉସାନେ (ଜୁନ୍-୩୦)ରେ ୨ଟି ଡାଇମଣ୍ଡ ଲିଗ୍ରେ ଚମତ୍କାର ପ୍ରଦର୍ଶନ କରିଥିଲେ। ବିଶ୍ୱ ଚାମ୍ପିୟନଶିପ୍ରେ ଟାଇଟଲ ଜିତିବାର ୪ ଦିନପରେ ନୀରଜ ଜୁରିଚ୍ରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି। ଏଠାରେ ତାଙ୍କୁ ଚେକ୍ ରିପବ୍ଲିକର ଜାକୁବ୍ ଭାଡ୍ଲେଚ୍୍, ବୁଦାପେଷ୍ଟରେ ବ୍ରୋଞ୍ଜ ବିଜୟୀ ଜର୍ମାନୀର ଜୁଲିଆନ ଓ୍ବେବର ଓ ୨ ଥର ବିଶ୍ୱ ଚାମ୍ପିୟନ ଗ୍ରେନାଡାର ଆଣ୍ଡରସନ ପେଟେର୍ସଙ୍କ ସହ ମୁକାବିଲା କରିବାକୁ ହେବ। ବୁଦାପେଷ୍ଟରେ ରୌପ୍ୟ ବିଜୟୀ ପାକିସ୍ତାନର ଅର୍ଶଦ ନଦିମ କିନ୍ତୁ ଜୁରିଚ୍ ପ୍ରତିଯୋଗିତାରେ ଭାଗ ନେବେନାହିଁ। ଗତବର୍ଷ ଡାଇମଣ୍ଡ ଲିଗ୍ ଟ୍ରଫି ଜିତିଥିବା ନୀରଜ ଏର୍ଷ ୨ଟି ଇଭେଣ୍ଟ ପରେ ୧୬ ପଏଣ୍ଟ ସହିତ ତୃତୀୟ ସ୍ଥାନରେ ରହିଛନ୍ତି। ଭାଡ୍ଲେଚ୍ ୩ ଇଭେଣ୍ଟରୁ ୨୧ ଓ ଓ୍ବେବର ୩ ଇଭେଣ୍ଟରୁ ୧୯ ପଏଣ୍ଟ ପାଇ ପ୍ରଥମ ଦୁଇ ସ୍ଥାନରେ ରହିଛନ୍ତି। ଚଳିତ ସିଜନରେ ସଂଘର୍ଷ କରୁଥିବା ପିଟର୍ସ ୧୫ ପଏଣ୍ଟ ସହିତ ଚତୁର୍ଥ ସ୍ଥାନରେ ଅଛନ୍ତି। ଗତ ବିଶ୍ୱ ଚାମ୍ପିୟନଶିପ୍ର ଫାଇନାଲ ରାଉଣ୍ଡରେ ସେ ପ୍ରବେଶ କରିବାରେ ବିଫଳ ହୋଇଥିଲେ। ଡାଇମଣ୍ଡ ଲିଗ୍ ସିରିଜର ଅନ୍ତିମ ଚରଣ ଜୁରିଚ୍ରେ ଅନୁଷ୍ଠିତ ହେବାକୁ ଯାଉଛି। ସିଜନର ଫାଇନାଲ ଆମେରିକାର ଇୟୁଜେନେଠାରେ ସେପ୍ଟେମ୍ବର ୧୬ ଓ ୧୭ରେ ଅନୁଷ୍ଠିତ ହେବ। ସେଠାରେ ଚାମ୍ପିୟନ ହେବା ପ୍ରତିଯୋଗୀ ଡାଇମଣ୍ଡ ଲିଗ୍ ବିଜେତା ଘୋଷିତ ହେବ। ପଏଣ୍ଟ ଟେବୁଲର ଟପ୍-୬ରେ ଥିବା ପ୍ରତିଯୋଗୀ ହିଁ ଇୟୁଜେନେ ପ୍ରତିଯୋଗିତାରେ ଅଂଶଗ୍ରହଣ କରିପାରିବେ।
ଲଙ୍ଗ ଜମ୍ପର ମୁରଲୀ ଶ୍ରୀଶଙ୍କରଙ୍କୁ ମଧ୍ୟ ଜୁରିଚ୍ ଡାଇମଣ୍ଡ ଲିଗ୍ ସିରିଜରେ ଆକ୍ସନରେ ଦେଖିବାକୁ ମିଳିବ। ବିଶ୍ୱ ଚାମ୍ପିୟନଶିପ୍ର ଫାଇନାଲ ରାଉଣ୍ଡକୁ ଉନ୍ନୀତ ହେବାରେ ସେ ବିଫଳ ହୋଇଥିଲେ। ତାଙ୍କର ବ୍ୟକ୍ତିଗତ ଶ୍ରେଷ୍ଠ ୮.୪୧ ମିଟର ରହିଥିଲେ ହେଁ ବିଶ୍ୱ ଚାମ୍ପିୟନଶିପ୍ର କ୍ୱାଲିଫାଇଂ ରାଉଣ୍ଡରେ ୭.୭୪ ମିଟର ଡେଇଁ ଓଭରଅଲ୍ ୨୨ତମ ସ୍ଥାନରେ ରହିଥିଲେ। ଡାଇମଣ୍ଡ ଲିଗ୍ ସିଜନର ଲଙ୍ଗଜମ୍ପ ଷ୍ଟାଣ୍ଡିଂରେ ସେ ୨ ଇଭେଣ୍ଟରୁ ୧୦ ପଏଣ୍ଟ ସହିତ ତୃତୀୟ ସ୍ଥାନରେ ରହିଛନ୍ତି।
