ମୋରଡ଼ା,୭ା୧(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ବ୍ଲକରେ ଜଣ୍ଡିସ ଆତଙ୍କ ଦେଖାଦେଇଛି। ଏହି ବ୍ଲକ ଅଧୀନ ପଳାସମୁଣ୍ଡୁଳି ପଞ୍ଚାୟତର ଖୁରୁଣ୍ଟିଆ ଗ୍ରାମରେ ୨୫ରୁ ଊର୍ଦ୍ଧ୍ୱ ପିଲା ଜଣ୍ଡିସରେ ଆକ୍ରାନ୍ତ ହୋଇଛନ୍ତି। ଗ୍ରାମରେ ଥିବା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ପଢ଼ୁଥିବା ୭ଜଣ ଛାତ୍ରୀଛାତ୍ର ଆକ୍ରାନ୍ତ ହୋଇଥିବା ଉକ୍ତ ବିଦ୍ୟାଳୟର ପ୍ରଧାନ ଶିକ୍ଷକ ଜୟନ୍ତ କୁମାର ପାଲ କହିଛନ୍ତି। ପାଇପ୍ ପାଣି ବ୍ୟବହାର ହିଁ ଏହି ରୋଗର କାରଣ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମରେ ଥିବା ବସୁଧା ପାନୀୟ ଜଳ ପ୍ରକଳ୍ପ ଟାଙ୍କିରୁ ପାଇପ୍ ସଂଯୋଗ ହୋଇ ପାନୀୟ ଜଳ ଯୋଗାଣ ହେଉଛି। ଏହି ପାଇପ୍କୁ ସଂଯୋଗ କରୁଥିବା ଚାମ୍ବର ସ୍ଲାବଗୁଡ଼ିକୁ ଫାଙ୍କା ଛଡ଼ା ହୋଇଛି। ଫଳରେ ପାଣିରେ ରାସ୍ତା ଧୂଳି ମିଶିବା ସହିତ ଅଳିଆ, ଆବର୍ଜନା ପଡ଼ି ଦୂଷିତ ହେଉଛି। ସେହିପରି ପାଇପ୍ ସଂଯୋଗ ସ୍ଥାନରେ ପାଣି ଝରୁଛି। ମୋରଡ଼ା ବିଡିିଓ ଅଣାକର ନାଏକଙ୍କ ନିର୍ଦ୍ଦେଶ କ୍ରମେ ବିଇଓ ବିଜୟ କୁମାର ପାଣିଗ୍ରାହୀ, ବ୍ଲକ ମଙ୍ଗଳ ଅଧିକାରିଣୀ ପାର୍ବତୀ ହଁାସଦା ସୋମବାର ପୂର୍ବାହ୍ନ ୧୧ଟାରେ ଖୁରୁଣ୍ଟିଆ ବିଦ୍ୟାଳୟକୁ ଯାଇ ସ୍ଥିତି ପରଖିଥିଲେ। ଏବାବଦରେ କିଶାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରିଣୀ ହାମ୍ବିରା ମୁର୍ମୁଙ୍କୁ ପଚାରିବାରୁ କେତେଜଣ ପିଲା ସୁସ୍ଥ ହୋଇଛନ୍ତି ଏବଂ ବର୍ତ୍ତମାନ ଆକ୍ରାନ୍ତଥିବା ପିଲାମାନେ ଘରେ ଔଷଧ ଖାଇ ଚିକିତ୍ସିତ ହେଉଛନ୍ତି। ମଙ୍ଗଳବାର ଡା. ଆଲଫା ମିଶ୍ରଙ୍କ ସହିତ ଫାର୍ମାସିଷ୍ଟ ଗଁାକୁ ଯାଇ ସ୍ଥିତି ଅନୁଧ୍ୟାନ କରିବା ସହିତ ଲୋକଙ୍କୁ ସତର୍କ କରାଇଥିବା କହିଛନ୍ତି। ସେହିପରି ଗ୍ରାମ୍ୟ ପରିମଳ ଓ଼ ପାନୀୟ ଜଳ ଯୋଗାଣ ବିଭାଗର କନିଷ୍ଠ ଯନ୍ତ୍ରୀ ସସ୍ମିତା ପତି ମଧ୍ୟ ମଙ୍ଗଳବାର ଏକ ଟିମ୍ ପଠାଇ ଟାଙ୍କିରେ ବ୍ଲିଚିଙ୍ଗ ପାଉଡ଼ର ପକାଇବା ସହିତ ପାଇପ୍ ମରାମତି କାର୍ଯ୍ୟ ଚାଲିଥିବା ସୂଚନା ଦେଇଛନ୍ତି।
