ବନ୍ତଳା,୨୩।୧୧ (ସୁଶିତ ସାହୁ): ପରକୀୟା ପ୍ରୀତିରୁ ଘଟିଛି ହତ୍ୟାକାଣ୍ଡ। ଜଣେ ଯୁବକଙ୍କୁ ଠେଙ୍ଗାରେ ପିଟି ପିଟି ହତ୍ୟା କରାଯାଇଛି । ଅନୁଗୋଳ ବ୍ଲକ ବନ୍ତଳା ଥାନା ବଡ଼କନ୍ତକୁଳ ପଞ୍ଚାୟତ ନୂଆକ୍ଷେତା-ନୂଆରାଇଗୁଡ଼ା ରାସ୍ତାର ଧାନମଞ୍ଚା ପାଖରେ ଘଟିଛି ଏହି ହତ୍ୟାକାଣ୍ଡ। ମୃତକ ହେଲେ ନୂଆକ୍ଷେତା ଗାଁର ପ୍ରମୋଦ ସାହୁଙ୍କ ପୁଅ ଟିକନ ସାହୁ (୪୮)। ଶନିବାର ସକାଳେ ଅଭିଯୋଗ ପାଇ ବନ୍ତଳା ପୋଲିସ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି। ୨ ଜଣଙ୍କୁ ଅଟକ ରଖି ପଚରାଉଚରା କରୁଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନୂଆକ୍ଷେତା ଗାଁର ଟିକନ ପଡ଼ୋଶୀ ଗ୍ରାମର ଜନୈକା ବିଧବା ମହିଳାଙ୍କ ସହ ପ୍ରେମ ସମ୍ପର୍କ ରଖିଥିଲେ। ଟିକନଙ୍କ ଏଭଳି ଅବୈଧ ସମ୍ପର୍କକୁ ବିଧବାଙ୍କ ୨ ପୁତୁରା ବିରୋଧ କରି ଆସୁଥିଲେ। ସେମାନେ ଟିକନଙ୍କୁ ବହୁବାର ତାଗିଦ୍ ମଧ୍ୟ କରିଥିଲେ। ଟିକନ ଗତ ୫ ବର୍ଷ ହେବ ଗାଁ ଛାଡ଼ି ସ୍ତ୍ରୀ ଓ ପିଲାଙ୍କୁ ନେଇ ଅନୁଗୋଳ ତୁରଙ୍ଗ ଅଞ୍ଚଳରେ ଘରଭଡ଼ା ନେଇ ରହୁଥିଲେ ମଧ୍ୟ ଗାଁକୁ ଯିବାଆସିବା କରୁଥିଲେ। ସମ୍ପୃକ୍ତା ବିଧବାଙ୍କ ସହ ପୂର୍ବପରି ସମ୍ପର୍କ ରଖିଥିଲେ। ଶୁକ୍ରବାର ଟିକନ ରାଶନ ଚାଉଳ ପାଇଁ ଗାଁ ନୂଆକ୍ଷେତାକୁ ଆସିଥିବା ବେଳେ ଅପରାହ୍ନ ୫ଟାରେ ଗୁରୁତର ଅବସ୍ଥାରେ ନୂଆକ୍ଷେତା-ରାଇଗୋଡ଼ା ରାସ୍ତା ଚକାବର ନିକଟରେ ପଡ଼ିଥିବା ସାନଭାଇ ମାନସ ସାହୁ ଖବର ପାଇଥିଲେ। ସେ ତୁରନ୍ତ ଘଟଣାସ୍ଥଳରେ ପହଞ୍ଚି ଟିକନଙ୍କୁ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଥିଲା। ହେଲେ ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଅବସ୍ଥାରେ ଟିକନଙ୍କ ମୃତ୍ୟୁ ହୋଇଥିଲା। ଏ ନେଇ ମୃତକଙ୍କ ସ୍ତ୍ରୀ ସୁନିତା ସାହୁ ଶନିବାର ସକାଳ ୫ଟା ୩୦ରେ ବନ୍ତଳା ଥାନାରେ ଲିଖିତ ଅଭିଯୋଗ କରିଥିଲେ। ଏହାପରେ ବନ୍ତଳା ଥାନା ଅଧିକାରୀ ନଟବର ନନ୍ଦଙ୍କ ନେତୃତ୍ୱରେ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ହତ୍ୟାକାଣ୍ଡରେ ବ୍ୟବହୃତ ଠେଙ୍ଗା, ୨ଟି ବାଇକ୍, ରକ୍ତଛିଟା ଲାଗିଥିବା ମାଟି ନମୁନା, ହଳେ ଚ଼ପଲ ଜବତ କରାଯାଇଥିଲା। ଗୋଟିଏ ବାଇକ୍ ଡିକିରୁ ମିଳିଥିବା ଆଧାରକାର୍ଡ, ପାରିପାର୍ଶ୍ୱିକ ସ୍ଥିତି, ସ୍ଥାନୀୟ ଲୋକଙ୍କ ସୂଚନାକୁ ଭିତ୍ତିକରି ପୋଲିସ ସନ୍ଦେହରେ ୨ ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛି। ମୃତଦେହ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯିବା ସହ ଅଧିକ ତଦନ୍ତ ଜାରି ରହିଥିବା ଥାନା ଅଧିକାରୀ ନନ୍ଦ ସୂଚନା ଦେଇଛନ୍ତି।
