ନୂଆଦିଲ୍ଲୀ, ୨୮।୭: ପ୍ରଥମ ଭାରତୀୟ ମହିଳା ଭାବେ ପ୍ୟାରିସ୍ ଅଲିମ୍ପିକ୍ସରେ ଶୁଟିଂ ଇଭେଣ୍ଟରୁ ବ୍ରୋଞ୍ଜ ପଦକ ଜିତିଥିବା ମନୁ ଭାକରଙ୍କ ନିକଟକୁ ପ୍ରଶଂସାର ସୁଅ ଛୁଟିବାରେ ଲାଗିଛି। ଏଥିରେ ରାଷ୍ଟ୍ରପତି ଦୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଆରମ୍ଭ କରି ଦେଶର ଅନେକ ସ୍ପୋର୍ଟିଂ ଆଇକନ୍ ସାମିଲ ହୋଇଛନ୍ତି।
ଦେଶ ପାଇଁ ପଦକ ଜିତିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମନୁ ଭାକରଙ୍କ ସହ ଫୋନରେ କଥା ହୋଇଛନ୍ତି। ଏହାର ଭିଡିଓ ମଧ୍ୟ ସାମ୍ନାକୁ ଆସିଛି। ଦୁହିଁଙ୍କ ମଧ୍ୟରେ ଦୀର୍ଘ ସମୟ ଧରି କଥାବାର୍ତ୍ତା ହୋଇଥିଲା। ପ୍ରଧାନମନ୍ତ୍ରୀଙ୍କ ସହ କଥା ହେବା ପରେ ସୁଟର କହିଛନ୍ତି, ମୁଁ ନିଜକୁ ଭାଗ୍ୟବାନ ମନେ କରୁଛି ସେ ସେ ତାଙ୍କ ବ୍ୟସ୍ତବହୁଳ କାର୍ଯ୍ୟସୂଚୀରୁ ସମୟ ବାହାର କରିଥିଲେ। ଆମର ଦୀର୍ଘ ସମୟ କଥାବାର୍ତ୍ତା ହୋଇଥିଲା। ସେ ମୋତେ ଅଭିନନ୍ଦନ ଜଣାଇଥିଲେ। ଏହା ମୋ ପାଇଁ ଖାସ୍ ବିଷୟ।
ଏହାପୂର୍ବରୁ ମୋଦି ଟୁଇଟ୍ ଯୋଗେ ମନୁଙ୍କୁ ଶୁଭେଚ୍ଛ ଜଣାଇଥିଲେ। ”ଏକ ଐତିହାସିକ ପଦକ, ପ୍ୟାରିସ୍ ଅଲିମ୍ପିକ୍ସରେ ଭାରତ ପାଇଁ ପ୍ରଥମ ପଦକ ଜିତିଥିବା ମନୁ ଭାକରଙ୍କୁ ବ୍ରୋଞ୍ଜ ପାଇଁ ଅଭିନନ୍ଦନ। ପ୍ରଥମ ଭାରତୀୟ ମହିଳାଭାବେ ଶୁଟିଂରୁ ପଦକ ଜିତିଥିବାରୁ ଏହି ସଫଳତା ଅଧିକ ସ୍ବତନ୍ତ୍ର ହୋଇଯାଇଛି। ଅଦ୍ଭୁତପୂର୍ବ ସଫଳତା“ ବୋଲି ମୋଦି ଟୁଇଟ କରି କହିଥିଲେ।
