କୋକସରା,୧୯ା୧୧(ଡି.ଏନ୍.ଏ.): ସେ ମଣିଷ ହେଉ କି ପଶୁ। ମା’ର ମମତା ଅନାବିଳ। ମାତୃତ୍ୱ ଆଗରେ ସବୁ ସନ୍ତାନ ସମାନ। ଶନିବାର ସଡ଼କ ପାର୍ ହେଉଥିବା ବେଳେ ଏକ କୁକୁର ଛୁଆ ଉପରେ କୌଣସି ଏକ ଗାଡ଼ି ମାଡ଼ିଯିବାରୁ ତା’ର ମୃତ୍ୟୁ ହୋଇଛି। ହେଲେ ଛୁଆର ମୃତ୍ୟୁ ପରେ ମା’ କୁକୁର ସକାଳୁ ସନ୍ଧ୍ୟା ପର୍ଯ୍ୟନ୍ତ ଛୁଆକୁ ଜଗି ବସିଛି। ରାସ୍ତାରେ ଶହ ଶହ ଲୋକ ଯିବା ଆସିବା କରୁଛନ୍ତି ହେଲେ ସ୍ବାର୍ଥପର ମଣିଷ ଆଗରେ ପଶୁର ଜୀବନର ମୂଲ୍ୟ ବୋଧେ କିଛି ନୁହେଁ। କେହି ଜଣେ ବି ଘଟଣାକୁ ନେଇ ସମବେଦନା ଦେଖାଉ ନାହାନ୍ତି। କୁକୁର ଛୁଆ ଜାଗାରେ ଯଦି କୌଣସି ମଣିଷ ଛୁଆ ହୋଇଥିଲେ ଘଟଣାକୁ ନେଇ କେତେ କ’ଣ ଆନ୍ଦୋଳନ ହୋଇଥାନ୍ତା। ହେଲେ ନିରୀହ ପଶୁଟିଏ ବୋଲି କାହାର ଦରଦ ନାହିଁ। ସତରେ ଆମେ କେତେ ସ୍ବାର୍ଥପର! ଏହି ଘଟଣାକୁ ଦେଖିଲେ ବାସ୍ତବିକତା ବାରି ହେଉଛି। ଘଟଣାଟି ହେଉଛି କଳାହାଣ୍ଡି ଜିଲା କୋକସରା ବସ୍ଷ୍ଟାଣ୍ଡ ନିକଟରେ। ସେଠାରେ ରହୁଥିବା ଏକ ମାଈ କୁକୁର କିଛି ଦିନ ତଳେ ୪ ଛୁଆଙ୍କୁ ଜନ୍ମ ଦେଇଥିଲା। ହେଲେ ତା’ମଧ୍ୟରୁ ଏକ କୁକୁର ଛୁଆ ରାସ୍ତା ପାର୍ ହେଉଥିବା ବେଳେ କୌଣସି ଏକ ଗାଡ଼ି ଧକ୍କା ଦେବା ଫଳରେ ମୃତ୍ୟୁ ହୋଇଥିଲା। ପରେ ମା’ କୁକୁର ଛୁଆକୁ ରାସ୍ତାରେ ଜଗି ବସିଛି।
