ଦୁନିଆରେ ଯଦି କେଉଁ ସମ୍ପର୍କକୁ ସବୁଠୁ ନିକଟତର କୁହାଯାଏ ତେବେ ତାହା ହେଉଛି ମା-ପିଲାର ସମ୍ପର୍କ। ଗୋଟିଏ ପିଲା ପାଇଁ ତା’ ମା’ର ସ୍ନେହ ସବୁଠୁ ନିଶ୍ଚଳ। ମାତ୍ର ରୁଷିଆର ଜଣେ ମା’ ଏହି ସମ୍ପର୍କରେ ଦାଗ ଲଗାଇଛନ୍ତି। ନିଜର ସଉକ୍ ପୂରା କରିବା ପାଇଁ ନିଜ ହାତରେ ଜନ୍ମକଲା ସନ୍ତାନକୁ ଅନ୍ୟ ଜଣଙ୍କୁ ବିକି ଦେଇଛନ୍ତି। ଯାହା ଶୁଣି ଆଶ୍ଚର୍ଯ୍ୟ ହେବେ।
ରୁଷିଆର ଏହି ମା’ ଜଣକ ୫ ଦିନର ଶିଶୁପୁତ୍ରକୁ ବିକ୍ରି କରିଦେଇଛନ୍ତି। କାରଣ ଏହି ଶିଶୁକୁ ବ୍ରିକ୍ରି କରି ସେ ଆଣିଥିବା ଟଙ୍କାରେ ତାଙ୍କର ସୌନ୍ଦର୍ଯ୍ୟ ବୃଦ୍ଧି କରିଥାନ୍ତେ। ଉକ୍ତ ଟଙ୍କାରେ ସେ ତାଙ୍କର ଅସୁନ୍ଦର ନାକକୁ ସୁନ୍ଦର କରିଥାନ୍ତେ। ଯଦିଓ ମହିଳାଙ୍କ ନାମ ପ୍ରକାଶ କରାଯାଇନାହିଁ। କିନ୍ତୁ ରୁଷିଆରୁ ଶିଶୁ ଚାଲାଣ ଅଭିଯୋଗରେ ତାଙ୍କୁ ଗିରଫ କରାଯାଇଛି। ଅଭିଯୋଗ ହୋଇଛି ଯେ, ସେ ନିଜ ସନ୍ତାନ ବିକ୍ରି କରି ନିଜର ସୌନ୍ଦର୍ଯ୍ୟ ବଢ଼ାଇବାକୁ ଚାହୁଁଥିଲେ।
ଏହି ଘଟଣା ଦାଗସ୍ତାନ ଅଞ୍ଚଳର। ଯେଉଁଠିକାର ସ୍ଥାନୀୟ ଗଣମାଧ୍ୟମ ଏହି ଘଟଣାର ଖୁଲାସା କରିଛି। ମହିଳା ଜଣକ ନିଜ ପିଲାକୁ ୩୦୦୦ ୟୁରୋରୁ ଅଧିକ ଅର୍ଥାତ୍ ୨ ଲକ୍ଷ ୮୩ ହଜାର ଟଙ୍କାରୁ ଅଧିକରେ ବିକ୍ରି କରିଥିଲେ। ଯାହାର ପ୍ରଥମ କିସ୍ତି ୨୫ ହଜାର ଭାବରେ ନେଇଥିଲେ ମହିଳା ଜଣକ। ପିଲାଟି ବିକ୍ରି ପରେ ଅସୁସ୍ଥ ହୋଇପଡ଼ିଥିଲା। ଯିଏ ଶିଶୁଟିକୁ କିଣିଥିଲେ ସେମାନେ ତାଙ୍କର ଡାକ୍ତରୀ ରିପୋର୍ଟ ଚାହୁଁଥିଲେ। ତାଙ୍କୁ ଆସନ୍ତା ମାସରେ ଅଭିଯୁକ୍ତ ମା’ ୧,୩୭୦ ୟୁରୋ ଅର୍ଥାତ୍ ୧ ଲକ୍ଷ ୨୯ ହଜାର ଟଙ୍କା ଦେବାକୁ ପଡ଼ିବ। ଫଳରେ ସେ ତାଙ୍କ ନାକ ସର୍ଜରୀ କରାଇ ଅସୁନ୍ଦର ନାକକୁ ସୁନ୍ଦର କରିବେ। ପିଲା କିଣିଥିବା ଦମ୍ପତିକୁ ପୋଲିସ ଗିରଫ କରିବା ପରେ ପୂରା ଘଟଣା ସାମ୍ନାକୁ ଆସିଥିଲା।
ଏକ ରିପୋର୍ଟ ଅନୁଯାୟୀ, ମହିଳା ଜଣକ ୨୫ ଏପ୍ରିଲ ୨୦୨୨ରେ ଏକ ସନ୍ତାନ ଜନ୍ମ ଦେଇଥିଲେ। ୩୦ ଏପ୍ରିଲରେ ତାଙ୍କୁ ଡାକ୍ତରଖାନାରୁ ଡିସ୍ଚାର୍ଜ କରାଯାଇଥିଲା। ଏହି ସମୟରେ ସେ ନିଜ ପିଲାକୁ ବିକ୍ରି କରି ପ୍ରଥମ କିସ୍ତି ନେଇଥିଲେ। ଅବଶିଷ୍ଟ କିସ୍ତି ପରେ ତାଙ୍କୁ ଦିଆଯାଇଥାନ୍ତା। ମାତ୍ର ସେତେବେଳେ ପୋଲିସ ପାଖରେ ଖବର ପହଞ୍ଚି ସାରିଥିଲା।
