ସମସ୍ତଙ୍କର ସ୍ବପ୍ନ ଥାଏ ନିଜ ଘର ସବୁଠୁ ସୁନ୍ଦର ହେଉ। ଘର ନିକଟରେ ବଗିଚା, ସୁଇମିଂ ପୁଲ୍ ଆଦି ରହି ଶୋଭାବର୍ଦ୍ଧନ କରୁ। ଖାସ୍ ଏଥିପାଇଁ ତ ଲୋକେ ସ୍ବପ୍ନର ଘରଟିଏ ପାଇଁ ଜୀବନସାରା ରୋଜଗାର କରିଥିବା ଟଙ୍କା ଏଥିରେ ହିଁ ଖର୍ଚ୍ଚ କରିଥାନ୍ତି।
ଠିକ୍ ସେମିତି ଯୁକ୍ତରାଷ୍ଟ୍ର ଆମେରିକାରେ ରହୁଥିବା ଏକ ଦମ୍ପତିଙ୍କ କ୍ଷେତ୍ରରେ ଘଟିଛି। ଏହି ଦମ୍ପତି ମନ ପସନ୍ଦର ଏକ ପ୍ରାକୃତିକ ସୁଇମିଂ ପୁଲ୍ ତିଆରି କରିଛନ୍ତି। ଏହାକୁ ତିଆରି କରିବା ପାଇଁ ପ୍ରାୟ ୨ ବର୍ଷ ଲାଗିଛି। ଏଥିରେ ୧୮ ହଜାର ପାଉଣ୍ଡ ଅର୍ଥାତ୍ ୧୭ ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହୋଇଛି।
ଚେଲ୍ଟନହାମ୍ରେ ରହୁଥିବା ୫୬ ବର୍ଷୀୟ ଜନ ଏଡଓ୍ବାଡ୍ ଏବଂ ତାଙ୍କର ୫୫ ବର୍ଷୀୟ ସ୍ତ୍ରୀ କ୍ୟାରୋଲିନ୍ ତିଆରି କରିଥିବା ପୁଲରେ କେମିକାଲ ଏବଂ କ୍ଲୋରିନ୍ର ବ୍ୟବହାର ଆଦୌ କରନ୍ତି ନାହିଁ। ଏହି ପୁଲ୍ର ଡିଜାଇନ ଏମିତି ହୋଇଛି କି ଏହାକୁ ସଫା କରିବାକୁ ପଡ଼େ ନାହିଁ। ଗଛର ଚେର ଦେଇ ପାଣି ଆପଣାଛାଏଁ ସଫା ହୋଇଥାଏ। ପୁଲ୍ର ଲମ୍ବ ୪୫ ଫୁଟ ଏବଂ ଚଉଡ଼ା ୩୦ ଫୁଟ। ଗଭୀର ୭.୫ ଫୁଟ ରହିଛି।
୨୦୧୮ରେ ଏହି ଦମ୍ପତି ଏକ ଡିଭିଡି ଦେଖି ପୁଲ୍ର ନିର୍ମାଣ କରିଥିଲେ। ପୁଲଟି ଦେଖିବାକୁ ଖୁବ୍ ମନୋରମ। ଜନ କୁହନ୍ତି, ଏହି ପୁଲ୍କୁ ତାଙ୍କ ସମ୍ପର୍କୀୟମାନେ ପାର୍ଟି ପାଇଁ ବ୍ୟବହାର କରିଥାନ୍ତି। ପୁଲର ଚତୁଃପାର୍ଶ୍ୱରେ ୧୫୦୦ ପ୍ରକାରର ଗଛ ରହିଛି। ପଶୁପକ୍ଷୀ ମଧ୍ୟ ରହିଛନ୍ତି। ଯାହା ଲୋକଙ୍କୁ ଆକର୍ଷିତ କରୁଛି। ପୁଲ୍ର ପାଣି ସର୍ବଦା ପରିଷ୍କାର ରହିଥାଏ। ପାଣିର ଶୁଦ୍ଧତା ମଧ୍ୟ ଦମ୍ପତି କିଛିଦିନ ଅନ୍ତରରେ ଯାଞ୍ଚ କରିଥାନ୍ତି।
