ବରଗଡ଼ ଅଫିସ୍,୨୫।୨: ରାଜ୍ୟ ସରକାରଙ୍କ ବଳରାମ ଯୋଜନା ଗୁରୁବାର ବରଗଡ଼ ଜିଲାରେ ଆରମ୍ଭ ହୋଇଛି। ଅତାବିରା ସମବାୟ କେନ୍ଦ୍ର ବ୍ୟାଙ୍କ ଶାଖାରେ କାର୍ଯ୍ୟକ୍ରମର ଶୁଭାରମ୍ଭ ହୋଇଛି। ଅତାବିରା ବ୍ଳକ ଅନ୍ତର୍ଗତ ମନାପଡ଼ା ଗ୍ରାମର ମହାଲକ୍ଷ୍ମୀ ଯୁଗ୍ମଦେୟ ଗୋଷ୍ଠିକୁ ୧ ଲକ୍ଷ ୬୦ ହଜାର ଟଙ୍କାର କୃଷି ଋଣ ପ୍ରଦାନ କରି ମୁଖ୍ୟ ଜିଲା କୃଷି ଅଧିକାରୀ ଦୀନବନ୍ଧୁ ଗାନ୍ଧୀ ଏହାର ଶୁଭାରମ୍ଭ କରିଛନ୍ତି। ଉକ୍ତ ଗୋଷ୍ଠିରେ ୫ଜଣ ଭୂମିହୀନ ଭାଗ ଚାଷୀ କୃଷ୍ଣଚନ୍ଦ୍ର ସାହୁ, ଅଜିତ କଠାର, ସନ୍ତୋଷ ବାଗ, ବୃନ୍ଦାବନ ଗୁରୁ ଏବଂ ଗୋବିନ୍ଦ ଗୁରୁ ସଭ୍ୟ ଭାବେ ରହିଥିବା ଜିଲା କୃଷି ବିଭାଗ ପକ୍ଷରୁ ସୂଚନା ଦିଆଯାଇଛି। କାର୍ଯ୍ୟକ୍ରମରେ ଭଟଲି କୃଷି ଅଧିକାରୀ ସୋମନାଥ ରଣା, ଅତାବିରା ବ୍ଲକ କୃଷି ଅଧିକାରୀ ବିଜୟ କୁମାର ପଟ୍ଟନାୟକଙ୍କ ସହ ଅନ୍ୟ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ।
