କେନ୍ଦ୍ରାପଡ଼ା ଅଫିସ,୨୯ା୧୨: କେନ୍ଦ୍ରାପଡ଼ା ଜିଲାରେ ଶାସକ ଦଳର ନେତାଙ୍କୁ ବିରୋଧ ଜାରି ରହିଛି। ଗତ ଅକ୍ଟୋବରରେ ରାଜ୍ୟ ସମବାୟ ମନ୍ତ୍ରୀ ତଥା ମହାକାଳପଡ଼ା ବିଧାୟକ ଅତନୁ ସବ୍ୟସାଚୀ ନାୟକ ଜମ୍ବୁଘାଟଠାରେ ସ୍ଥାନୀୟ ଅଞ୍ଚଳବାସୀଙ୍କ ବିରୋଧର ସମ୍ମୁଖୀନ ହୋଇଥିଲେ। ଗୁରୁବାର ପୂର୍ବାହ୍ନରେ ଏପରି ବିରୋଧ କେନ୍ଦ୍ରାପଡ଼ା ବିଧାୟକ ତଥା ପୂର୍ବତନ ମନ୍ତ୍ରୀ ଶଶିଭୂଷଣ ବେହେରାଙ୍କ କ୍ଷେତ୍ରରେ ଦେଖିବାକୁ ମିଳିଛି। ମିଶନ ଶକ୍ତିର ସ୍ବାବଲମ୍ବୀ ଗୃହ ଉଦ୍ଘାଟନକୁ ଯାଉଥିବା ବେଳେ ବଗଡ଼ାଠାରେ ବିଧାୟକ ବେହେରାଙ୍କ କାର୍ ଉପରକୁ ଅଣ୍ଡାମାଡ଼ ହୋଇଛି। ତେବେ ଅଣ୍ଡା ପଛରେ ଆସୁଥିବା ସମର୍ଥକଙ୍କ କାର୍ ଉପରେ ମାଡ଼ ହୋଇଛି। ଏହି ଘଟଣାରେ ବଗଡ଼ା ଗ୍ରାମର ରାଜେନ୍ଦ୍ର ପ୍ରଧାନ ଓରଫ ଆବୁଆଙ୍କୁ ସଦର ଥାନା ପୋଲିସ ଘଟଣାସ୍ଥଳରୁ ଆଣି ଥାନାରେ ଅଟକ ରଖିଛି।
ପ୍ରତ୍ୟକ୍ଷଦର୍ଶୀଙ୍କ ସୂଚନାନୁଯାୟୀ, ବଗଡ଼ାଠାରେ ସ୍ବାବଲମ୍ବୀ ଗୃହ ଉଦ୍ଘାଟନ ପାଇଁ ବିଧାୟକ ବେହେରା ଗ୍ରାମ ରାସ୍ତାରେ ଯାଉଥିଲେ। ଏହି ସମୟରେ ଗ୍ରାମ ରାସ୍ତା ନିକଟରେ ଠିଆ ହୋଇଥିବା ଆବୁଆ ବିଧାୟକଙ୍କୁ ଫେରିଯାଅ କହି ଅଣ୍ଡାମାଡ଼ କରିଥିଲେ। ଏହାର କାରଣ ସମ୍ପର୍କରେ ସେ କହିଛନ୍ତି, ଗତ ନିର୍ବାଚନ ପର ଠାରୁ ବଗଡ଼ା ପଞ୍ଚାୟତର ବିଭିନ୍ନ ସମସ୍ୟା ସମ୍ପର୍କରେ ବିଧାୟକ ବେହେରାଙ୍କ ଦୃଷ୍ଟି ଆକର୍ଷଣ କରାଯାଇ ସମାଧାନ ଲୋଡ଼ିଥିଲେ। ଏଥିରୁ କୌଣସି ସୁଫଳ ମିଳିନାହିଁ। ବିଧାୟକ ବେହେରାଙ୍କର ଗତ ସମୟ ଅବଧି ମଧ୍ୟରେ ଦେଖା ନ ଥିବା ବେଳେ କେବଳ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ ସମୟରେ ଦେଖା ଯାଉଛନ୍ତି। ଏହାବ୍ୟତୀତ ବିଧାୟକଙ୍କ ପୁଅ ମଧ୍ୟ ବିଭିନ୍ନ ଉନ୍ନୟନ ଯୋଜନାରେ ହସ୍ତକ୍ଷେପ କରୁଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ବଢ଼ୁଛି। ଅନ୍ଲାଇନ୍ର ଓ୍ବାନ ଟାଇମ୍ ପାଶଓ୍ବାର୍ଡ (ଓଟିପି) ପରି ଏହି ନିର୍ବାଚନ ମଣ୍ଡଳୀ ପାଇଁ ବିଧାୟକ ବେହେରା ଓ୍ବାନ୍ ଟାଇମ ଏମ୍ଏଲ୍ଏ (ଏଟିଏମ୍) ପରି ବ୍ୟବହାର ଦେଖାଉଥିବାରୁ ସ୍ଥାନୀୟ ଅଞ୍ଚଳରେ ବିରୋଧ କରାଅଣ୍ଡା ମାଡ଼ ସମ୍ପର୍କରେ ବିଧାୟକ ବେହେରାଙ୍କୁ ବ୍ଲକ ଅଧୀନ କପାଳେଶ୍ୱର ସ୍ବାବଲମ୍ବୀ ଗୃହଠାରେ ପଚାରିବାରୁ ଏସମ୍ପର୍କରେ କୌଣସି ମତ ନ ରଖି ଗାଡ଼ିରେ ପଳାଇ ଯାଇଥିଲେ। ଘଟଣା ସମ୍ପର୍କରେ ସଦର ଥାନା ଏସ୍ଆଇ ତଥା ତଦନ୍ତ ଅଧିକାରୀ ପ୍ରଭୂପ୍ରସାଦ ସାହାଣୀ କହିଛନ୍ତି, ଅଣ୍ଡାମାଡ଼ ସମ୍ପର୍କରେ କୌଣସି ଅଭିଯୋଗପତ୍ର ମିଳିନାହିଁ। ସ୍ଥାନୀୟ ଅଞ୍ଚଳରୁ ସୂଚନା ମିଳିବା ପରେ ଆବୁଆଙ୍କୁ ଥାନାକୁ ଅଣାଯାଇଛି। ଘଟଣା ସମ୍ପର୍କରେ ଏବେ ଅନୁଧ୍ୟାନ ଚାଲିଛି। ଆବଶ୍ୟକ ହେଲେ ଥାନା ପକ୍ଷରୁ ମାମଲା ହେବ ବୋଲି ଏସ୍ଆଇ ସାହାଣୀ ସୂଚନା ଦେଇଛନ୍ତି।
