ଭଞ୍ଜନଗର,୧୭/୮(ବାବୁଲା ପ୍ରଧାନ):ଗଞ୍ଜାମ ଜିଲ୍ଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ବନ ସୁରକ୍ଷା ସମିତି କର୍ମକର୍ତ୍ତାଙ୍କୁ ଆତ୍ମନିର୍ଭରଶୀଳ କରିବା ପାଇଁ ରାଜ୍ୟ ସରକାର ପଦକ୍ଷେପ ନେଇଛନ୍ତି। ତେଣୁ ଓଡ଼ିଶା ଖଦୀ ଓ ଗ୍ରାମୋଦ୍ୟୋଗ ବୋର୍ଡ ଏବଂ ଘୁମୁସର ଉତ୍ତର ବନଖଣ୍ଡ ପକ୍ଷରୁ ମିଳିତ ଭାବେ ଆଜକୁ ୭ ଦିନ ହେବ ମହୁଚାଷ ଉପରେ ତାଲିମ ଚାଲିଥିଲା। ତାହା ରବିବାର ଉଦଯାପିତ ହୋଇଯାଇଛି। ଏଥିରେ ୫୦ ଜଣ ମହିଳା ଓ ପୁରୁଷଙ୍କୁ ତାଲିମ ପ୍ରଦାନ କରାଯାଇଥିଲା। ଏହାପରେ ସେମାନଙ୍କୁ ସରକାରଙ୍କ ପକ୍ଷରୁ ଆବଶ୍ୟକ ଉପକରଣ ଯୋଗାଇ ଦିଆଯାଇଥିଲା। ଏଥିରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଚାଷୀ ମାନଙ୍କୁ ମହୁ ଚାଷ ବାକ୍ସ, ମହୁ ଅମଳ ଯନ୍ତ୍ର ପ୍ରଦାନ କରିଥିଲେ। ଏହି ଅବସରରେ ବିଧାୟକ ନାୟକ କହିଥିଲେ ଯେ ସମାଜର ସମସ୍ତ ବର୍ଗର ଲୋକଙ୍କ ଉନ୍ନତି ପାଇଁ ଡବଲ ଇଞ୍ଜିନ ସରକାର ନୂଆଁ ନୂଆଁ ପଦକ୍ଷେପ ନେଇଛନ୍ତି। ଏହାଦ୍ବାରା ଲୋକଙ୍କ ଆର୍ଥିକ ମାନଦଣ୍ଡରେ ଉନ୍ନତି ଆସିପାରୁଛି ବୋଲି ବିଧାୟକ କହିଥିଲେ। ଏହି ବନଖଣ୍ଡରେ ବନ୍ୟପ୍ରାଣୀ ଶିକାର , ଜଙ୍ଗଲ ପୋଡ଼ି କମିଛି। ସରକାର ସ୍ୱୟଂ ସହାୟିକା ଗୋଷ୍ଠୀକୁ ସହାୟତା ଯୋଗାଇ ଦେଉଛନ୍ତି। ମହିଳା ମାନେ ପିଲାଙ୍କୁ ପାଠ ପଢ଼ାଇ ଶିକ୍ଷିତ କରାନ୍ତୁ। ପିଲା ଶିକ୍ଷିତ ହେଲେ ନିଜ ପରିବାରର ଉନ୍ନତି ସହ ଦେଶର ଉନ୍ନତି ହୋଇପାରିବ। ଭଞ୍ଜନଗର ବ୍ଲକର ୨୫୦୦ ସ୍ୱୟଂ ସହାୟିକା ଗୋଷ୍ଠୀକୁ ଋଣ ଦିଆଯିବ। ଏଥିସହ ୧୧ ଟି ସ୍ୱୟଂ ସହାୟିକା ଗୋଷ୍ଠୀକୁ ଲାପଟପ୍ ଦିଆଯିବ। ମହିଳା ମାନେ ଆତ୍ମନିର୍ଭରଶୀଳ ହେବାସହ ଆଗକୁ ବଢ଼ୁଛନ୍ତି ବୋଲି ବିଧାୟକ କହିଥିଲେ।
ଡି ଏଫ୍ ଓ ହିମାଂଶୁ ଶେଖର ମହାନ୍ତି ସଭାରେ ଅଧ୍ୟକ୍ଷତା କରିଥିଲେ। ଓଡ଼ିଶା ଖଦୀ ଓ ଗ୍ରାମୋଦ୍ୟୋଗ ବୋର୍ଡ ସଚିବ ସଞ୍ଜୟ କୁମାର ମିଶ୍ର ସମ୍ମାନିତ ଅତିଥି ଭାବେ ଯୋଗଦେଇ କ୍ଷୁଦ୍ର ଓ ମଧ୍ୟମ ଶିଳ୍ପ ମାଧ୍ୟମରେ ମହିଳା ମାନଙ୍କ ଉନ୍ନତି ପାଇଁ ପଦକ୍ଷେପ ନିଆଯାଇଛି ବୋଲି କହିଥିଲେ। ୨୦୧୩ ରୁ ରାଜ୍ୟରେ ମହୁ ଚାଷୀଙ୍କୁ ତାଲିମ୍ ଦିଆଯାଇଛି। ୨୦୨୪ ସୁଧା ରାଜ୍ୟରେ ୧୭୨୯ ଜଣ ଚାଷୀଙ୍କୁ ତାଲିମ୍ ଦିଆଯାଇଛି। ବର୍ତ୍ତମାନ ଚାଷୀ ସଂଖ୍ୟା ବୃଦ୍ଧି ପାଇଁ ଆହୁରି ଅଧିକ ପଦକ୍ଷେପ ନିଆଯାଇଛି। ଜଣେ ଚାଷୀଙ୍କୁ ସର୍ବାଧିକ ୧୦୦ ଟି ବାକ୍ସ ଏହି ଯୋଜନାରେ ଦିଆଯାଇପାରିବ ବୋଲି ଶ୍ରୀ ମିଶ୍ର କହିଥିଲେ। ଆଗାମୀ ଦିନରେ ୧୫ ଜଣ ମହୁଚାଷୀ କେରଳ ଯିବେ ଅଧିକ ଜ୍ଞାନ ଆହରଣ କରିବାକୁ ଯିବେ । ଚାଷୀ ମାନେ ସେମାନଙ୍କ ଉତ୍ପାଦିତ ମହୁ ବିଭାଗକୁ ବିକ୍ରି କରିବେ। ଏଥିପାଇଁ ଚାଷୀ ଓ ବିଭାଗ ମଧ୍ୟରେ ଚୁକ୍ତି ହେବ। ଦକ୍ଷିଣ ଘୁମୁସର ବନଖଣ୍ଡ ଅଧିକାରୀ ବିପଶା ପାରୁଲ ଅନ୍ୟତମ ଅତିଥି ଭାବେ ଯୋଗଦେଇ ମହିଳା ଆତ୍ମନିର୍ଭରଶୀଳ ହେଲେ ଦେଶ ଆଗକୁ ବଢିବ ବୋଲି କହିଥିଲେ। ଆଞ୍ଚଳିକ ମୁଖ୍ୟ ବନ ସଂରକ୍ଷକ ଆର୍ ବିଶ୍ଵନାଥ ନିଲାନଭର ସମ୍ମାନୀତ ଅତିଥି ଭାବେ ଯୋଗଦେଇ ୭ ବନଖଣ୍ଡରେ ଏହିଭଳି ମହୁ ଚାଷ କରାଯିବ ବୋଲି କହିଥିଲେ । ତେଣୁ ମହିଳା ମାନେ ମହୁ ଚାଷ ସମେତ ଅନ୍ୟାନ୍ୟ ବ୍ୟବସାୟ କରି ଲକ୍ଷପତି ଦିଦି ବନିବାକୁ ଆହ୍ବାନ କରିଥିଲେ। ଭଞ୍ଜନଗର ନର୍ସରୀ ମହୁ ଚାଷ ପାଇଁ ଉଦାହରଣ ହେଉ।
ଲୋକେ ଆତ୍ମନିର୍ଭରଶୀଳ ହେଲେ ଜଙ୍ଗଲ ଉପରେ ସେମାନଙ୍କନିର୍ଭରଶୀଳ କମିବ। ଫଳରେ ଜଙ୍ଗଲ ସୁରକ୍ଷିତ ରହିପାରିବ ବୋଲି ଆର୍ ସି ସି ଏଫ୍ କହିଥିଲେ। ସଭାରେ ଏ ସି ଏଫ୍ ଡ ରଶ୍ମି ରଞ୍ଜନ ସ୍ଵାଇଁ, ବିବେକ କୁମାର ଦାସ, ପ୍ରଦୀପ କୁମାର ବେହେରା ପ୍ରମୁଖ ଉପସ୍ଥିତ ଥିଲେ। ରେଞ୍ଜର ବିମ୍ବାଧର ସାହୁ, ପୃଥିବୀ ରାଜ ପ୍ରଧାନ, ବନପାଳ ବାବୁଲ ସେଠୀ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
