କଟକ, ୨୪।୪(ଶିଳ୍ପା ପ୍ରିୟଦର୍ଶିନୀ): ନିର୍ବାଚନ ୨୦୨୪ରେ ବାରବାଟୀ-କଟକ ଆସନକୁ ନେଇ କଂଗ୍ରେସକୁ ଘାରିଛି ଚିନ୍ତା। କଂଗ୍ରେସ ବରିଷ୍ଠ ନେତା ମହମ୍ମଦ ମୋକିମଙ୍କ ଜାମିନକୁ ସୁପ୍ରିମକୋର୍ଟ ମଞ୍ଜୁର କରିଛନ୍ତି ହେଲେ ନିମ୍ନ ଅଦାଲତର ରାଏ ନେଇ ସ୍ଥଗିତାଦେଶ ସୁପ୍ରିମକୋର୍ଟ ଦେଇ ନାହାଁନ୍ତି। ଏନେଇ ବୁଧବାର କଂଗ୍ରେସ ସେଲଟରଛକସ୍ଥିତ କାର୍ଯ୍ୟାଳୟରେ କର୍ମୀଙ୍କୁ ନେଇ ବୈଠକ ସକାଳୁ ଜାରି ରହିଛି। ବୈଠକରେ ବରିଷ୍ଠ ଓ ସମସ୍ତ କର୍ମୀ ଉପସ୍ଥିତ ରହିଛନ୍ତି। ତେବେ ମହମ୍ମଦ ମୋକିମ ନିର୍ବାଚନ ଲଢ଼ି ପାରିବେନି ତାହା ସ୍ପଷ୍ଟ ହେବା ପରେ ଏବେ ତାଙ୍କ ଝିଅ ସୋଫିଆ ଫିରଦୋସଙ୍କୁ ନେଇ ଜୋର ଧରିଛି ଚର୍ଚ୍ଚା। ଏନେଇ ମହମ୍ମଦ ମୋକିମ କହିଛନ୍ତି, ଯେ କର୍ମୀଙ୍କୁ ନେଇ ଆଲୋଚନା କରାଯାଉଛି, ଏପରିକି ସୋଫିଆଙ୍କ ନାଁ କର୍ମୀ ପ୍ରସ୍ତାବ ଦେଉଛନ୍ତି, ଆଲୋଚନା ଜାରି ରହିବ ଏବଂ ସମସ୍ତ ବିଷୟରେ ପିସିସିଙ୍କୁ ଅବଗତ କରାଯିବ ପରେ ଯାହା ନିଷ୍ପତ୍ତି ରହିବ ତାହା ସମସ୍ତେ ଜାଣିବେ। ଆଇନଗତ ଯାହାକି ସମସ୍ୟା ରହିଛି, ତାକୁ ବିରୋଧୀ ଦଳ ରାଜନୀତିରେ ସମ୍ପୃକ୍ତ କରିଛି। ହେଲେ ମୋର ନ୍ୟାୟାଳୟ ଉପରେ ଭରସା ରହିଛି ଉପଯୁକ୍ତ ନ୍ୟାୟ ମିଳିବ। ସାଧାରଣ ଲୋକ ହିଁ ଜଣାଇବେ ଯେ କଟକ ପାଇଁ କିଏ ପ୍ରକୃତ ନେତା। ଦଳ ପାଇ ଶେଷନିଃଶ୍ୱାସ ତ୍ୟାଗ କରିବା ଯାଏ କାମ କରିବି।
ସୂଚନାଯୋଗ୍ୟ, ଓଡ଼ିଶା ରୁରାଲ୍ ହାଉସିଂ ଡେଭଲପ୍ମେଣ୍ଟ କର୍ପୋରେଶନ୍ (ଓଆର୍ଏଚ୍ଡିସି) ଋଣ ଦୁର୍ନୀତି ମାମଲାରେ ମେଟ୍ରୋ ବିଲ୍ଡର୍ସର ପରିଚାଳନା ନିର୍ଦ୍ଦେଶକ ତଥା ବାରବାଟୀ-କଟକ ବିଧାୟକ ମହମ୍ମଦ ମୋକିମ୍ଙ୍କୁ ମଙ୍ଗଳବାର ସୁପ୍ରିମକୋର୍ଟରୁ ଆଶ୍ୱସ୍ତି ମିଳିଛି। ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ କୋର୍ଟ ଦେଇଥିବା ୩ ବର୍ଷ ସଶ୍ରମ କାରାଦଣ୍ଡ ଓ ୫୦ହଜାର ଟଙ୍କା ଜରିମାନା ରାୟ ବିରୋଧରେ ମୋକିମ୍ ସୁପ୍ରିମ କୋର୍ଟରେ କରିଥିବା ସ୍ପେଶିଆଲ୍ ଲିଭ୍ ପିଟିଶନ୍(ଏସ୍ଏଲ୍ପି) ଦାଖଲ କରିଥିଲେ। ଏହାର ଶୁଣାଣି କରି ବିଚାରପତି ସୂର୍ଯ୍ୟକାନ୍ତ ଏବଂ ଦୀପଙ୍କର ଦତ୍ତଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶେଷ ପର୍ଯ୍ୟନ୍ତ ଭିଜିଲାନ୍ସ ଅଦାଲତର ଦଣ୍ଡାଦେଶକୁ ଖାରଜ (ସସ୍ପେଣ୍ଡ) କରିବା ସହ ରାଜ୍ୟ ସରକାରଙ୍କୁ ନୋଟିସ୍ ଜାରି କରିଛନ୍ତି। ମୋକିମ୍ଙ୍କୁ ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ ଅଦାଲତ ୨୦୨୨ ସେପ୍ଟେମ୍ବର ୨୯ରେ ଦେଇଥିବା ଦଣ୍ଡାଦେଶକୁ ଗତ ୧୦ତାରିଖରେ ଓଡ଼ିଶା ହାଇକୋର୍ଟ କାଏମ୍ ରଖିଥିଲେ। ଏହି ରାୟକୁ ଚ୍ୟାଲେଞ୍ଜ କରି ମୋକିମ୍ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ପ୍ରକାଶ ଯେ, ମେଟ୍ରୋ ବିଲଡର୍ସ ପକ୍ଷରୁ ଭୁବନେଶ୍ୱରରେ ୫୦ଟି ଫ୍ଲାଟ୍ ତିଆରି କରିବା ପାଇଁ ଓଆର୍ଏଚ୍ଡିସିରୁ ୨୦୦୦ ଅଗଷ୍ଟ ୨୮ ତାରିଖରେ ୧.୫୦କୋଟି ଟଙ୍କାର ଋଣ କରାଯାଇଥିଲା। ଓଆର୍ଏଚ୍ଡିସିର ତତ୍କାଳୀନ ପରିଚାଳନା ନିର୍ଦ୍ଦେଶକ ଆଇଏଏସ୍ ଅଧିକାରୀ ବିନୋଦ କୁମାର ମେଟ୍ରୋ ବିଲ୍ଡର୍ସର ନଥିପତ୍ର ଠିକ୍ ରୂପେ ଯାଞ୍ଚ ନ କରି ବେଆଇନ ଭାବେ ଋଣ ଆବେଦନକୁ ମଞ୍ଜୁର କରିଥିଲେ। ଓଆର୍ଏଚ୍ଡିସିରୁ ମେଟ୍ରୋ ବିଲ୍ଡର୍ସକୁ ୩ଟି କିସ୍ତିରେ ମୋଟ ଋଣ ରାଶି ପ୍ରଦାନ କରାଯାଇଥିଲା। ପ୍ରଥମ କିସ୍ତିରେ ୧କୋଟି, ୨ୟ କିସ୍ତିରେ ୩୦ ଲକ୍ଷ ଓ ୩ୟ କିସ୍ତିରେ ୨୦ ଲକ୍ଷ ଟଙ୍କା ମେଟ୍ରୋ ବିଲଡର୍ସ ଋଣ ଗ୍ରହଣ କରିଥିଲା। ମାତ୍ର ପରବର୍ତ୍ତୀ ସମୟରେ ମେଟ୍ରୋ ବିଲ୍ଡର୍ସ ପକ୍ଷରୁ ଋ଼ଣ ପରିଶୋଧ କରା ନ ଯିବାରୁ ୨୦୦୭ ଅକ୍ଟୋବର ୩୦ବେଳକୁ ଋଣ ପରିମାଣ ୬କୋଟି ୨୨ଲକ୍ଷ ୨୫ ହଜାରରେ ପହଞ୍ଚତ୍ଥିଲା। ଯଦ୍ଦ୍ବାରା ଓଆର୍ଏଚ୍ଡିସିକୁ ଏକ ବିରାଟ କ୍ଷତିର ସମ୍ମୁଖୀନ ହେବାକୁ ପଡ଼ିଥିଲା। ଓଆର୍ଏଚ୍ଡିସି ପକ୍ଷରୁ ଏହି ଘଟଣାରେ ତତ୍କାଳୀନ ପରିଚାଳନା ନିର୍ଦ୍ଦେଶକ ବିନୋଦ କୁମାର, କମ୍ପାନୀ ସେକ୍ରେଟାରି ସ୍ମୃତିରଞ୍ଜନ ମହାପାତ୍ର, ମେଟ୍ରୋ ବିଲ୍ଡର୍ସର ପରିଚାଳନା ନିର୍ଦ୍ଦେଶକ ମହମ୍ମଦ୍ ମୋକିମ୍, ନିର୍ଦ୍ଦେଶକ ପୀୟୂଷଧାରୀ ମହାନ୍ତିଙ୍କ ନାମରେ ମାମଲା ରୁଜୁ ହୋଇଥିଲା।
