ଭୁବନେଶ୍ୱର, ୪।୧୦(ବ୍ୟୁରୋ): ୟୁପିଏସ୍ସି ଦ୍ୱାରା ପରିଚାଳିତ ସିଭିଲ୍ ସର୍ଭିସେସ୍ ପରୀକ୍ଷାର ପ୍ରିଲିମ ରବିବାର ଅନୁଷ୍ଠିତ ହେବ। ବର୍ତ୍ତମାନ ସୁଦ୍ଧା କରୋନା ମହାମାରୀ ଯୋଗୁ ଯାତାୟାତ ସ୍ଥିତି ସ୍ବାଭାବିକ ହୋଇପାରିନି। ତେଣୁ ଛାତ୍ରୀଛାତ୍ରମାନେ ପରୀକ୍ଷା କେନ୍ଦ୍ରକୁ ସୁବିଧାରେ ଯିବା ପାଇଁ କଟକ ଓ ଭୁବନେଶ୍ୱରରେ ‘ମୋ ବସ୍’ ସେବା ଯୋଗାଇ ଦେବାକୁ କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ (କ୍ରୁଟ୍) ପକ୍ଷରୁ ସୂଚନା ଦିଆଯାଇଛି। ରୁଟ୍ ନଂ. ୧୬ ଓ ୧୮ରେ ମୋ ବସ୍ ଚଳାଚଳ କରିବ। ଭୁବନେଶ୍ୱରରେ ସକାଳ ୬ଟାରୁ ସାଢେ ୬ଟା ପର୍ଯ୍ୟନ୍ତ ପ୍ରତି ୧୦ ମିନିଟ୍ ବ୍ୟବଧାନରେ ଓ କଟକରେ ଅପରାହ୍ନ ୪ଟା ୫୦ରୁ ୫ଟା ୩୫ ଯାଏ ପ୍ରତି ୧୫ ମିନିଟ ବ୍ୟବଧାନରେ ବସ୍ ମିଳିବ। ୧୬ ନମ୍ବର ରୁଟ୍ରେ ବସ୍ଗୁଡ଼ିକ ମାଷ୍ଟରକ୍ୟାଣ୍ଟିନ୍ରୁ ବାହାରି ଜାତୀୟ ରାଜପଥ ଦେଇ କଟକ ବିଜୁପଟ୍ଟନାୟକ ପାର୍କ ଯାଏ ଯିବ। ସେହିପରି ୧୮ ନମ୍ବର ରୁଟ୍ରେ ବସ୍ଗୁଡ଼ିକ ବରମୁଣ୍ଡା ବସ୍ଷ୍ଟାଣ୍ଡ୍ରୁ ବାହାରି ଜୟଦେବ ବିହାର ଦେଇ ନନ୍ଦନକାନନ, ବାରଙ୍ଗ, ତ୍ରିଶୁଳିଆ ବ୍ରିଜ୍, ହାଇକୋର୍ଟ ରୋଡ୍, ବାଦାମବାଡି ବସ୍ଷ୍ଟାଣ୍ଡ, ଲିଙ୍କ ରୋଡ୍, ଜଗତପୁରରେ ପହଞ୍ଚିବ। ସେହି ରୁଟ୍ ଦେଇ ବସ୍ଗୁଡିକ ଫେରିବ। ଏହାଦ୍ୱାରା ଅନେକ ପରୀକ୍ଷାର୍ଥୀ ଲାଭାନ୍ବିତ ହୋଇପାରିବେ ବୋଲି କ୍ରୁଟ୍ର ପରିଚାଳନା ନିର୍ଦ୍ଦେଶକ ଆଇପିଏସ୍ ଅରୁଣ ବୋଥ୍ରା ଆଶା ପ୍ରକାଶ କରିଛନ୍ତି।
