ଭୁବନେଶ୍ୱର,୧୭।୩(ସ୍ପୋଟର୍ସ ବ୍ୟୁରୋ): ସୁଶ୍ରୀ ଦିବ୍ୟଦର୍ଶନୀ ପ୍ରଧାନଙ୍କ ଚମତ୍କାର ବ୍ୟାଟିଂ ଏବଂ ଅଧିନାୟିକା ମଧୁସ୍ମିତା ବେହେରାଙ୍କ ୫ ଉଇକେଟ ସଫଳତା ବଳରେ ଓଡ଼ିଶା ସୁରଟ୍ର ସି.କେ. ପିଥାଓ୍ବାଲା ଗ୍ରାଉଣ୍ଡରେ ଚାଲିଥିବା ଜାତୀୟ ସିନିୟର ଏକଦିବସୀୟ ମହିଳା କ୍ରିକେଟ ଟୁର୍ନାମେଣ୍ଟର ମଙ୍ଗଳବାର ଅନୁଷ୍ଠିତ ମ୍ୟାଚରେ ତ୍ରିପୁରାକୁ ୪୩ ରନରେ ପରାସ୍ତ କରିଛି। ପୂର୍ବ ମ୍ୟାଚରେ ହାଇଦ୍ରାବାଦକୁ ୯ ଉଇକେଟରେ ହରାଇଥିବା ଓଡ଼ିଶାର ଏହା କ୍ରମାଗତ ଦ୍ୱିତୀୟ ବିଜୟ।
ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଓଡ଼ିଶା ୫୦ ଓଭରରେ ୮ ଉଇକେଟ ହରାଇ ୧୬୩ ରନ କରିଥିଲା। ଟପ୍ ଅର୍ଡରର ବ୍ୟାଟ୍ସଓମ୍ୟାନମାନେ ପ୍ରଭାବହୀନ ରହିଥିବାବେଳେ ଅଲରାଉଣ୍ଡର ସୁଶ୍ରୀ ୮୨ ବଲ୍ରୁ ୫୯ ରନରେ ଅପରାଜିତ ରହି ଦଳକୁ ସମ୍ମାନଜନକ ସ୍କୋରରେ ପହଞ୍ଚାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ। ମାଥୁରୀ ମେହେଟା ୫୨ ବଲ୍ରୁ ୨୯ ଓ କାଜଲ ଜେନା ୫୯ ବଲ୍ରୁ ୨୮ ରନ କରିଥିଲେ। ବିପକ୍ଷ ଦଳର ଏ.ବି. ଦାସ ସର୍ବାଧିକ ୩ଟି ଉଇକେଟ ନେଇଥିଲେ। ୧୬୪ ରନ ବିଜୟ ଲକ୍ଷ୍ୟର ପିଛା କରିଥିବା ତ୍ରିପୁରା ମଧୁସ୍ମିତାଙ୍କ ଚମତ୍କାର ବୋଲିଂ ଯୋଗୁ ୪୮.୨ ଓଭରରେ ୧୨୦ ରନରେ ସୀମିତ ରହି ଯାଇଥିଲା। ଦଳ ପକ୍ଷରୁ ମୌଚାଲି ଦେବନାଥ ସର୍ବାଧିକ ୩୧ ଓ ଏନ.ଏନ. ଦେବନାଥ ୨୨ ରନ କରିଥିଲେ। ଓଡ଼ିଶା ଅଧିନାୟିକା ମଧୁସ୍ମିତା ନିଜ ୯ ଓଭର ସ୍ପେଲ୍ରେ ୨ଟି ମେଡେନ ନେବାସହ ମାତ୍ର ୧୫ ରନ ଦେଇ ୫ ଉଇକେଟ ଅକ୍ତିଆର କରିଥିଲେ। ସୁଜାତା ମଲିକଙ୍କୁ ୨ଟି ଓ ରସନାରା ପରବିନଙ୍କୁ ଗୋଟିଏ ଉଇକେଟ ମିଳିଥିଲା। ଓଡ଼ିଶା ଏହାର ପରବର୍ତ୍ତୀ ମ୍ୟାଚ ୧୮ ତାରିଖରେ ଛତିଶଗଡ଼ ବିପକ୍ଷରେ ଖେଳିବ।
ସଂକ୍ଷିପ୍ତ ସ୍କୋର
ଓଡ଼ିଶା ୫୦ ଓଭରରେ ୧୬୩/୮(ସୁଶ୍ରୀ ଦିବ୍ୟଦର୍ଶିନୀ-୫୯*, ମାଧୁରୀ ମେହେଟା-୨୯, କାଜଲ ଜେନା-୨୮, ଏ.ବି. ଦାସ-୩/୧୪)। ତ୍ରିପୁରା ୪୮.୨ ଓଭରରେ ୧୨୦/ଅଲଆଉଟ( ମୌଚାଲି ଦେବନାଥ-୩୧, ମଧୁସ୍ମିତା-୫/୧୫, ସୁଜାତା ୨/୨୧)।
