ଭୁବନେଶ୍ୱର, ବାରଙ୍ଗ, ୨୮।୯(ବ୍ୟୁରୋ)- ପ୍ରାଣୀ ଉଦ୍ୟାନ ନନ୍ଦନାକନନ ଅକ୍ଟୋବର ୪ ତାରିଖରେ ଖୋଲିବା ନେଇ କର୍ତ୍ତୃପକ୍ଷ ସୋମବାର ଘୋଷଣା କରିଛନ୍ତି। ଏହାସହ ବଟାନିକାଲ ଗାର୍ଡେନ ମଧ୍ୟ ସେହିଦିନଠାରୁ ଖୋଲାଯିବ। ଦୀର୍ଘ ୭ମାସ ପରେ ନନ୍ଦନକାନନ ଖୋଲିବା ନିଷ୍ପତ୍ତି ଶୁଣି ପର୍ଯ୍ୟଟକ ଓ ବ୍ୟବସାୟୀଙ୍କ କ୍ଷେତ୍ରରେ ଉତ୍ସାହ ଖେଳିଯାଇଛି। କିନ୍ତୁ କର୍ମଚାରୀ ଓ ପର୍ଯ୍ୟଟକଙ୍କ ପାଇଁ କୋଭିଡ୍କୁ ନେଇ ନନ୍ଦନକାନନ କର୍ତ୍ତୃପକ୍ଷ କେତେକ ଗାଇଡ୍ଲାଇନ ଜାରି କରିଛନ୍ତି। ଥଣ୍ଡା, କାଶ, ଜ୍ୱର ଲକ୍ଷଣ ଥିବା ପର୍ଯ୍ୟଟକଙ୍କ ପାଇଁ ପ୍ରବେଶ କଟକଣା ରଖାଯାଇଛି। ପର୍ଯ୍ୟଟକମାନଙ୍କ ପାଇଁ ମାସ୍କ ପନ୍ଧିବା ବାଧ୍ୟତାମୂଳକ କରାଯାଇଛି। ଏହାସହ ପ୍ରବେଶ ପଥ ପାଖରେ ପର୍ଯ୍ୟଟକଙ୍କ ସମ୍ପୂର୍ଣ୍ଣ ଶରୀରକୁ ସାନିଟାଇଜ୍ ବ୍ୟବସ୍ଥା କରାଯିବ। ପର୍ଯ୍ୟଟକମାନେ ସାଙ୍ଗରେ ଜରୁରୀ ସାମଗ୍ରୀ ବ୍ୟତୀତ ଅନ୍ୟ କିଛି ଭିତରକୁ ନେଇପାରିବେ ନାହିଁ। ପର୍ଯ୍ୟଟକମାନେ ଜନ୍ତୁ ଏନକ୍ଲୋଜେର ଆଗରେ ଥିବା ବ୍ୟାରିକେଡ୍କୁ ଛୁଇଁବେ ନାହିଁ ଏବଂ ସାମାଜିକ ଦୂରତ୍ୱକୁ ବଜାୟ ରଖି ପଶୁପକ୍ଷୀଙ୍କୁ ଦେଖିବେ। ନନ୍ଦନକାନନର ବିଭିନ୍ନ ସ୍ଥାନରେ ପର୍ଯ୍ୟଟକଙ୍କ ପାଇଁ ହାତସଫା ନିମନ୍ତେ ହ୍ୟାଣ୍ଡଓ୍ବାଶ ଓ ସାନିଟାଇଜର ରଖାଯିବ। ଅନ୍ୟପକ୍ଷେ କର୍ମଚାରୀମାନଙ୍କ ପାଇଁ ଗ୍ଲୋବ୍ସର ବ୍ୟବସ୍ଥା କରାଯିବାକୁ ନନ୍ଦନକାନନ ପକ୍ଷରୁ ହୋଇଥିବା ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏହିଭଳି ନିୟମ ବଟାନିକାଲ ପାଇଁ ଲାଗୁ ହେବାକୁ ଥିବାବେଳେ ବଣଭୋଜିକୁ ଏବେ ବନ୍ଦ କରାଯାଇଥିବା ଜଣାପଡିଛି। ତେବେ ନନ୍ଦନକାନନ ଖୋଲିଲେ ଏକାସଙ୍ଗେ କେତେ ସଂଖ୍ୟକ ପର୍ଯ୍ୟଟକ ପ୍ରବେଶ ଅନୁମତି ମିଳିବ ତାହା ଏବେ ସୁଦ୍ଧା ଜଣାପଡି ନାହିଁ। ପ୍ରଥମଦିନର ପର୍ଯ୍ୟଟକ ସଂଖ୍ୟାକୁ ଆକଳନ କରି ପୁନର୍ବାର ନିଷ୍ପତ୍ତି ନିଆଯିବ ବୋଲି ନନ୍ଦନକାନନ ସହକାରୀ ନିର୍ଦ୍ଦେଶକ ଅମୂଲ୍ୟ କୁମାର ପରିଡ଼ା କହିଛନ୍ତି।
