ଝାରବନ୍ଧ, ୨୧ା୧୧(ଡି.ଏନ.ଏ.): ପଦ୍ମପୁର ଉପ ନିର୍ବାଚନ ବିଭିନ୍ନ ଦାବି ଉପସ୍ଥାପନ ପାଇଁ ଅଞ୍ଚଳବାସୀଙ୍କୁ ସୁଯୋଗ ଦେଇଛି। ଏଥିପାଇଁ ନିର୍ବାଚନ ମଣ୍ଡଳୀ ଅଧିନ ବିଭିନ୍ନ ସ୍ଥାନରେ ଜନଜନଆନ୍ଦୋଳନ ମୁଣ୍ଡ ଟେକୁଛି। ନିର୍ବାଚନ ମଣ୍ଡଳୀ ଅଧୀନ ଝାରବନ୍ଧ ବ୍ଲକବାସୀ ବିଭିନ୍ନ ଅନୁସଙ୍ଗିକ ସମସ୍ୟାକୁ ନେଇ ଦାବି ଉଠାଇଛନ୍ତି। ଝାରବନ୍ଧରେ ଯୁକ୍ତ ୨ ବିଜ୍ଞାନ କଲେଜ, ଝାରବନ୍ଧ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରିଣତ, ଝାରବନ୍ଧରେ ଜେଏମଏଫସି କୋର୍ଟ ସ୍ଥାପନ, ବିଦ୍ୟୁତ୍ ସମସ୍ୟାର ସମାଧାନ, ଝାରବନ୍ଧ ତହସିଲରେ ସବରେଜିଷ୍ଟାର ସ୍ଥାପନ ଆଦି ୧୨ଦଫା ଦାବି ସେମାନେ ରଖିଛନ୍ତି। ଏଥିପାଇଁ ସୋମବାର ଝାରବନ୍ଧ ବଣିକ ସଂଘ ନେତୃତ୍ୱରେ ବିଭିନ୍ନ ସଂଗଠନ ସମସ୍ତ ଦୋକାନ ବଜାର, ସରକାରୀ ବେସରକାରୀ କାର୍ଯ୍ୟାଳୟ ବନ୍ଦ କରି ଝାରବନ୍ଧ ମୁଖ୍ୟ ଛକ ଚାନ୍ଦିନ ଚୌକଠାରେ ଧାରଣା ଦେଇଥିଲେ। ଏହାକୁ ଝାରବନ୍ଧ ଅଞ୍ଚଳର ସାଧାରଣ ଜନତା ସମର୍ଥନ ଜଣାଇଥିଲେ। ପର୍ଯ୍ୟାୟ କ୍ରମେ କଂଗ୍ରେସ, ବିଜେଡି ଓ ଭାଜପା ନେତୃବୃନ୍ଦ ଧାରଣାସ୍ଥଳକୁ ଆସିଥିଲେ। କଂଗ୍ରେସ ଦଳର ଜିଲା ସଭାପତି ନିହାର ରଞ୍ଜନ ମହାନନ୍ଦ ଦାବିଗୁଡିକୁ ସମର୍ଥନ ଜଣାଇଥିଲେ । ପରେ ଶାସକ ବିଜେଡି ପକ୍ଷରୁ ସ୍ବାସ୍ଥ୍ୟମନ୍ତ୍ରୀ ନବ ଦାସ, ପୂର୍ବତନ ମନ୍ତ୍ରୀ ଦେବୀ ପ୍ରସାଦ ମିଶ୍ର, ପୂର୍ବତନ ମନ୍ତ୍ରୀ ସୁଶାନ୍ତ ସିଂ ଧାରଣାସ୍ଥଳକୁ ଆସି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ନିର୍ବାଚନ ଆଚରଣ ବିଧି ଶେଷ ହେବାପରେ ଦାବି ସବୁ ପୂରଣ ହେବ ବୋଲି ପ୍ରତିଶ୍ରୁତି ଦେଇଥିଲେ। ପରେ ଭାଜପା ତରଫରୁ ସୁନ୍ଦରଗଡ ଏମ୍ପି ଜୁଏଲ ଓରାମ, ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ ଓ ଗୋବର୍ଦ୍ଧନ ଭୋଇ ଧାରଣାସ୍ଥଳକୁ ଆସି ଆଲୋଚନା କରି ଆବଶ୍ୟକ ପଦକ୍ଷେପ ନେବାପାଇଁ ଭରସା ଦେଇଥିଲେ l ନିର୍ବାଚନ ଆଚରଣ ବିଧି ଶେଷ ହେବାଯାଏ ଧାରଣା ସ୍ଥଗିତ ରଖାଯିବ ପାଇଁ ନିଷ୍ପତ୍ତି ନିଆଯାଇଛି। ହେଲେ ଦାବିଗୁଡିକ ପୂରଣ କରା ନ ଗଲେ ଆନ୍ଦୋଳନକୁ ଆଗାମୀ ଦିନରେ ଜୋରଦାର କରାଯିବ ବୋଲି ଆନ୍ଦୋଳନକାରୀଙ୍କ ପକ୍ଷରୁ ସୂଚନା ଦିଆଯାଇଛି।
