ଭୁବନେଶ୍ୱର,୩୦ା୯(ବ୍ୟୁରୋ):ମଙ୍ଗଳବାରଠାରୁ ଷୋଡ଼ଶ ବିଧାନସଭାର ମୌସୁମୀ ଅଧିବେଶନ କରୋନା କଟକଣା ମଧ୍ୟରେ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ପୂର୍ବାହ୍ନ ୧୧ଟାରୁ ଆରମ୍ଭ ହୋଇଛି। ଯେଉଁ ବିଧାୟକମାନେ କରୋନା ସଂକ୍ରମିତ ହୋଇନାହାନ୍ତି ସେମାନଙ୍କୁ ବିଧାନସଭାରେ ଯୋଗଦେବାକୁ ଅନୁମତି ଦିଆଯାଇଥିଲା। ୮୫ଜଣ ବିଧାୟକ ଯୋଗଦେଇଥିବା ବେଳେ ଅନ୍ୟ ବିଧାୟକମାନେ ବାହାରେ ରହି ଭିଡିଓ କନ୍ଫରେନ୍ସ ଜରିଆରେ ଗୃହ କାର୍ଯ୍ୟରେ ଅଂଶଗ୍ରହଣ କରିଥିଲେ। ବିଧାନସଭାକୁ ପ୍ରବେଶ କରିବା ବେଳେ ବିଧାୟକ, କର୍ମଚାରୀ, ଖରବଦାତାଙ୍କୁ କରୋନା ନେଗେଟିଭ ରିପୋର୍ଟ ଦେଖାଇବାକୁ ପଡ଼ିଥିଲା। ଗୃହକୁ ପ୍ରବେଶ କରିବା ପୂର୍ବରୁ ବାଚସ୍ପତିଙ୍କଠାରୁ ଆରମ୍ଭ କରି ସମସ୍ତେ ମୁହଁରେ ମାସ୍କ ଓ ସିଲ୍ଡ କଭର ଲଗାଇବା ସହ ହ୍ୟାଣ୍ଡ ଗ୍ଲୋବ୍ସ ପିନ୍ଧିଥିବା ଦେଖିବାକୁ ମିଳିଥିଲା। ସମସ୍ତ ସଦସ୍ୟଙ୍କ ସିଟ୍ ସମ୍ମୁଖରେ କାଚରେ କଭର କରାଯାଇଥିଲା। କେହି କାହା ପାଖକୁ ଯିବାକୁ ସୁଯୋଗ ନ ଥିଲା। ଲୋକସେବା ଭବନର ସମ୍ମିଳନୀ କକ୍ଷ, ବିଭିନ୍ନ ଜିଲାର ଜିଲାପାଳଙ୍କ ସମ୍ମିଳନୀ କକ୍ଷରୁ କେତେଜଣ ବିଧାୟକ ଏହି ଅଧିବେଶନରେ ଯୋଗ ଦେଇଥିଲେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନବୀନ ନିବାସରୁ ଭିଡିଓ କନ୍ଫରେନ୍ସ ମାଧ୍ୟମରେ ଗୃହ କାର୍ଯ୍ୟରେ ଯୋଗଦେଇଥିବା ବେଳେ ଲୋକସେବା ଭବନରୁ ବିଧାୟକ ବଦ୍ରିନାରାୟଣ ପାତ୍ର, ଉଷାଦେବୀ, ପ୍ରଫୁଲ୍ଲ ସାମଲ, ଶଶିଭୂଷଣ ବେହେରା, ନିତ୍ୟାନନ୍ଦ ସାହୁ ଏବଂ ସାବିତ୍ରୀ ଅଗ୍ରୱାଲ ଯୋଗ ଦେଇଥିଲେ। ସେହିପରି ଭଦ୍ରକରୁ ବିଷ୍ଣୁ ଚରଣ ସେଠୀ, ଢେଙ୍କାନାଳରୁ ପ୍ରଫୁଲ୍ଲ ମଲ୍ଲିକ, ନୂଆପଡ଼ାରୁ ରାଜେନ୍ଦ୍ର ଢୋଲକିଆ ଜିଲାପାଳଙ୍କ ସମ୍ମିଳନୀ କକ୍ଷରୁ ଭିଡିଓ କନ୍ଫରେନ୍ସ ଯୋଗେ ଗୃହକାର୍ଯ୍ୟରେ ଯୋଗଦେଇଥିଲେ।
ପୂର୍ବାହ୍ନରେ ଶୋକ ପ୍ରସ୍ତାବ ପରେ ଗୃହରେ କୌଣସି କାର୍ଯ୍ୟ ହୋଇ ନ ଥିଲା। ପ୍ରଥମ ଥର କରୋନା ମହାମାରୀ ସଂକ୍ରମଣ ଲାଗି ଗୃହରେ ପ୍ରଶ୍ନୋତ୍ତର କାଳକୁ ବାତିଲ କରାଯାଇଥିଲା। ତେବେ ସଦସ୍ୟମାନଙ୍କୁ ଲିଖିତ ପ୍ରଶ୍ନ ଯୋଗାଇ ଦିଆଯାଇଥିଲା। ଅପରାହ୍ନ ୩ଟାରେ ଦ୍ୱିତୀୟ ପର୍ଯ୍ୟାୟ ଗୃହ କାର୍ଯ୍ୟ ଆରମ୍ଭ ହୋଇଥିଲା।
୭ ବିଲ୍ ଉପସ୍ଥାପିତ
ମୌସୁମୀ ଅଧିବେଶନର ପ୍ରଥମ ଦିନରେ ରାଜ୍ୟ ସରକାର ବିଧାନସଭାର ଅନୁମୋଦନ ଲାଗି ୭ଟି ବିଲ୍କୁ ଉପସ୍ଥାପନ କରିଛନ୍ତି। ସେହି ବିଲ୍ଗୁଡିକ ହେଲା ଓଡ଼ିଶା ବିଶ୍ୱବିଦ୍ୟାଳୟ (ସଂଶୋଧନ) ବିଲ୍-୨୦୨୦, ଓଡ଼ିଶା ମ୍ୟୁନିସିପାଲ (ସଂଶୋଧନ) ବିଲ୍-୨୦୨୦, ଓଡ଼ିଶା କୋର୍ଟ ଫି’ (ସଂଶୋଧନ) ବିଲ୍-୨୦୨୦, ଓଡ଼ିଶା ଆଇନଜୀବୀ କଲ୍ୟାଣ ପାଣ୍ଠି (ସଂଶୋଧନ) ବିଲ୍-୨୦୨୦, ମହାମାରୀ ରୋଗ (ଓଡ଼ିଶା ସଂଶୋଧନ) ବିଲ୍-୨୦୨୦, ଓଡ଼ିଶା ଶିଳ୍ପ ବିବାଦ (ସଂଶୋଧନ) ବିଲ୍-୨୦୨୦ ଏବଂ ଦ୍ରବ୍ୟ ଓ ସେବା ଟିକସ(ଜିଏସ୍ଟି) ସଂଶୋଧନ ବିଲ୍-୨୦୨୦ । ଉଚ୍ଚଶିକ୍ଷା ମନ୍ତ୍ରୀ, ସ୍ବାସ୍ଥ୍ୟ ମନ୍ତ୍ରୀ, ଗୃହ ନିର୍ମାଣ ଓ ନଗର ଉନ୍ନୟନ, ଆଇନ ମନ୍ତ୍ରୀ, ଶିଳ୍ପ ମନ୍ତ୍ରୀ ଉକ୍ତ ବିଲ୍ଗୁଡିକୁ ବିଧାନସଭାରେ ଉପସ୍ଥାପନ କରିଛନ୍ତି।
