ମୁମ୍ବାଇ,୨୪।୫ : ସମସ୍ତ ଦଳ ବିଧାନସଭା ଓ ଲୋକସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ବିରୋଧୀ ଦଳର ଏକମାତ୍ର ଲକ୍ଷ୍ୟ ହେଉଛି ଭାଜପାକୁ ପରାସ୍ତ କରିବା। ଏହି ବିଷୟରେ ମହାରାଷ୍ଟ୍ର ପ୍ରଦେଶ କଂଗ୍ରେସ କମିଟିର ଏକ କାର୍ଯ୍ୟନିର୍ବାହୀ ବୈଠକ ଅନୁଷ୍ଠିତ ହୋଇଯାଇଛି। ଯେଉଁଥିରେ ଏନେଇ ଏକ ବିସ୍ତୃତ ଆଲୋଚନା ହୋଇଥିଲା। ଏହି ସମୟରେ ରାଜ୍ୟ କଂଗ୍ରେସ ସଭାପତି ନାନା ପଟୋଲେ ପ୍ରାର୍ଥୀଙ୍କ ଯୋଗ୍ୟତା ଅନୁଯାୟୀ ଆସନ ବଣ୍ଟନ ଉପରେ ଜିଦ ଧରିଥିଲେ।
ଏକ ରିପୋର୍ଟ ଅନୁଯାୟୀ, କୁହାଯାଇଥିଲା ମହାଭିକ୍ସ ଆଘାଡି (ଏମଭିଏ) ର ତିନି ସହଯୋଗୀ ଦଳ କଂଗ୍ରେସ, ଏନସିପି, ୟୁବିଟି ଉଦ୍ଧବ ଠାକରେ ଦଳ ମଧ୍ୟରେ ପ୍ରତି ଦଳ ୧୬ ଆସନରେ ନିର୍ବାଚନ ଲଢ଼ିବା ପାଇଁ ଏକ ଅଘୋଷିତ ଚୁକ୍ତି କରିଛନ୍ତି। ତେବେ ଅଜିତ ପାୱାର ଏଭଳି କୌଣସି ସୂତ୍ରକୁ ଅସ୍ବୀକାର କରିଛନ୍ତି।
ଏମଭିଏ ମେଣ୍ଟରେ ସମସ୍ତ ସହଯୋଗୀ ଏକାଠି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଯୋଗ୍ୟତା ଆଧାରରେ ସିଟ ବଣ୍ଟନ ପାଇଁ ଗୁରୁତ୍ୱାରୋପ କରାଯାଇଛି। ରାଜ୍ୟ କଂଗ୍ରେସ ସଭାପତି ନାନା ପଟୋଲେ କହିଛନ୍ତି ପ୍ରତ୍ୟେକ ଆସନକୁ ପୁଙ୍ଖାନୁପୁଙ୍ଖ ଅଧ୍ୟୟନ କରାଯିବ ଏବଂ ସମାନ ଆଧାରରେ ଆସନ ବଣ୍ଟନ ଉପରେ ଆଲୋଚନା କରାଯିବ। କଂଗ୍ରେସର ସଂକଳ୍ପ ହେଉଛି ଭାଜପାକୁ ପରାସ୍ତ କରିବା ଏବଂ ଏହି ଉଦ୍ଦେଶ୍ୟକୁ ଦୃଷ୍ଟିରେ ରଖି ଆସନ ବଣ୍ଟନ ଚୂଡାନ୍ତ ହେବା ଆବଶ୍ୟକ।
ପଟୋଲେ କହିଛନ୍ତି ୨୦୧୪, ୨୦୧୯ ଏବଂ ବର୍ତ୍ତମାନ ପରିସ୍ଥିତି ମଧ୍ୟରେ ବହୁତ ପାର୍ଥକ୍ୟ ଅଛି। କଂଗ୍ରେସ ଜୁନ ପ୍ରଥମ ସପ୍ତାହରେ ପ୍ରତ୍ୟେକ ଆସନକୁ ସମୀକ୍ଷା କରିବ ଏବଂ ନିଷ୍ପତ୍ତି ନେବ। କଂଗ୍ରେସ ରାଜ୍ୟ ସଭାପତିଙ୍କ ଅନୁସାରେ ମହାରାଷ୍ଟ୍ର ହେଉଛି କଂଗ୍ରେସର ଆଦର୍ଶ ଏବଂ ବିଚାରାଧାରା ରଖିଥିବା ଏକ ରାଜ୍ୟ। କଂଗ୍ରେସ ଏହାର ଜନାଧାର ସଂଖ୍ୟା ବୃଦ୍ଧି କରିଛି। ଗତ ତିନିବର୍ଷ ମଧ୍ୟରେ ସମସ୍ତ ନିର୍ବାଚନରେ ବଡ଼ ବିଜୟ ହାସଲ କରିଛି। ଭାଜପାକୁ ପରାସ୍ତ କରିଛି। ଏହି ସବୁ ତଥ୍ୟକୁ ଧ୍ୟାନରେ ରଖି ସିଟ ବଣ୍ଟନ କରାଯିବା ଜରୁରୀ।
ଏଥି ସହ ଏନସିପି ନେତା ଅଜିତ ପାୱାର ମଙ୍ଗଳବାର କହିଛନ୍ତି, ମହାରାଷ୍ଟ୍ରରେ ଭାଜପା ଜିତିଥିବା ଲୋକସଭା ଆସନ ଉପରେ ପ୍ରଥମେ ଆଲୋଚନା କରାଯିବ। ପରେ ଏମଭିଏ ପ୍ରାର୍ଥୀଙ୍କ ସିଟ ବଣ୍ଟନ ଉପରେ ଆଲୋଚନା କରାଯିବ। ଏମଭିଏ ଆସନ୍ତା ବର୍ଷ ଲୋକସଭା ନିର୍ବାଚନରେ ଶତପ୍ରତିଶତ ଏକଜୁଟ ହୋଇ ପ୍ରତିଦ୍ୱନ୍ଦ୍ୱିତା କରିବ। ଏଥିସହିତ ସେ ସ୍ପଷ୍ଟ କରିଛନ୍ତି ଆସନ ବଣ୍ଟନ ପାଇଁ କୌଣସି ସୂତ୍ର ନାହିଁ। ସେ ତାଙ୍କ ଦଳ ଜିତିଥିବା ଆସନ ବଜାୟ ରଖିବାକୁ ଇଚ୍ଛା ପ୍ରକାଶ କରିଥିଲେ। କିନ୍ତୁ ଏହା ଉପରେ ଆଉ କୌଣସି ଆଲୋଚନା ହୋଇ ନାହିଁ। ଆଲୋଚନା ପରେ ତିନି ଦଳର ନେତାଙ୍କୁ ମନୋନୀତ କରାଯିବ।
୨୦୧୯ ରେ ମହାରାଷ୍ଟ୍ରର ୪୮ ଟି ଲୋକସଭା ଆସନରୁ ୨୩ରେ ଭାଜପା ଜିତିଥିଲା। ୧୮ ଆସନ ତତ୍କାଳୀନ ସହଯୋଗୀ ଶିବସେନା ଜିତିଥିଲା।
