ଗଞ୍ଜାମ,୧୧।(ବିଦ୍ୟାଧର ସାହୁ ): ଗଞ୍ଜାମ ମହାବିଦ୍ୟାଳୟ ପ୍ରତିଷ୍ଠା ଦିବସରେ ଉଦଘାଟନ ହୋଇଥିବା ନୂତନ ସମ୍ମିଳନୀ କକ୍ଷର ଫଳକରେ ବ୍ରହ୍ମପୁର ଏମପିଙ୍କ ନାମ ନଥିବା ନେଇ ଚର୍ଚ୍ଚା ଜୋର ଧରିଛି । ଏହି ଘଟଣା ଏମପିଙ୍କ ସମର୍ଥକ ମଧ୍ୟରେ ଘୋର ଅସନ୍ତୋଷ ଦେଖା ଦେଇଛି ।
ଗତ ୭ ତାରିଖରେ ୫୮ ତମ ପ୍ରତିଷ୍ଠା ଉତ୍ସାବ ପାଳିତ ହୋଇଥିଲା । ସେହି ଦିନ ହିଁ ନିର୍ମାଣ ହୋଇଥିବା ନୂତନ ସମ୍ମିଳନୀ କକ୍ଷ ଉଦଘାଟନ ହୋଇଥିଲା । ମିଳିଥିବା ସୂଚନା ଅନୁସାରେ ଗୋଟାଏ ପଟେ ଏହି ଉତ୍ସାବ ପାଇଁ ବ୍ରହ୍ମପୁର ଏମପି ଡ଼ଃ ପ୍ରଦୀପ ପାଣିଗ୍ରାହୀ ନାମ ନିମନ୍ତ୍ରଣ ପତ୍ରରେ ନଥିବା ବେଳେ ଉଦଘାଟନ ହୋଇଥିବା ନୂତନ ସମିଳନୀ କକ୍ଷ ଫଳକରେ ମଧ୍ୟ ଏମପିଙ୍କ ନାମ ନଥିବା ଦେଖିବାକୁ ମିଳିଛି ।
ଯାହାକୁ ନେଇ ଏମପିଙ୍କ ସମର୍ଥକ ମଧ୍ୟରେ ରେ ଘୋର ଅସନ୍ତୋଷ ଦେଖିବାକୁ ମିଳିଛି । ଅନ୍ୟପଟେ କଲେଜ ପରିଚାଳନା କମିଟି ମୁଖ୍ୟ ତଥା ଛତ୍ରପୁର ଉପ ଜିଲାପାଳଙ୍କ ଫଳକରେ ନାମ ଥିଲେ ମଧ୍ୟ କାର୍ଯ୍ୟକ୍ରମରେ ଅନୁପସ୍ଥିତ ଥିବା ଦେଖିବାକୁ ମିଳିଥିଲା । ଏଥିସହ କଲେଜ ପ୍ରତିଷ୍ଠାତା ତାଲିକାରେ ଆଗରେ ଥିବା ଏବଂ କଲେଜ ପ୍ରତିଷ୍ଠା ନିମନ୍ତେ ଜେଲ ଦଣ୍ଡ ଭୋଗିଥିବା ପୂର୍ବତନ ଉପବାଚସ୍ପତି ରାମଚନ୍ଦ୍ର ପଣ୍ଡା ପ୍ରତିଷ୍ଠା ଦିବସରେ ଦେଖିବାକୁ ମିଳିନଥିଲେ । ସ୍ଥାନୀୟ ଅଞ୍ଚଳରେ ଯେ କୌଣସି କାର୍ଯ୍ୟକ୍ରମରେ ପୂର୍ବତନ ଉପବାଚସ୍ପତି ଯୋଗ ଦେଉଥିବା ନଜିର ରହିଛି ।
ଏକଥା ଏମପିଙ୍କ ପାଖରେ ପହଂଚିବା ଫଳରେ ଏହାକୁ ନେଇ ପ୍ରଶାସନ ସ୍ତରରେ ମଧ୍ୟ ପ୍ରଭାବ ପଡିଥିବା ନେଇ ଏକ ନିର୍ଭର ଯୋଗ୍ୟ ସୂତ୍ର ରୁ ଖବର ମିଳିଛି । ନୂତନ ଭାବେ ନିର୍ମାଣ ହୋଇଥିବା ନୂତନ ସମିଳନୀ କକ୍ଷ ଉଦଘାଟନ ଫଳକରେ ଛତ୍ରପୁର ବିଧାୟକ, ଗଞ୍ଜାମ ଏନଏସି ଅଧକ୍ଷା, ବ୍ଲକ ଅଧକ୍ଷା, ଆଞ୍ଚଳିକ ଶିକ୍ଷା ନିର୍ଦ୍ଦେଶକ, ଛତ୍ରପୁର ଉପ ଜିଲାପାଳ, କଲେଜ ଅଧ୍ୟକ୍ଷାଙ୍କ ନାମ ରହିଥିବା ଦେଖିବାକୁ ମିଳିଥିଲା । ଏମପିଙ୍କ ନାମ ନଥିବାରୁ ଆଗାମୀ ଦିନରେ ଏହା ଦଳ ମଧ୍ୟରେ ଏକ ପ୍ରକାର ଶୀତଳ ଯୁଦ୍ଧର ଆରମ୍ଭ ବୋଲି ରାଜନୈତିକ ସମୀକକ୍ଷମାନେ ମତ ପ୍ରକାଶ କରିଛନ୍ତି । ଆଗାମୀ ଦିନରେ କେଉଁ ପରିସ୍ଥିତି ଉପୁଜିବ ତାହା ଦେଖିବାକୁ ବାକି ରହିଲା । ଅନ୍ୟପଟେ ଏଭଳି ଘଟଣା କିଏ ଓ କାହିଁକି କଲା ତାହା ମଧ୍ୟ ଏମପିଙ୍କ ସମର୍ଥକ ମନରେ ପ୍ରଶ୍ନବାଚୀ ସୃଷ୍ଟି କରିଛି ।
