ନୂଆଦିଲ୍ଳୀ,୧୬।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ କଂଗ୍ରେସ ଗୁରୁତର ଅଭିଯୋଗ ଆଣିଛି। ପ୍ରଧାନମନ୍ତ୍ରୀ ମୋଦି ଗଣତନ୍ତ୍ର ସହ ଖେଳୁଛନ୍ତି, ସେ ନିର୍ବାଚନରେ ଜିତିବା ପାଇଁ ଇସ୍ରାଏଲର ସହାୟତା ନେଉଛନ୍ତି। ଇସ୍ରାଏଲ ଏଜେନ୍ସି ସାହାଯ୍ୟରେ ଦେଶରେ ନିର୍ବାଚନକୁ ପ୍ରଭାବିତ କରୁଛନ୍ତି ବୋଲି ଏକ ସାମ୍ବାଦିକ ସମ୍ମିଳନୀରେ କଂଗ୍ରେସ ମୁଖପାତ୍ର ସୁପ୍ରିୟା ଶ୍ରୀନେଟ ଏବଂ ପୱନ ଖେଡା ଦାବି କରିଛନ୍ତି।
ପୱନ ଖେଡା କହିଛନ୍ତି, ଦେଶର ଗଣତନ୍ତ୍ର ବିପଦରେ ଅଛି, ମୋଦି ସରକାରରେ ବସି ଅନ୍ୟ ଦେଶକୁ ଭେଟି ନିଜ ଦେଶର ଗଣତନ୍ତ୍ର ବିରୋଧରେ ଷଡଯନ୍ତ୍ର କରୁଛନ୍ତି। ସେହିପରି କଂଗ୍ରେସ ମୁଖପାତ୍ର ସୁପ୍ରିୟା ଶ୍ରୀନେଟ କହିଛନ୍ତି, ଅନ୍ତର୍ଜାତୀୟ ସମୂହର ସାମ୍ବାଦିକ ଗୋଷ୍ଠୀ ଦାବି ମୁତାବକ
ଇସ୍ରାଏଲ କଣ୍ଟ୍ରାକ୍ଟରର୍ସମାନେ ବିଶ୍ୱରେ ତିନୋଟି ନିର୍ବାଚନକୁ ପ୍ରଭାବିତ କରିଛନ୍ତି। ଏହାର ମୁଖ୍ୟ କୌଶଳ ହେଉଛି ମିଥ୍ୟା ପ୍ରଚାର କରିବା। ଏହି ଏଜେନ୍ସିଗୁଡ଼ିକର ଚିହ୍ନ ମଧ୍ୟ ଭାରତରେ ଦେଖିବାକୁ ମିଳିଛି। ସରକାରଙ୍କ ସହମତି ବିନା ଏହା ହୋଇପାରିବ ନାହିଁ। ମିଥ୍ୟା ପ୍ରଚାର କରିବାର ପଦ୍ଧତି ଭାଜପା ଆଇଟି ସେଲ ସହିତ ମେଳ ଖାଉଛି। ରାହୁଲ ଗାନ୍ଧୀଙ୍କ ବିରୋଧରେ ଭାଜପା ମିଥ୍ୟା ପ୍ରଚାର କରୁଛି। ଅତୀତରେ ଭାରତ ଯୋଡୋ ଯାତ୍ରା ସମୟରେ ଭାଜପା ଆଇଟି ସେଲ ଏକ ମିଥ୍ୟା ପ୍ରଚାର କରିଥିଲା ଯେ ପାକିସ୍ତାନ ଜିନ୍ଦାବାଦର ସ୍ଲୋଗାନ ଦେଇଥିବା ଝିଅ ରାହୁଲ ଗାନ୍ଧୀଙ୍କୁ ଭେଟିଥିଲେ। ସେହିଭଳି ରାହୁଲ ଗାନ୍ଧୀଙ୍କ ବିବୃତ୍ତି ଉଦୟପୁର ହତ୍ୟାକାଣ୍ଡ ସହିତ ଭୁଲ ଭାବରେ ଜଡିତ କରାଯାଇଥିଲା।
