ମୁମ୍ବାଇ,୨୮।୬: ଦେଶରେ କରୋନା ଭାଇରସ୍ ସଂକ୍ରମଣର ଦ୍ୱିତୀୟ ଲହର ଆତଙ୍କ ଖେଳାଇଥିବା ବେଳେ ବର୍ତ୍ତମାନ ଦୈନିକ ସଂକ୍ରମଣରେ ହ୍ରାସ ଘଟିଛି। କିନ୍ତୁ ଏବେ ବି ସଙ୍କଟ ଜାରି ରହିଛି। କାରଣ ଆଗକୁ ସମ୍ଭାବ୍ୟ ତୃତୀୟ ଲହର ଆସିପାରେ ବୋଲି ବିଶେଷଜ୍ଞ ମତ ଦେଇଛନ୍ତି। ଆଉ ଏହି ଲହର ପିଲାଙ୍କ ପ୍ରତି ଅତ୍ୟନ୍ତ ବିପଦ ବୋଲି କୁହାଯାଉଛି। ଇତିମଧ୍ୟରେ ମୁମ୍ବାଇରୁ ଏକ ଖୁସି ଖବର ସାମ୍ନାକୁ ଆସିଛି। ଏଠାରେ ୫୦ ପ୍ରତିଶତ ପିଲାଙ୍କ ନିକଟରେ ଆଣ୍ଟିବଡି ମିଳିଥିବା ଜଣାପଡ଼ିଛି। ସୂଚନାଯୋଗ୍ୟ, ନିକଟରେ ବୃହନମୁମ୍ବାଇ ମହାନଗର ପାଳିକା(ବିଏମ୍ସି) ପକ୍ଷରୁ ସେରୋ ସର୍ଭେ କରାଯାଇଥିଲା। ଯେଉଁଥିରେ ୫୦ ପ୍ରତିଶତରୁ ଊର୍ଦ୍ଧ୍ୱ ପିଲାଙ୍କ ନିକଟରେ ଆଣ୍ଟିବଡି ସୃଷ୍ଟି ହୋଇଛି। ପୂର୍ବ ତୁଳନାରେ ପିଲାମାନଙ୍କଠାରେ ଆଣ୍ଟିବଡି ବୃଦ୍ଧି ହୋଇଥିବା ଜଣାପଡ଼ିଥିଲା। ଏହି ସେରୋ ସର୍ଭେ ୨୦୨୧ ଏପ୍ରିଲ ୧ରୁ ଜୁନ ୧୫ଯାଏ ହୋଇଥିଲା। ମୁମ୍ବାଇର ୨୪ଟି ଓ୍ବାର୍ଡରୁ ମୋଟ ୨,୧୭୧୬ ରକ୍ତ ନମୁନା ସଂଗ୍ରହ କରାଯାଇଥିଲା। ଯେଉଁଥିରୁ ଜଣାପଡ଼ିଛି ଯେ, ୫୦ପ୍ରତିଶତରୁ ଊର୍ଦ୍ଧ୍ୱ ପିଲା କରୋନାରେ ଆକ୍ରାନ୍ତ ହୋଇସାରିଛନ୍ତି। ସେରୋ ସର୍ଭେରେ ମୋଟ ପଜିଟିଭ୍ ହାର ୫୧.୧୮ପ୍ରତିଶତ ମିଳିଥିଲା। ସେହିପରି ୧୦ରୁ ୧୪ବର୍ଷ ବୟସର ପିଲାମାନଙ୍କଠାରେ ସର୍ବାଧିକ ସିରୋ ପଜିଟିଭ୍ ୫୩.୪୩ ରହିଥିଲା। ଅନ୍ୟପଟେ ୧ରୁ ୪ ବର୍ଷର ପିଲାଙ୍କଠାରେ ୫୧.୦୪ ପ୍ରତିଶତ, ୫ରୁ ୯ବର୍ଷର ପିଲାଙ୍କଠାରେ ୪୭.୩୩ ପ୍ରତିଶତ ଓ ୧୫ରୁ ୧୮ବର୍ଷର ପିଲାଙ୍କଠାରେ ୫୧.୩୯ ପ୍ରତିଶତ ସେରୋ ପଜିଟିଭ୍ ମିଳିଥିବା ନେଇ ବିଏମ୍ସି ସୂଚନା ଦେଇଛି।
