ନୂଆଦିଲ୍ଲୀ,୬।୯(ପି.ଟି.): ଶିକ୍ଷା କ୍ଷେତ୍ରରେ ସଂସ୍କାର ଆଣିବା ସହ ଗଣିତ ଜ୍ଞାନକୁ ସହଜ ଓ ବୋଧଗମ୍ୟ ଉପାୟରେ ପିଲାମାନଙ୍କୁ ଜ୍ଞାନ ପ୍ରଦାନ କରିଥିବା ଦେଶର ବିଭିନ୍ନ ପ୍ରନ୍ତର ୪୭ଜଣ ଶିକ୍ଷକଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ଶନିବାର ଗୁରୁ ଦିବସ ଅବସରରେ ଜାତୀୟ ଶିକ୍ଷକ ପୁରସ୍କାର ପ୍ରଦାନ କରିଛନ୍ତି। ଗୋଟିଏ ବିଦ୍ୟାଳୟର ଉନ୍ନତ ଭିିତ୍ତିଭୂମି, ବହୁମୂଲ୍ୟ ପାଠ୍ୟ ଉପକରଣ ଯେ, ବିଦ୍ୟାଳୟକୁ ପ୍ରଶଂସିତ କରିଥାଏ ତା’ ନୁହେଁ ବରଂ ଏଥିପାଇଁ ଶିକ୍ଷକମାନଙ୍କ ଭୁମିକା ଗୁରୁତ୍ୱପୂର୍ଣ୍ଣ ରହିଥାଏ। ଶିକ୍ଷକମାନେ ହିଁ ଜ୍ଞାନର ଭିତ୍ତିଭୂମି ଏବଂ ଛାତ୍ରମାନଙ୍କ ମଧ୍ୟରେ ଉତ୍ତମ ସ୍ବଭାବ ସୃଷ୍ଟି କରିଥାନ୍ତି ବୋଲି ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି।
ଭର୍ଚୁଆଲ ସମ୍ମାନ ଉତ୍ସବରେ ଯୋଗଦେଇ କୋବିନ୍ଦ କହିଥିଲେ ଯେ ସମ୍ପ୍ରତି କୋଭିଡ୍-୧୯ ମହାମାରୀ ସମୟରେ ସମସ୍ତ ସ୍କୁଲ୍ କଲେଜ ବନ୍ଦ ରହିଛି। ଏହା ସତ୍ତ୍ବେ ଡିଜିଟାଲ ପଦ୍ଧତିରେ ସମସ୍ତ ଛାତ୍ରୀଛାତ୍ରଙ୍କ ନିକଟରେ ଶିକ୍ଷା କିପରି ପହଞ୍ଚତ୍ ପାରିବ ସେନେଇ ନିରନ୍ତର ପ୍ରଚେଷ୍ଟା ଜାରି ରହିଛି। ଶିକ୍ଷା ମନ୍ତ୍ରଣାଳୟ ପକ୍ଷରୁ ଚଳିତ ବର୍ଷ ପୁରସ୍କାର ପାଇଁ ଅନ୍ଲାଇନ୍ ମାଧ୍ୟମରେ ଶିକ୍ଷକମାନଙ୍କ ଠାରୁ ଆବେଦନ ଆହ୍ବାନ କରାଯାଇଥିଲା। ପ୍ରଥମ ପର୍ଯ୍ୟାୟ ଯାଞ୍ଚ ଜିଲାସ୍ତରରେ ଜିଲା ମନୋନୟନ କମିଟି ଦ୍ୱାରା କରାଯାଇଥିଲା। ଜାତୀୟ ପୁରସ୍କାର ପାଇଁ ମନୋନୀତ ଶିକ୍ଷକମାନେ କେବଳ ଗୁଣାତ୍ମକ ଶିକ୍ଷା ନୁହେଁ ବରଂ ସେମାନେ ଛାତ୍ରୀଛାତ୍ରଙ୍କ ଜୀବନ ଶୈଳୀରେ ଉନ୍ନତି ଆଣିବା ସହ ସମାଜ ପ୍ରତି ସେମାନଙ୍କର ପ୍ରତିବଦ୍ଧତା ସମ୍ପର୍କରେ ଅବଗତ କରାଇବାରେ ପ୍ରମୁଖ ଭୂମିକା ଗ୍ରହଣ କରିପାରିଛନ୍ତି। ବିଶେଷକରି ବିଦ୍ୟାଳୟଗୁଡ଼ିକରେ ଛାତ୍ର ଅନୁପସ୍ଥିତ ହାର କମାଇବା ସହ ଉତ୍ତମ ଏବଂ ଶୈକ୍ଷିକ ବାତାବରଣ ମାଧ୍ୟମରେ ଶିକ୍ଷାଦାନ କରିବାରେ ପୁରସ୍କୃତ ହୋଇଥିବା ଶିକ୍ଷକମାନେ ବେଶ୍ ସହାୟକ ହୋଇପାରିଛନ୍ତି ବୋଲି କେନ୍ଦ୍ର ଶିକ୍ଷାମନ୍ତ୍ରୀ ରମେଶ ପୋଖରିୟାଲ୍ ନିଶଙ୍କ କହିଛନ୍ତି।
