ମାଲକାନଗିରି,୧୫ା୧୦(ଡି.ଏନ୍.ଏ.): ମାଲକାନଗିରି ପୌର ପରିଷଦ ଓ୍ବାର୍ଡ ନଂ. ୩ର ୭୦ରୁ ଊର୍ଦ୍ଧ୍ୱ ପରିବାର ଗତ ୬ ମାସ ଧରି ଘରବାଡ଼ି ପଟ୍ଟା ପାଇଁ ଧାରଣାରେ ବସିଛନ୍ତି। କିନ୍ତୁ ଏଯାବତ୍ ତାଙ୍କର କୌଣସି ସମାଧାନ ହୋଇ ପାରି ନ ଥିବା ଧାରଣାରେ ବସିଥିବା ଶ୍ରୀନିବାସ ରାଓ, ପୀତବାସ ସେଠୀ, ପି. ସାମ୍ବା, ବିଷ୍ଣୁ ସେଠୀ, ପି. ରାଜେଶ୍ୱର ରାଓ, ସୁନା ଅନକା ପ୍ରମୁଖ ପ୍ରକାଶ କରିଛନ୍ତି। ଏ ସମ୍ବନ୍ଧରେ ଗତ ମେ ୨୮ରେ ଜାଗା ମିଶନର ନିର୍ଦ୍ଦେଶକଙ୍କୁ ସାକ୍ଷାତ କରି ସମସ୍ୟା ଜଣାଇଥିଲେ। ମାଲକାନଗିରି ଜିଲାପାଳଙ୍କ ସହ ମଧ୍ୟ ଆଲୋଚନା କରିଥିଲେ। ଏହି ସମସ୍ୟାକୁ ନେଇ ଜିଲାପାଳ ଏବଂ ପୌର ପରିଷଦ କର୍ତ୍ତୃପକ୍ଷ ନିର୍ଦ୍ଦେଶକଙ୍କୁ ଜଣାଇଲା ପରେ ଗତ ସେପ୍ଟେମ୍ବର ୧୪ରେ ନିର୍ଦ୍ଦେଶକ ମାଲକାନଗିରି ପୌର ପରିଷଦ ଅଞ୍ଚଳରେ ବସ୍ତିଗୁଡ଼ିକରେ ରହୁଥିବା ୧୧୫୫ ଜଣ ବସ୍ତି ବାସିନ୍ଦା ଏବଂ ବାଲିମେଳା ବିଜ୍ଞାପିତ ଅଞ୍ଚଳ ପରିଷଦର ଉପରୋକ୍ତ ପରିବାରକୁ ଯାଇ ସର୍ଭେ କାର୍ଯ୍ୟ କରି ତୁରନ୍ତ ଜମି ରେକର୍ଡ ପ୍ରମାଣପତ୍ର ଦେବା ପାଇଁ ଚିଠି କରିଛନ୍ତି। ଏ ସମ୍ବନ୍ଧରେ ପୌର ପରିଷଦର ବସ୍ତି ବାସିନ୍ଦା ଥଇଥାନ ଅଧିକାରୀ ଜଗନ୍ନାଥ କେମୁଡୁ ପ୍ରକାଶ କରିଛନ୍ତି ଯେ, ଗତ ୧୦ ତାରିଖରେ ଏ ସମ୍ବନ୍ଧରେ ଏକ ବୈଠକ ଡକା ଯାଇ କମିଟି ଗଠନ କରାଯାଇଛି। ସର୍ଭେ ପାଇଁ କେତେକ ଆବଶ୍ୟକ ସାମଗ୍ରୀ ଭୁବନେଶ୍ୱରରୁ ଆସିଲା ପରେ ଏହି ସର୍ଭେ କାର୍ଯ୍ୟ ତୁରନ୍ତ ଆରମ୍ଭ ହେବ।
ପ୍ରକାଶ ଥାଉକି, ଧାରଣାରେ ବସିଥିବା ବସ୍ତିବାସିନ୍ଦାଙ୍କ ନବରଙ୍ଗପୁର ଏମ୍ପି ରମେଶ ମାଝି ଧାରଣାସ୍ଥଳକୁ ଆସି ସେମାନଙ୍କ ସମସ୍ୟା ସମ୍ବନ୍ଧରେ ଆଲୋଚନା କରିବା ସହ ଜାଗା ମିଶନ ନିର୍ଦ୍ଦେଶକଙ୍କୁ ମଧ୍ୟ ଅବଗତ କରାଇଥିଲେ।
