ହାଇଦ୍ରାବାଦ, ୧୩।୭ : ଭାଜପା ପକ୍ଷରୁ ତେଲେଙ୍ଗାନାରେ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କ ବିରୋଧରେ ନିର୍ବାଚନ ପ୍ରଚାରକୁ ଜୋରଦାର କରାଯାଇଛି। ୨୦୨୩ରେ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏନେଇ ଭାଜପା ଏକ ରୋଡମ୍ୟାପ ପ୍ରସ୍ତୁତ କରିଥିବା ଜଣାଯାଇଛି। ବିଶେଷ କଥା ହେଉଛି ରାଜ୍ୟ ନିର୍ବାଚନରେ ବହୁ କେନ୍ଦ୍ର ମନ୍ତ୍ରୀ ରାଜ୍ୟ ଗସ୍ତରେ ନଜର ଆସିବେ। ରାଜ୍ୟରେ ଦଳର ଶକ୍ତି ବୃଦ୍ଧି ପାଇଁ ଭାଜପା ଅନେକ ବଡ କାର୍ଯ୍ୟକ୍ରମ କରିବାକୁ ଯାଉଛି।
ଦଳ ପକ୍ଷରୁ ଜୁଲାଇ ୨୧ ରୁ ୧୫ ଭିନ୍ନ ଭିନ୍ନ ଅଞ୍ଚଳରେ ପଲ୍ଲେ ଗୋସା-ଭାଜପା ଭରସା ଅଭିଯାନ ଅର୍ନ୍ତଗତ ଏକ ମୋଟରସାଇକେଲ ଯାତ୍ରା ପାଇଁ ପ୍ରସ୍ତୁତି ଶେଷ ହୋଇଛି। ଏହି ଅଭିଯାନ ସମୟରେ ରାଜ୍ୟରେ କେସିଆର ସରକାରଙ୍କ ବିଫଳତା ବିଷୟରେ ଲୋକଙ୍କୁ ଭାଜପା ଜଣାଇବ। ନ୍ୟୁଜ ଏଜେନ୍ସି ଏଏନଆଇ ଅନୁଯାୟୀ ଦଳର ରାଜ୍ୟର ପ୍ରଦେଶ ପ୍ରଭାରୀ ତରୁଣ ଚୁଘ କହିଛନ୍ତି ଯେ ୨୦୨୩ ତେଲେଙ୍ଗାନା ବିଧାନସଭା ନିର୍ବାଚନ ପାଇଁ ଭାଜପା ପ୍ରସ୍ତୁତ ହୋଇଛି ଏବଂ ଏଥିପାଇଁ ବୁଥ ସ୍ତରକୁ ମଜବୁତ କରିବା କାର୍ଯ୍ୟ ଜାରି ରହିଛି। ଆଗାମୀ ଦିନରେ ୩୦ ଜଣ କେନ୍ଦ୍ର ମନ୍ତ୍ରୀ ମଧ୍ୟ ତେଲେଙ୍ଗାନା ଗସ୍ତ କରିବେ। ସେ କହିଛନ୍ତି, ତେଲେଙ୍ଗାନାର ଲୋକମାନେ କେସିଆର ସରକାରଙ୍କୁ ବହିଷ୍କାର କରିବା ପାଇଁ ନିଷ୍ପତ୍ତି ନେଇଛନ୍ତି ଏବଂ ଏହି କାରଣରୁ ତେଲେଙ୍ଗାନାର ଲକ୍ଷ ଲକ୍ଷ ଲୋକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଂକଳ୍ପ ଯାତ୍ରାରେ ଯୋଗ ଦେଇଥିଲେ।
ନିକଟରେ ହାଇଦ୍ରାବାଦରେ ଅନୁଷ୍ଠିତ ଜାତୀୟ କାର୍ଯ୍ୟକାରିଣୀ ବୈଠକ ମଧ୍ୟ ତେଲେଙ୍ଗାନା ଉପରେ ସକରାତ୍ମକ ପ୍ରଭାବ ପକାଇଛି ବୋଲି ସେ କହିଛନ୍ତି। ଭାଜପା ନେତା କହିଛନ୍ତି ଯେ ଏହା ଦଳ ନେତା ଏବଂ କ୍ୟାଡରଙ୍କ ମଧ୍ୟରେ ଆତ୍ମବିଶ୍ୱାସ ବଢ଼ାଇଛି। ଏଥି ସହିତ, ପ୍ରଜା ସଂଗ୍ରାମ ଯାତ୍ରାର ତୃତୀୟ ପର୍ଯ୍ୟାୟ ଅଗଷ୍ଟ ୨ ରୁ ଆରମ୍ଭ ହେଉଛି। ଏକ କିମ୍ବା ଦୁଇ ହଜାର ଲୋକ ଏହି ଯାତ୍ରାରେ ଅଂଶଗ୍ରହଣ କରିବେ ବୋଲି କୁହାଯାଉଛି। ପ୍ରଥମ ଦିନରେ ୩୦୦-୪୦୦ ଲୋକ ଯାତ୍ରାରେ ଯୋଗଦେବେ। ଗ୍ରାମୀଣ ଅଞ୍ଚଳରେ ରାଜ୍ୟର ନେତାମାନେ ବାଇକ ରାଲିର ଆୟୋଜନ କରିବେ। ଏହା ସହିତ ଜଣେ ବଡ ନେତା ପ୍ରତ୍ୟେକ କ୍ଷେତ୍ରକୁ ଯିବା ପାଇଁ ଏକ ଯୋଜନା ପ୍ରସ୍ତୁତ କରାଯାଇଛି ।
