ବହ୍ମପୁର ଅଫିସ,୨୩।୩: ଗଞ୍ଜାମ ଜିଲା ହିଞ୍ଜିଳିକାଟୁ ଥାନା ଅନ୍ତର୍ଗତ ପିତ୍ତଳ ନିକଟ ରାମଚନ୍ଦ୍ରପୁର ଛକରେ ଥିବା ମା’ଖମ୍ବେଶ୍ୱର ଫାଷ୍ଟଫୁଡ୍ ଦୋକାନରେ ହୋଇଥିବା ଗୋଷ୍ଠୀସଂଘର୍ଷରେ ଜଣେ ନାବାଳକ ସମେତ ୪ ଭାଇଙ୍କ ମୃତ୍ୟୁ ଘଟିଛି। ଏହି ବୀଭତ୍ସ ହତ୍ୟାକାଣ୍ଡରେ ନରେନ୍ଦ୍ରପୁରର ମଙ୍ଗୁଳୁ ସ୍ବାଇଁଙ୍କ ୩ ପୁଅ ରାଜା ସ୍ବାଇଁ(୨୮), ଶମ୍ଭୁ ସ୍ବାଇଁ (୨୫), ପାଣ୍ଡବ ସ୍ବାଇଁ (୨୩) ଓ ରାଜାଙ୍କ ମାଉସୀ ପୁଅ ଭାଇ ଚନ୍ଦନ ସ୍ବାଇଁଁ(୧୬)ଙ୍କ ମୃତ୍ୟୁ ଘଟିଥିବା ବେଳେ ଆକ୍ରମଣକାରୀ ଗୋଷ୍ଠୀର ସାଧୁ ଓରଫ ଅମିୟ ସ୍ବାଇଁ ଆହତ ହୋଇ ବ୍ରହ୍ମପୁର ଏମ୍କେସିଜି ମେଡିକାଲରେ ଚିକିତ୍ସିତ ହେଉଛନ୍ତି। ତାଙ୍କୁ ସେଠାରେ ଗୋଟିଏ ସେକ୍ସନ ପୋଲିସ ଜଗି ରହିଛି। ଏନେଇ ଅମିୟ ସ୍ବାଇଁଙ୍କ ପ୍ରତିକ୍ରିୟା ନେବା ବେଳେ ସେ କହିଛନ୍ତି, ମଙ୍ଗଳବାର ରାତିରେ ମୁଁ ଓ ମୋର କେତେଜଣ ସାଙ୍ଗ ନରେନ୍ଦ୍ରପୁର ଛକରେ ଛିଡା ହୋଇଥିଲୁ। ସେହି ରାସ୍ତା ଦେଇ ଏକ ଦମ୍ପତି ବାଇକରେ ଯାଉଥିବା ବେଳେ ସେଠାରେ ଏକ ଦୁର୍ଘଟଣା ଘଟିଥିଲା। ଫଳରେ ମହିଳା ଜଣଙ୍କ ଗାଡିରୁ ପଡ଼ି ଯାଇଥିଲେ। ମୁଁ ସମ୍ପୃକ୍ତ ମହିଳାଙ୍କୁ ଉଦ୍ଧାର କରିବା ବେଳେ ସେଠାରେ ଫାଷ୍ଟଫୁଡ୍ ଦୋକାନ କରିଥିବା ରାଜା ସ୍ବାଇଁ ମୋତେ କମେଣ୍ଟ ମାରିଥିଲେ। ଏହାକୁ ନେଇ ସେଠାରେ ଝଗଡ଼ା ହୋଇଥିଲା। ସେଠାରେ କେହିଜଣେ ମୋତେ ଆକ୍ରମଣ କରିବାରୁ ମୁଁ ଅଚେତ ହୋଇପଡିଥିଲି। ମୁଁ ଘଟଣା ସମ୍ପର୍କରେ କିଛି ଜାଣି ନାହିଁ। ମୋର ଚେତା ଫେରିବା ପରେ ମୁଁ ହସ୍ପିଟାଲ ବେଡ୍ରେ ଥିବା ଜାଣିବାକୁ ପାଇଥିଲି। ବୁଧବାର ସକାଳେ ମୁଁ ପୋଲିସଠାରୁ ଖବର ପାଇଲି ଯେ, ମଙ୍ଗଳବାର ରାତ୍ରି ଗୋଷ୍ଠୀସଂଘର୍ଷରେ ୪ ଜଣଙ୍କର ମୃତ୍ୟୁ ଘଟିଛି। ଅନ୍ୟପଟେ ଏମ୍କେସିଜି ମେଡିକାଲରେ ମଙ୍ଗଳବାର ବିଳମ୍ବିତ ରାତ୍ରିରୁ ଉପରୋକ୍ତ ୪ ଯୁବକଙ୍କ ମୃତଦେହ ସଂରକ୍ଷଣ କକ୍ଷରେ ଥିଲା। ବୁଧବାର ସକାଳେ ମୃତକଙ୍କ ପରିବାର, ଆସ୍କା ଏସ୍ଡିପିଓ ଉମାଶଙ୍କର ସିଂ ଓ ଅନ୍ୟାନ୍ୟ ଥାନାଧିକାରୀଙ୍କ ଉପସ୍ଥିତିରେ ମୃତଦେହ ବ୍ୟବଚ୍ଛେଦ କରାଯାଇଥିଲା।
