ନାଉଗାଁ,୧୯ା୪(ସ୍ବ.ପ୍ର.):ଗ୍ରାମାଞ୍ଚଳର ଜନସାଧାରଣଙ୍କୁ ମଧୁର ପାନୀୟ ଜଳ ଯୋଗାଇବା ପାଇଁ ସରକାରଙ୍କ ତରଫରୁ ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଛି। କେଉଁଠି ପାଇପ ଫାଟି ରାସ୍ତା ଘାଟରେ ପାନୀୟ ଜଳ ନଷ୍ଟ ହେଉଥିବାବେଳେ ଆଉ କେଉଁଠି ଦୀର୍ଘ ଦିନ ହେବ ପାଇପ ସଂଯୋଗ କରାଯାଇଥିଲେ ମଧ୍ୟ ପାନୀୟ ଜଳ ପହଞ୍ଚି ପାରୁନାହିଁି। ଏହାର ଜ୍ୱଳନ୍ତ ଉଦାହରଣ ନାଉଗାଁ ବ୍ଲକ ଅନ୍ତର୍ଗତ ଶିଖର ପଞ୍ଚାୟତରେ ଦେଖିବାକୁ ମିଳିଛି। ଏହି ପଞ୍ଚାୟତଟି ନଦୀ ନଦୀ କୂଳରେ ଅବସ୍ଥିତ। ନଦୀ ପାର୍ଶ୍ୱବର୍ତ୍ତୀ ଗ୍ରାମ ହୋଇଥିବାରୁ ଏଠାରେ ଅଧିକାଂଶ ନଳକୂପରରୁ ଲୁଣି ପାଣି ଆସିଥାଏ। ନଦୀ କୂଳିଆବାସୀଙ୍କୁ ମଧୁର ପାନୀୟ ଜଳ ଯୋଗାଇବା ପାଇଁ ସାରେଇକୂଳଠାରେ ଏକ ସୁଉଚ୍ଚ ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଛି। ଏହି ପ୍ରକଳ୍ପ ଉପରେ ପଞ୍ଚାୟତର ଶାଳିଜଙ୍ଗା, ଅଙ୍ଗେଶ୍ୱରପଡା, ଶିଖର, ବିଲିପଡା ଆଦି ଗ୍ରାମର ୨୫୦ରୁ ଊର୍ଦ୍ଧ୍ୱ ଲୋକେ ନିର୍ଭରଶୀଳ। ଉକ୍ତ ପ୍ରକଳ୍ପ ଜରିଆରେ ପରିବାରକୁ ପାନୀୟ ଜଳ ଯୋଗାଇ ଦେବା ପାଇଁ ପାଇପ ସଂଯୋଗ କରାଯାଇ ଷ୍ଟାଣ୍ଡ ପୋଷ୍ଟ ନିର୍ମାଣ କରାଯାଇଛି। ନିର୍ମାଣ କାର୍ଯ୍ୟକୁ ୩ ବର୍ଷ ଊର୍ଦ୍ଧ୍ୱ ସମୟ ବିତିଯାଇଥିଲ ମଧ୍ୟ ଏପର୍ଯ୍ୟନ୍ତ ପାଣି ଆସିନାହିଁ ବୋଲି ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଫଳରେ ସେମାନେ ପାନୀୟ ଜଳ ପାଇଁ ଡହଳବିକଳ ହେଉଛନ୍ତି ବୋଲି କହିଛନ୍ତି। ସାରେଇକୂଲର ଦୋଳ ଗୋବିନ୍ଦ ଲେଙ୍କା, ଶଙ୍କର ପ୍ରସାଦ ରାଉତ, ଶିଖରର ଅନାଦି ବାରିକ, ବିଜୟ କୁମାର ବାରିକ, ବିଲିପଡାର ନନ୍ଦ ସ୍ବାଇଁଙ୍କ କହିବା ମୁତାବକ ଗ୍ରାମ ଦେଇ ୨ ଟି ମୁଖ୍ୟ ରାସ୍ତା ଯାଇଛି। ଗୋଟିଏ ରାସ୍ତା ସାରେଇକୂଳରୁ ଶାଳିଜଙ୍ଗାକୁ ସଂଯୋଗ କରୁଛି। ଏହା ଗ୍ରାମ ଉନ୍ନୟନ ବିଭାଗ ଅଧୀନରେ ରହିଛି। ସେହିପରି ଅନ୍ୟ ରାସ୍ତାଟି ଶିଖରଘାଟ-ବାଲିଭଉଁରୀକୁ ସଂଯୋଗ କରୁଛି। ଏହି ରାସ୍ତା ପାର୍ଶ୍ୱରେ ସାରେକୂଲ, ବିଲିପଡା ଗ୍ରାମ ରହିଛି। ଏହି ୨ଟି ରାସ୍ତା ମରାମତି ସମୟରେ ପାନୀୟ ଜଳ ପ୍ରକଳ୍ପରୁ ସଂଯୋଗ କରାଯାଇଥିବା ପାଇପଗୁଡିକ ବନ୍ଦ ହୋଇଯାଇଛି। ଫଳରେ ଜଳ ଯୋଗାଣ ବାଧାପ୍ରାପ୍ତ ହୋଇଛି।
ସେହିପରି ପାଇପ ସଂଯୋଗ ସମୟରେ ସରକାରୀ ନିୟମ ଅନୁସାରେ ପ୍ରତି ଘରକୁ ପାଇପ ସଂଯୋଗ କରି ଷ୍ଟାଣ୍ଡ ପୋଷ୍ଟ ନିର୍ମାଣ କରିବା କଥା। କିନ୍ତୁ କାର୍ଯାଦେଶ ପାଇଥିବା ଠିକାଦାର ଗୋଟିଏ ଷ୍ଟାଣ୍ଡ ପୋଷ୍ଟରେ ୩ରୁ ଅଧିକ ଗୃହ ସଂଯୋଗ କରିଛଛି।
ଏବେ ଗ୍ରୀଷ୍ମ ପ୍ରବାଦ ଜାରି ରହିଥିବା ବେଳେ ଅନେକ ନଳକୂପ ଅଚଳ ହୋଇଯାଇଛି। ଏଭଳି ସମୟରେ ଗ୍ରାମ୍ୟ ଜଳ ପରିମଳ ବିଭାଗ ମାଧ୍ୟମରେ ଯୋଗାଇ ଦିଆଯାଉଥିବା ପାନୀୟ ଜଳ ଏକମାତ୍ର ଭରସା। ମାତ୍ର ବିଭାଗୀୟ ଅଧିକାରୀଙ୍କ ଦାୟିତ୍ୱହୀନତା ଯୋଗୁ ପାନୀୟ ଜଳ ପାଇବାରୁ ସ୍ଥାନୀୟ ଲୋକେ ବଞ୍ଚତ୍ତ ହେଉଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ରଶ୍ମିରଞ୍ଜନ ଦାସ କହିଛନ୍ତି। ମୁଁ ଏବିଷୟରେ ଅବଗତ ନଥିଲ। ଖୁବଶୀଘ୍ର ପାନୀୟ ଜଳ ଯୋଗାଇ ଦେବା ପାଇଁ ବ୍ୟବସ୍ଥା କରାଯିବ।
