ନୂଆଦିଲ୍ଲୀ: କେତେକ ଲୋକଙ୍କୁ ମଶା ଅଧିକ କାମୁଡ଼ନ୍ତିି। ଅପରପକ୍ଷରେ ଅନ୍ୟ କିଛି ଲୋକଙ୍କ ପାଖକୁ ମଶା କେବେ ମାଡ଼ନ୍ତି ନାହିଁ। ସାଧାରଣତଃ ୫ଟି କାରଣ ପାଇଁ ମଶା ଅଧିକ କାମୁଡ଼ିଥାନ୍ତି। ପ୍ରଥମ ହେଉଛି ଶରୀରରୁ ନିର୍ଗତ ହେଉଥିବା କାର୍ବନ ଡାଇଅକ୍ସାଇଡ୍ର ପରିମାଣ। ଯେଉଁମାନଙ୍କ ଶରୀରରୁ ଅଧିକ କାର୍ବନ ଡାଇଅକ୍ସାଇଡ୍ ନିର୍ଗତ ହୁଏ ସେମାନଙ୍କୁ ମଶା ଅଧିକ କାମୁଡ଼ିଥାନ୍ତି ବୋଲି ଏକ ଅଧ୍ୟୟନ ରିପୋର୍ଟରେ ପ୍ରକାଶ ପାଇଛି। କାର୍ବନ ଡାଇଅକ୍ସାଇଡ୍ ମଶାଙ୍କୁ ଆକୃଷ୍ଟ କରିଥାଏ। ଏକ୍ଷେତ୍ରରେ ମଶାଙ୍କ ମଧ୍ୟରେ ଥିବା ସେନ୍ସିଂ ଅର୍ଗାନ୍ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହୋଇଥାଏ। ସାଧାରଣ ଲୋକଙ୍କ ତୁଳନାରେ ଗର୍ଭବତୀଙ୍କ ଶରୀରରୁ ୨୦ ପ୍ରତିଶତ ଅଧିକ କାର୍ବନ ଡାଇଅକ୍ସାଇଡ୍ ନିର୍ଗତ ହୋଇଥାଏ। ତେଣୁ ସେମାନଙ୍କୁ ଅଧିକ ମଶା କାମୁଡ଼ନ୍ତି। ସେହିପରି ଚ୍ବତାରେ ଥିବା କେତେକ ସ୍ବତନ୍ତ୍ର ବ୍ୟାକ୍ଟେରିଆ ମଶାଙ୍କୁ ଆକର୍ଷିତ କରିଥାନ୍ତି ବୋଲି ଏହି ରିପୋର୍ଟରେ ଉଲ୍ଲେଖ କରାଯାଇଛି। ଅପରପକ୍ଷରେ ମଶା କେତେକ ନିର୍ଦ୍ଦିଷ୍ଟ ବ୍ଲଡ୍ ଗ୍ରୁପ୍ ବ୍ୟକ୍ତିଙ୍କୁ ଅଧିକ କାମୁଡ଼ନ୍ତି। ମଶାଙ୍କର ପ୍ରଥମ ପସନ୍ଦ ହେଉଛି ଓ ଗ୍ରୁପ୍ ବ୍ଲଡ୍। ଏହାପରେ ଦ୍ୱିତୀୟ ପ୍ରସନ୍ଦ ହେଉଛି ଏ ଗ୍ରୁପ୍। ଏହି ଦୁଇ ବ୍ଲଡ୍ ଗ୍ରୁପ୍ ବ୍ୟକ୍ତିଙ୍କ ପାଖରେ ମଶାଙ୍କ ଗହଳି ଲାଗି ରହିଥାଏ। ଅଧିକ ଗାଢ଼ ରଙ୍ଗର ପୋଷାକ ଅବା କଳା ପୋଷାକ ପିନ୍ଧିଥିବା ଲୋକଙ୍କୁ ଅଧିକ ମଶା କାମୁଡ଼ିଥାନ୍ତିି। ଝାଳରେ ଲାକ୍ଟିକ୍ ଏସିଡ୍ ନିର୍ଗତ ହୋଇ ଶରୀରରେ ଲାଗି ରହିଥାଏ। ଲାକ୍ଟିକ୍ ଏସିଡ୍ ପ୍ରତି ମଶା ଆକର୍ଷିତ ହୋଇଥାନ୍ତି। ତେଣୁ ନିତି ଗାଧୋଇଲେ ଲାକ୍ଟିକ୍ ଲସିଡ୍ ଶରୀରରୁ ବାହାରି ଯାଇଥାଏ। ତେଣୁ ମଶା କାମୁଡ଼ାର ଆଶଙ୍କା ନ ଥାଏ ବୋଲି ରିପୋର୍ଟରେ ଦର୍ଶାଯାଇଛି। ବିୟର ପାନ କରୁଥିବା ଲୋକଙ୍କ ରକ୍ତ ମଶାଙ୍କର ଭାରି ପସନ୍ଦ। ଏଭଳି ଲୋକଙ୍କ ପାଖରେ ମଶା ଉଡ଼ି ବୁଲିଥାନ୍ତି। ସେହିପରି ଘରେ ବ୍ୟବହୃତ ହେଉଥିବା କେତେକ ସ୍ପ୍ରେ ମଶାଙ୍କୁ ତଡ଼ି ଦେଇଥାଏ। ଫଳରେ ମଶା ସମ୍ପୃକ୍ତ ବ୍ୟକ୍ତିଙ୍କ ପଡ଼ୋଶୀଙ୍କ ଘରେ ପହଞ୍ଚି ଥାନ୍ତି। ତେଣୁ ୧୫ ପ୍ରତିଶତ ଡିଇଇଟି ଯୁକ୍ତ ସ୍ପ୍ରେ ବ୍ୟବହାର କରାଯିବା ଆବଶ୍ୟକ। ଏହା ଦ୍ୱାରା ମଶା ନିସ୍ତେଜ ହୋଇ ପଡ଼ି ରହି ଶେଷରେ ମରି ଯାଇଥାନ୍ତି ବୋଲି ରିପୋର୍ଟରେ ପ୍ରକାଶ ପାଇଛି।
