ଛତ୍ରପୁର,୩୧।୮(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ବ୍ଲକ ପୋଡାପଦର ପଞ୍ଚାୟତ ଅଧୀନ କୁମାରବେଗପଲ୍ଲୀ ଗ୍ରାମରେ ରବିବାର ଏକ ଖୋଲା କୂଅ ଭିତରେ ପଡ଼ିଯାଇଥିବା ବୃଦ୍ଧା ମା’ଙ୍କୁ ଉଦ୍ଧାର କରିବାକୁ ଯାଇ ପୁଅ ମଧ୍ୟ କୂଅକୁ ଡେଇଁ ପଡ଼ିଥିଲେ। ପରେ ଖବରପାଇ ଛତ୍ରପୁର ଅଗ୍ନିଶମ ବାହିନୀ ସେଠାରେ ପହଞ୍ଚି ଉଭୟଙ୍କୁ ଉଦ୍ଧାର କରିଥିଲେ। ଏ ନେଇ ସୋମବାର ଛତ୍ରପୁର ଫାୟାର ସେବା ଟିମ୍ କାର୍ଯ୍ୟକୁ ଡିଜି ( ଫାୟାର ସେବା ) ଟୁଇଟ୍ କରି ପ୍ରଶଂସା କରିଛନ୍ତି। ୩୦ ଫୁଟ ଗଭୀର କୂଅରୁ ଉଭୟଙ୍କୁ ସୁରକ୍ଷିତ ଉଦ୍ଧାର ଅଭିଜ୍ଞସମ୍ପର୍ଣ୍ଣ ଛତ୍ରପୁର ଫାୟାର ସେବା ଟିମ୍ର ଚମତ୍କାର ପ୍ରଦର୍ଶନ ବୋଲି ସେ ଉକ୍ତ ଟୁଇଟରେ ଲେଖିଛନ୍ତି।
ସୂଚନାଯୋଗ୍ୟ, ରବିବାର ସକାଳେ ଉକ୍ତ ଗ୍ରାମର ତିରୁପତି ଗୌଡ଼ (୫୫)ଙ୍କ ଘରେ ଥିବା ଏକ ୩୦ ଫୁଟର ଖୋଲା କୂଅ ଭିତରେ ତାଙ୍କର ୭୫ ବର୍ଷୀୟ ବୃଦ୍ଧା ମା’ ଅର୍ଣ୍ଣପୂର୍ଣ୍ଣା ଗୌଡ଼ ଅସାବଧାନତା ହେତୁ ପଡ଼ି ଯାଇଥିଲେ। ମା’ଙ୍କୁ ବଞ୍ଚେଇବାକୁ ଯାଇ ପୁଅ ତିରୁପତି ମଧ୍ୟ କୂଅ ଭିତରକୁ ଡେଇଁଥିଲେ ।
