କୋରାପୁଟ,୨୮ା୯(ସ୍ବ.ପ୍ର.): କୋରାପୁଟ ଜିଲା ସେମିଳିଗୁଡା ଅଞ୍ଚଳରୁ ସୋମବାର ଚନ୍ଦନକାଠ ଚୋରାଚାଲାଣ ହେବା ବେଳେ ଜବତ ହେବାର ୨୪ ଘଣ୍ଟା ନ ପୂରୁଣୁ ମଙ୍ଗଳବାର ଜିଲାର ନନ୍ଦପୁର ଅଞ୍ଚଳରୁ ୨ କୁଇଣ୍ଟାଲ ୧୪ କେଜି ୭ଶହ ଗ୍ରାମ ଚନ୍ଦନକାଠ ପାଡୁଆ ପୋଲିସ ଜବତ କରିଛି।
ଖବରରୁ ଜଣାପଡିଛି, ପଶ୍ଚିମବଙ୍ଗକୁ ଚାଲାଣ କରାଯିବା ଲାଗି ଡଙ୍ଗା ଯୋଗେ ନନ୍ଦପୁରର ଚମ୍ପାପୁଟ କୁଲାରସିଂ ନଦୀଘାଟକୁ ଅଣାଯାଇ ଏହି ଚନ୍ଦନକାଠ ଏକ ପିକ୍ଅପ୍ ଭ୍ୟାନ୍ (ଓଡି ୧୦ଏଫ୍-୮୩୦୦)ରେ ରଖାଯାଉଥିଲା। ଏନେଇ ସୂଚନା ପାଇ ପାଡୁଆ ଥାନା ଅଧିକାରୀ ସବ୍ୟାସାଚୀ ଶତପଥୀଙ୍କ ନେତୃତ୍ୱରେ ଏକ ଟିମ ବଡ଼ିି ଭୋରରୁ ଡଙ୍ଗା ଘାଟରେ ଚଢାଉ କରିଥିଲେ। ସେଠାରେ ୭ଟି ବସ୍ତାରେ ଥିବା ଚନ୍ଦନକାଠକୁ ଜବତ କରାଯାଇଥିଲା। ପରେ ଏହାକୁ ପାଡୁଆ ଥାନାକୁ ଅଣାଯାଇ ସେଠାରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ଓଜନ କରାଯାଇଥିଲା ବୋଲି ନନ୍ଦପୁର ଏସ୍ଡିପିଓ ସଞ୍ଜୟ ମହାପାତ୍ର କହିଛନ୍ତି। ଜବତ ଚନ୍ଦନ କାଠର ବଜାର ମୂଲ୍ୟ ୧୨ ଲକ୍ଷ ଟଙ୍କା ହେବ। ଏନେଇ ପାଡୁଆ ଥାନାରେ ୮୩/୨୨ ଧାରା ୩୭୯ ଏବଂ ୩୪ ଆଇପିସି ଓ ଆରଡବ୍ଲ୍ୟୁ ୫୫ଇ ଓଡିଶା ଫରେଷ୍ଟ ଆକ୍ଟରେ ମାମଲା ରୁଜ ହୋଇ ଘଟଣାର ଅଧିକ ତଦନ୍ତ ଜାରି ରହିଛି ା
