ନାଉଗାଁ,୯ା୬(ସ୍ବ.ପ୍ର.): ଜନସାଧାରଣଙ୍କୁ ସୁବିଧାରେ ପ୍ରଶାସନିକ ସେବା ଯୋଗାଇ ଦେବା ସହ ରାଜସ୍ବ ଆଦାୟ ପାଇଁ ପ୍ରତି ବ୍ଲକରେ ସରକାରଙ୍କ ପକ୍ଷରୁ ତହସିଲ କାର୍ଯ୍ୟାଳୟ ଅଛି। ଏହି କାର୍ଯ୍ୟାଳୟ ମାଧ୍ୟମରେ ଜମିଜମା ସଂକ୍ରାନ୍ତ କାଗଜପତ୍ର, ବିଭିନ୍ନ ପ୍ରମାଣପତ୍ର, ପ୍ରାକୃତିକ ବିପର୍ଯ୍ୟୟ ସହାୟତା ସହ ସରକାରୀ ଜମିର ରକ୍ଷଣାବେକ୍ଷଣ ଓ ରାଜସ୍ବ ଆଦାୟ ଆଦି କାର୍ଯ୍ୟ କରାଯାଇଥାଏ। ମାତ୍ର ଜଗତ୍ସିଂହପୁର ଜିଲା ନାଉଗାଁ ତହସିଲ କାର୍ଯ୍ୟାଳୟରେ ୨୨ ପଦବୀ ମଧ୍ୟରୁ ୧୩ ଖାଲି ପଡିଥିବାରୁ ଏଠାକୁ ବିଭିନ୍ନ କାମ ପାଇଁ ଆସୁଥିବା ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଏହାର ସୁଯୋଗ ନେଇ ଦଲାଲମାନେ ସକ୍ରିୟ ହେଉଥିବା ସାଧାରଣରେ ଅଭିଯୋଗ ହେଉଛି।
ତହସିଲ କାର୍ଯ୍ୟାଳୟରେ ତହସିଲଦାର, ଅତିରିକ୍ତ ତହସିଲଦାର ଓ ମୁଖ୍ୟ କିରାଣିଙ୍କ ପଦବୀକୁ ମିଶାଇ ମୋଟ ୨୨ ପଦବୀ ରହିଛି। ତହସିଲଦାର, ଅତିରିକ୍ତ ତହସିଲଦାର ଓ ମୁଖ୍ୟ କିରାଣିଙ୍କ ପଦବୀ ପୂରଣ ହୋଇଥିବା ବେଳେ ଅନ୍ୟ ପଦବୀଗୁଡ଼ିକରେ କର୍ମଚାରୀ ଅଭାବ ରହିଛି। ଏଥିରେ ବରିଷ୍ଠ ରାଜସ୍ବ ସହାୟକ ପଦବୀ ପାଇଁ ୪ଜଣ ଆବଶ୍ୟକ ଥିବା ବେଳେ ମାତ୍ର ୨ ଜଣ, କନିଷ୍ଠ ରାଜସ୍ବ ସହାୟକ ପଦବୀ ପାଇଁ ୩ ଜଣ ଆବଶ୍ୟକ ଥିବା ବେଳେ ମାତ୍ର ଜଣେ, ରାଜସ୍ବ ପର୍ଯ୍ୟବେକ୍ଷକ ପଦବୀ ଜଣକ ପାଇଁ ଉଦ୍ଦିିଷ୍ଟ ରହିଥିଲେ ମଧ୍ୟ ତାହା ଫାଙ୍କା ପଡିଛି। ସେହିପରି ଅମୀନ ପଦବୀ ପାଇଁ ୨ଜଣ ଆବଶ୍ୟକ ଥିବା ବେଳେ ମାତ୍ର ଜଣେ, ପିଅନ ପଦବୀ ପାଇଁ ୫ଜଣ ଆବଶ୍ୟକ ଥିଲେ ମଧ୍ୟ ମାତ୍ର ୨ଜଣ ଅଛନ୍ତି। ଏହାସହ ପ୍ରକ୍ରିୟା ସର୍ଭର ୨ଟି ପଦବୀ ରହିଥିବା ବେଳେ ସମ୍ପୂର୍ଣ୍ଣ ଫାଙ୍କା ପଡିଥିବା ବେଳେ ଚେନ୍ମ୍ୟାନ ୨ଟିଯାକ ପଦବୀ ଫାଙ୍କା ପଡିଛି। ତହସିଲରେ ୨୨ଜଣ କର୍ମଚାରୀ ଆବଶ୍ୟକ ଥିବା ବେଳେ ମାତ୍ର ୯ଜଣରେ କାର୍ଯ୍ୟ ଚାଲିଛି। ଏଠାରେ ଅଧାରୁ ଅଧିକ ପଦବୀ ଫାଙ୍କା ପଡ଼ିଥିବାରୁ ତହସିଲ କାର୍ଯ୍ୟ ଠିକ୍ ଭାବେ ଚାଲିବା ସମ୍ଭବ ହୋଇପାରୁ ନାହିଁ। ତେଣୁ ଖାଲି ପଡ଼ିଥିବା ବିଭିନ୍ନ ପଦ ପଦବୀକୁ ପୂରଣ କରିବାକୁ ସାଧାରଣରେ ଦାବି ହେଉଛି। ଏ ସଂକ୍ରାନ୍ତରେ ତହସିଲଦାର ଜେ. କଳ୍ପନାଙ୍କୁ ପଚାରିବାରେ ପଦବୀଗୁଡିକ ପୂରଣ ଲାଗି ଜିଲା ପ୍ରଶାସନକୁ ଅବଗତ କରାଯାଇଛି ବୋଲି କହିଥିଲେ।
