ଲୋଇସିଂହା,୧୭ା୧(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ବ୍ଲକ୍ ରତାଖଣ୍ଡି ପଞ୍ଚାୟତ ଅଧୀନ ରତାଖଣ୍ଡି ଗ୍ରାମର ରାଉତ ବରିହାଙ୍କ ଗତ ଜୁଲାଇରେ ମୃତ୍ୟୁ ଘଟିଛି। କିନ୍ତୁ ପଞ୍ଚାୟତ ପକ୍ଷରୁ ଗ୍ରାମର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିନ୍ତ କର୍ମନିଯୁକ୍ତି ଯୋଜନା(ଏମ୍ଜିଏନ୍ଆର୍ଇଜିଏସ୍) କାମରେ ମୃତ ରାଉତ ଗୋଟିଏ ସପ୍ତାହ କାମ କରିଥିବା ନେଇ ମାଷ୍ଟରରୋଲରେ ହାଜରା ପକାଇ ଟଙ୍କା ଉଠାଯାଇଛି। ଏନେଇ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଇ-ଅଭିଯୋଗରେ ଅଭିଯୋଗ ହେବା ପରେ ତଦନ୍ତ ଆରମ୍ଭ ହୋଇଛି। ଶୁକ୍ରବାର ବଲାଙ୍ଗୀର ପିଡି ଡିଆର୍ଡିଏ କାର୍ଯ୍ୟାଳୟର କର୍ମଚାରୀ ଓ ବ୍ଲକ୍ର ସହକାରୀ ଯନ୍ତ୍ରୀ ସିଦ୍ଧାର୍ଥ ପାଢ଼ୀ ଉକ୍ତ ପଞ୍ଚାୟତକୁ ଯାଇ ତଦନ୍ତ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ରତାଖଣ୍ଡି ଗ୍ରାମର ଗୁଏପିଟା ଡଙ୍ଗରରେ ଏମ୍ଜିଏନ୍ଆରଇଜିଏସ୍ରେ ଷ୍ଟେଗର୍ଡ ଟ୍ରେଞ୍ଚ କାମ ହୋଇଛି। ଏହି ପ୍ରକଳ୍ପର ୱାର୍କ କୋଡ୍ ନଂ ୨୪୦୯୦ ୧୦୦୧୪/ ୧୧୧୯୩୫୫୧ ରହିଛି। ଗଁା ସାଥୀ ବା ମେଟ୍ ସୁଲଖ୍ନା ବରିହାଙ୍କ ତତ୍ତ୍ୱାବଧାନରେ କାମ କରାଯାଇଛି। ପ୍ରକଳ୍ପର ମାଷ୍ଟର ରୋଲ ନମ୍ବର ୮୬୭୯ରେ ୨୦୨୫ ଡିସେମ୍ବରେ ଗୋଟିଏ ସପ୍ତାହ ଧରି ୧୦ ଜଣ ଜବକାର୍ଡଧାରୀ ଶ୍ରମିକ ଉକ୍ତ ପ୍ରକଳ୍ପରେ କାମ କରିଛନ୍ତି। ଶ୍ରମିକ ପାଉଣା ବାବଦକୁ ସେମାନଙ୍କୁ ମୋଟ ୧୯ ହଜାର ୧୧୦ ଟଙ୍କା ପଇଠ ହୋଇଛି। ଏଠାରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା କାମ କରିଥିବା ଶ୍ରମିକଙ୍କ ମଧ୍ୟରେ ମୃତକ ରାଉତ ବରିହାଙ୍କ ନାମ ରହିଛି। ୨୦୨୫ ଜୁଲାଇ ୪ରେ ରାତଉଙ୍କ ମୃତ୍ୟୁ ଘଟିଛି। ହେଲେ ୨୦୨୫ ଡିସେମ୍ବର ୨୧ରୁ ୨୭ ତାରିଖ ପର୍ଯ୍ୟନ୍ତ ରାଉତ କାମ କରିଥିବା ନେଇ ଉକ୍ତ ମାଷ୍ଟର ରୋଲରେ ଦର୍ଶାଯାଇଛି। ୭ ଦିନ କାମ କରିଥିବା ମୃତ ଶ୍ରମିକଙ୍କୁ ଦୈନିକ ୨୭୩ ଟଙ୍କା ହିସାବରେ ୧୯୧୧ ଟଙ୍କା ପାଉଣା ଦିଆଯାଇଛି। ବ୍ଲକ୍ ଅଧୀନ ଏସ୍ବିଆଇ ଆକାଉଣ୍ଟରେ ମୃତ ଶମିକଙ୍କ ଟଙ୍କା ପଇଠ କରାଯାଇଛି। ପଞ୍ଚାୟତର ସରପଞ୍ଚ, ଦାୟିତ୍ୱରେ ଥିବା ଯନ୍ତ୍ରୀ ଏବଂ ଗଁାସାଥୀଙ୍କ ମଧୁଚନ୍ଦ୍ରିକାରେ ଅନିୟମିତତା କରି ଅନୁଦାନ ଅର୍ଥ ଆତ୍ମସାତ କରାଯାଇଥିବା ନେଇ ଗ୍ରାମର ସୁଶାନ୍ତ ବରିହା ୨୦୨୫ ଡିସେମ୍ବର ୨୮ରେ ମୁଖ୍ୟମନ୍ତ୍ରୀ, ବଲାଙ୍ଗୀର ଜିଲାପାଳ, ଜିଲା ପ୍ରକଳ୍ପ କାର୍ଯ୍ୟନିର୍ବାହୀ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ସ୍ଥାନୀୟ ବ୍ଲକ ପ୍ରଶସନ ପକ୍ଷରୁ କ୍ଷେତ୍ର ପରିଦର୍ଶନ କରାଯାଇଥିଲେ ସୁଦ୍ଧା ଉପଯୁକ୍ତ ତଦନ୍ତ କରା ନ ଯାଇ ତାଙ୍କ ଉପରେ ମାନସିକ ଚାପ ପ୍ରୟୋଗ ପାଇଁ ଉଦ୍ୟମ କରାଯାଇଥିଲା। ଏହାପରେ ସୁଶାନ୍ତ ପ୍ରଧାନମନ୍ତ୍ରୀଙ୍କ ନିକଟରେ ଇ-ଅଭିଯୋଗ ଦାଖଲ କରିବାରୁ ଶୁକ୍ରବାର ବଲାଙ୍ଗୀର ଜିଲା ପ୍ରକଳ୍ପ କାର୍ଯ୍ୟାଳୟ ଓ ବ୍ଲକର ଅଧିକାରୀ ପୁଣି ତଦନ୍ତ କରିଥିବା ସେ ଜଣାଇଛନ୍ତି। ଏସମ୍ପର୍କରେ ସରପଞ୍ଚ ହିମାଞ୍ଚଳ ମେହେରଙ୍କୁ ପଚାରିବାରୁ ମୃତକ ରାଉତଙ୍କ ନାମରେ ମାଷ୍ଟରରୋଲରେ ୭ ଦିନର ହାଜରା ପକାଇ ଟଙ୍କା ଉଠାଣକୁ ସେ ସ୍ବୀକାର କରିଛନ୍ତି। ବଲାଙ୍ଗୀର ଏବଂ ବ୍ଲକର ଅଧିକାରୀ ତଦନ୍ତ ପାଇଁ ଆସି ପଇଠ ଟଙ୍କା ସରକାରୀ ଆକାଉଣ୍ଟକୁ ଫେରସ୍ତ କରାଯିବ ବୋଲି ସେ କହିଛନ୍ତି। ଏସମ୍ପର୍କରେ ବ୍ଲକ୍ ସହକାରୀ ଯନ୍ତ୍ରୀ ସିଦ୍ଧାର୍ଥ ପାଢ଼ୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ ରିସିପ୍ କରି ନ ଥିଲେ। ସରକାର ଏମ୍ଜିଏନ୍ଆର୍ଇଜିଏସ୍ରେ ସ୍ବଚ୍ଛତା ଆଣିବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରିବା ସତ୍ତ୍ୱେ କେତେଜଣ ଦୁର୍ନୀତିଖୋର ଅଧିକାରୀ ଓ କର୍ମଚାରୀଙ୍କ ଯୋଗୁ ଯୋଜନା ବାଟବଣା ହୋଇପଡିଛି। ଏହି ଅନିୟମିତତାରେ ସମ୍ପୃକ୍ତ ଅଧିକାରୀ ଓ କର୍ମଚାରୀ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
