ନୂଆଦିଲ୍ଲୀ,୩୧।୭: ସଂସଦର ମୌସୁମୀ ଅଧିବେଶନ ଅଚଳ ହୋଇପଡ଼ିଛି। ଜୁଲାଇ ୧୯ରୁ ଆରମ୍ଭ ହୋଇଥିବା ସଂସଦର ମୌସୁମୀ ଅଧିବେଶନ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବାର କାର୍ଯ୍ୟକ୍ରମ ରହିଛି। ଅଧିବେଶନରେ ୧୯ଟି ସାଧାରଣ କାର୍ଯ୍ୟ ଦିବସକୁ ସାମିଲ୍ କରାଯାଇଛି । ବିରୋଧୀଙ୍କ ପ୍ରବଳ ହଟ୍ଟଗୋଳ ଯୋଗୁ ଅଧା କାର୍ଯ୍ୟ ଦିବସ ବିତିସାରିଛି। ଏପର୍ଯ୍ୟନ୍ତ କେବଳ ତିନୋଟି ବିଲ ପାରିତ ହୋଇଛି। ମୌସୁମୀ ଅଧିବେଶନରେ ଇତିମଧ୍ୟରେ ରାଜ୍ୟସଭା କେବଳ ୮.୨ ଘଣ୍ଟା କାର୍ଯ୍ୟ ହୋଇଛି। ଫଳରେ ସମୟ ପୂର୍ବରୁ ମୌସୁମୀ ଅଧିବେଶନ ଶେଷ ହେବା ଆଶଙ୍କା ସୃଷ୍ଟି ହୋଇଛି। ଏନେଇ ସରକାରଙ୍କ ପକ୍ଷରୁ ଯୋଜନା କରାଯାଉଥିବା ଚର୍ଚ୍ଚା ହେଉଛି।
ସରକାରଙ୍କର ୨୬.୯୨୫ କୋଟି କ୍ଷତି
ପେଗାସସ ଗୁପ୍ତଚରୀ ମାମଲା ଉପରେ ଆଲୋଚନା ପାଇଁ ଦାବି କରୁଥିବା ବିରୋଧୀଙ୍କ ହଟ୍ଟଗୋଳ ଯୋଗୁଁ ଏପର୍ଯ୍ୟନ୍ତ ରାଜ୍ୟ ସଭାର ମୋଟ ୩୩.୮ ଘଣ୍ଟା ନଷ୍ଟ ହୋଇ ସାରିଛି। ସଂସଦକୁ ବର୍ତ୍ତମାନ ସୋମବାର ପର୍ଯ୍ୟନ୍ତ ସ୍ଥଗିତ ରଖାଯାଇଛି। ସଂସଦ ଅଚଳ ହୋଇପଡ଼ିଥିବାରୁ ସରକାରଙ୍କର ଏପର୍ଯ୍ୟନ୍ତ ୨୬.୯୨୫ କୋଟି ଟଙ୍କାର କ୍ଷତି ହୋଇଛି। କେନ୍ଦ୍ର ସରକାରଙ୍କ ପନକ୍ଷରୁ ଅଭିଯୋଗ ହୋଇଛି ଯେ, ସରକାର ସଂସଦରେ ପ୍ରତ୍ୟେକ ପ୍ରସଙ୍ଗରେ ଆଲୋଚନା କରିବାକୁ ପ୍ରସ୍ତୁତ, କିନ୍ତୁ ବିରୋଧୀ ଏହା ଚାହୁଁ ନାହାଁନ୍ତି। ଏହାୋଯାଗୁ ସମୟର ସମ୍ପୂର୍ଣ୍ଣ ଅପଚୟ ହେଉଛି।
ସରକାର ଆଉ ଥରେ ଚେଷ୍ଟା କରିବେ
ତେବେ କାର୍ଯ୍ୟସୂଚୀ ପୂର୍ବରୁ ମୌସୁମୀ ଅଧିବେଶନକୁ ଶେଷ କରିବା ପୂର୍ବରୁ ସରକାର ଉଭୟ ଗୃହରେ ଶାନ୍ତିପୂର୍ଣ୍ଣ କାର୍ଯ୍ୟ ଜାରି ରଖିବା ପାଇଁ ସହମତି ନିମନ୍ତେ ବିରୋଧୀ ଦଳର ନେତାମାନଙ୍କୁ ବୁଝାଶୁଝା ଲାଗି ପ୍ରୟାସ କରିବାର ସମ୍ଭାବନା ରହିଛି। ଅଧିବେଶନ ଆରମ୍ଭ ହେବା ଦିନଠାରୁ କଂଗ୍ରେସ, ତୃଣମୂଳ କଂଗ୍ରେସ ଏବଂ ଶିରୋମଣି ଅକାଲୀ ଦଳ, ବହୁଜନ ସମାଜ ବାଦୀ ପାର୍ଟି, ଡିଏମ୍କେ, ବାମପନ୍ଥୀ ଦଳ, ପକ୍ଷରୁ ସଂସଦର ଉଭୟ ଗୃହରେ ବିକ୍ଷୋଭ ପ୍ରଦର୍ଶନ ଜାରି ରହିଛି। ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କଂଗ୍ରେସ ନେତା ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ସାକ୍ଷାତ ପର ଠାରୁ ବିରୋଧୀଙ୍କ ମଧ୍ୟରେ ସମନ୍ବୟ ଦେଖାଯାଉଛି।
କେବଳ ତିନୋଟି ବିଲ ପାସ ହୋଇଛି
ମୌସୁମୀ ଅଧିବେଶନରେ ଇତିମଧ୍ୟରେ ରାଜ୍ୟ ସଭାରେ ସିପିଂ ସାମୁଦ୍ରିକ ସହାୟତା ବିଲ ୨୦୨୧, ଜୁଭେନାଇଲ ଜଷ୍ଟିସ (ଶିଶୁମାନଙ୍କର ଯତ୍ନ ଏବଂ ସୁରକ୍ଷା) ସଂଶୋଧନ ବିଲ ୨୦୨୧ ଏବଂ ଫ୍ୟାକ୍ଟରିଂ ରେଗୁଲେସନ ସଂଶୋଧନ ବିଲ ୨୦୨୧ ଆଦି ୩ଟି ବିଲ୍ ପାରିତ ହୋଇଛି। ସୋମବାର, ସଂସଦରେ ପୁଣି ଥରେ କାର୍ଯ୍ୟ ଆରମ୍ଭ ହେବ। କେନ୍ଦ୍ର ସରକାର ଏନେଇ ଏକ ନୂତନ ରଣନୀତି ଆପଣାଇବାକୁ ଚାହୁଁଛନ୍ତି। ଏହା ଫଳପ୍ରଦ ହେଉ ନ ହେଲେ ସରକାର ଅଧିବେଶନ ଶେଷ କରିବାର ଆଶଙ୍କା ରହିଛି।
