ନୂଆଦିଲ୍ଲୀ,୭।୧୨: ଜାତୀୟ ଶିଶୁ ସୁରକ୍ଷା ଅଧିକାର ଆୟୋଗ (ଏନ୍ସିପିସିଆର୍) ପକ୍ଷରୁ ବୁଧବାର ଏକ ନୋଟିସ୍ ଜାରି କରାଯାଇଛି। ଅଣ-ସରକାରୀ ସଂଗଠନଗୁଡିକୁ (ଏନ୍ଜିଓ) ପାଣ୍ଠି ସଂଗ୍ରହ ପାଇଁ ବିଜ୍ଞାପନରେ ଶିଶୁଙ୍କର ଦୟନୀୟ ସ୍ଥିତି ନ ଦେଖାଇବାକୁ ଉକ୍ତ ନୋଟିସରେ ଉଲ୍ଲେଖ କରାଯାଇଛି। ସଂସଦରେ ଏହା ବିରୋଧରେ ସ୍ବର ଉତ୍ତୋଳନ କରାଯିବା ପରେ ଏନ୍ସିପିସିଆର୍ ଏହି ନୋଟିସ ପଠାଇଥିବା ଜଣାପଡ଼ିଛି। ଏନ୍ଜିଓ ଦେଶ ବିଦେଶରୁ ଟଙ୍କା ସଂଗ୍ରହ କରୁଥିବା ଏନ୍ସିପିସିଆର୍ ଅଭିଯୋଗ ଆଣିଛି। ତେବେ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଏହି ନୋଟିସ ଜାରି କରାଯାଇଛି। ଜାତୀୟ ଶିଶୁ ସୁରକ୍ଷା ଅଧିକାର ଏନ୍ଜିଓମାନଙ୍କୁ ନୋଟିସ କରିଛି ଯେ, ସଂସଦର ଜଣେ ସଦସ୍ୟ ଆୟୋଗଙ୍କ ଆଗରେ ଚିନ୍ତା ପ୍ରକଟ କରିଛନ୍ତି। ସେ କହିଛନ୍ତି, ବିଭିନ୍ନ ଏନ୍ଜିଓ ଘରୋଇ ତଥା ଅନ୍ତର୍ଜାତୀୟ ଛାପା ଗଣମାଧ୍ୟମ, ନ୍ୟୁଜ ଚ୍ୟାନେଲ, ୱେବସାଇଟ ଏବଂ ସୋସିଆଲ ମିଡିଆରେ ଦୁର୍ବଳ ଶିଶୁଙ୍କ ଦୟନୀୟ ଅବସ୍ଥା ବିଜ୍ଞାପନ ମାଧ୍ୟମରେ ଦେଖାଇ ପ୍ରଚାର କରି ପାଣ୍ଠି ସଂଗ୍ରହ କରୁଛନ୍ତି। ତେବେ ଏଭଳି ବିଜ୍ଞାପନକୁ ନ ଦେଖାଇବା ପାଇଁ ଏନ୍ସିପିସିଆର୍ ଏନ୍ଜିଓଙ୍କୁ ତାଗିଦ୍ କରିଛନ୍ତି। ଯଦି ସେମାନେ ଏଭଳି କରିବାରେ ଧରାପଡନ୍ତି ତେବେ ଏନ୍ଜିଓ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏନ୍ସିପିସିଆର୍ ପକ୍ଷରୁ କୁହାଯାଇଛି।
