ନୂଆଦିଲ୍ଲୀ,୪।୬ : ପଳାତକ ହୀରା ବ୍ୟବସାୟୀ ମେହୁଲ ଚୋକ୍ସିଙ୍କ ପ୍ରତ୍ୟର୍ପଣରେ ଆହୁରି ବିଳମ୍ବ ହେବ। ପିଏନ୍ବି ବ୍ୟାଙ୍କରୁ ଋଣ ଠକେଇ ମାମଲାର ମୁଖ୍ୟ ଅଭିଯୁକ୍ତଙ୍କୁ ଆଣିବାକୁ ଡୋମିନିକା ଯାଇଥିବା ଭାରତୀୟ ପ୍ରତିନିଧି ଦଳକୁ ନିରାଶ ହେବାକୁ ପଡ଼ିଛି। ଚୋକ୍ସିଙ୍କ ପ୍ରତ୍ୟର୍ପଣ ଶୁଣାଣିକୁ କାରିବିୟନ ଦେଶର କୋର୍ଟ ଆସନ୍ତା ଜୁଲାଇ ପର୍ଯ୍ୟନ୍ତ ସ୍ଥଗିତ ରଖିଛନ୍ତି। କୋର୍ଟଙ୍କ ଏଭଳି ନିଷ୍ପତ୍ତି ପରେ ଖାଲି ହାତରେ ଭାରତ ଫେରୁଛନ୍ତି ସିବିଆଇ ଓ ଇଡିର ୮ ଅଧିକାରୀ।
ଆଣ୍ଟିଗୁଆରୁ ବେଆଇନ ଭାବେ ଡୋମିନିକାରେ ପ୍ରବେଶ କରିଥିବା ଚୋକ୍ସିଙ୍କୁ ସେଠାରେ ଗିରଫ କରାଯାଇଥିଲା। ଖବର ମିଳିବା ପରେ ଗତ ୨୮ ତାରିଖରେ ସ୍ବତନ୍ତ୍ର ଚାର୍ଟର ବିମାନରେ ଡୋମିନିକାରେ ପହଞ୍ଚିଥିଲେ ସିବିଆଇ ଓ ଇଡି ଅଧିକାରୀ। ସେବେଠାରୁ ସେମାନେ ସେଠାକାର କୋର୍ଟଙ୍କ ନିର୍ଦ୍ଦେଶକୁ ଅପେକ୍ଷାରେ କରିଥିଲେ।
