ବଅଁରପାଳ/ ଢେଙ୍କାନାଳ ଅଫିସ,୪।୩(ଡି.ଏନ.ଏ.) – କଟକ-ସମ୍ବଲପୁର ୫୫ନଂ. ଜାତୀୟ ରାଜପଥର ଉନ୍ନତୀକରଣ କାର୍ଯ୍ୟ ଅନୁଗୋଳ ଜିଲାରେ ଶେଷ ହେଉ ନ ଥିବାରୁ ଏହାର ପ୍ରତିବାଦରେ ଢେଙ୍କାନାଳ ଏମ୍ପି ମହେଶ ସାହୁଙ୍କ ନେତୃତ୍ୱରେ ଗୁରୁବାର ବଅଁରପାଳଠାରେ ଆନ୍ଦୋଳନ କରାଯାଇଥିଲା। ସକାଳୁ ସନ୍ତ୍ରୀ ଛକଠାରେ ଏମ୍ପିଙ୍କ ସହ ସ୍ଥାନୀୟ ବଜାର କମିଟିର ସଦସ୍ୟମାନେ ରାଜପଥ ଅବରୋଧ କରିଥିଲେ। ଫଳରେ ରାଜପଥରେ ଗାଡ଼ି ଚଳାଚଳ କେଇ ଘଣ୍ଟା ଧରି ଠପ୍ ହୋଇଯାଇଥିଲା। ଦାବି ପୂରଣ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ବଜାର କମିଟି ପକ୍ଷରୁ କୁହାଯାଇଥିଲା। ଖବରପାଇ ଘଟଣାସ୍ଥଳରେ ଜିଲା ପ୍ରଶାସନିକ ଅଧିକାରୀ ଓ ପୋଲିସ ପହଞ୍ଚି ବୁଝାଶୁଝା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ସେହିପରି ଏମ୍୍ପି ମହେଶ ସାହୁଙ୍କ ଅହ୍ବାନକ୍ରମେ ଢେଙ୍କାନାଳ ସକ୍ରିୟ ସଚେତନ ବିକାଶ କ୍ରିୟାନୁଷ୍ଠାନ କମିଟି ପକ୍ଷରୁ ଶ୍ୟାମାଚରଣପୁର ପାସେଞ୍ଜର ହଲ୍ଟରେ ଗୁରୁବାର ସକାଳ ୬ଟାରୁ ପୂର୍ବାହ୍ନ ୧୦ଟା ଯାଏ ରେଳରୋକୋ କରାଯାଇଥିଲା। ରେଲଓ୍ବେର ଅତିରିକ୍ତ ଆଞ୍ଚଳିକ ପ୍ରବନ୍ଧକ ବ୍ରଜେଶ କୁମାର ମିଶ୍ର, ଆର୍ପିଏଫ୍ ଅତିରିକ୍ତ କମିଶନର ସରୋଜ ଦାସ, ଏକଜିକ୍ୟୁଟିଭ୍ ମାଜିଷ୍ଟ୍ରେଟ୍ ପ୍ରମୋଦ ଦଳବେହେରା, ସଦର ଏସ୍ଡିପିଓ ବିକାଶ ବେଉରା, ଟାଉନ ଥାନାଧିକାରୀ ରାଜେନ୍ଦ୍ର ମହାପାତ୍ର, ଡିଇଏମ୍ ସଞ୍ଜୟଦତ୍ତ ମୀନା ପ୍ରମୁଖ ପହଞ୍ଚତ୍ ଆନ୍ଦୋଳନକାରୀଙ୍କ ସହିତ ଆଲୋଚନା କରିଥିଲେ। କ୍ରିୟାନୁଷ୍ଠାନ କମିଟି ଆବାହକ ରୁଦ୍ରାନ୍ତ ଦଳେଇ ଦାବିପତ୍ର ପ୍ରଦାନ କରିଥିଲେ। ଶିକ୍ଷାବିତ୍ ପ୍ରଫେସର ଭବାନୀ ଶଙ୍କର ମିଶ୍ର, ନିତ୍ୟାନନ୍ଦ ମିଶ୍ର, ପୂର୍ବତନ ନଗରପାଳ ସୁରେନ୍ଦ୍ର ମିଶ୍ର, ପ୍ରସନ୍ନ ସାହୁ, ଯୋଗୀନାଥ ମହାନ୍ତି, ଲକ୍ଷ୍ମୀପ୍ରସାଦ ପଟ୍ଟନାୟକ, ଆଇନଜୀବୀ ମନୋରଞ୍ଜନ ପଟ୍ଟନାୟକ, ବସ୍ ମାଲିକ ସଂଘର ରୁଦ୍ରନାରାୟଣ ତ୍ରିପାଠଙ୍କ ସମେତ କ୍ରିୟାନୁଷ୍ଠାନ କମିଟିର ବହୁ ସଦସ୍ୟ ଉପସ୍ଥିତ ଥିଲେ।
