ବଞ୍ଚୋ, ୧୨।୩ (ପ୍ରଦୋଷ କୁମାର ବିଶ୍ୱାଳ): କେନ୍ଦୁଝର ଜିଲା ଆନନ୍ଦପୁର ଉପଖଣ୍ଡ ନନ୍ଦିପଦା ଥାନା ଅନ୍ତର୍ଗତ ହାବଳେଶ୍ୱର ହାଇସ୍କୁଲ ନିକଟରେ ଏକ ଅଭାବନୀୟ ଘଟଣା ଘଟିଛି। ବାଲି ବୋଝେଇ ହାଇୱା ଟ୍ରକରେ ପାଲ ଢାଙ୍କୁଥିବା ସମୟରେ ୧୧ କେଭି ବିଦ୍ୟୁତ ତାର ସଂସ୍ପର୍ଶରେ ଆସି ଜଣେ ନାବାଳକ ଗୁରୁତର ଆହତ ହୋଇଛନ୍ତି। ଗୁରୁତର ନାବାଳକ ଜଣକ ହେଉଛନ୍ତି ଶାଳଣିଆଁ ପଞ୍ଚାୟତ ଏଲକଣିଆଁ ଗ୍ରାମର ସଦାନନ୍ଦ ସାହୁଙ୍କ ପୁଅ ସୌମ୍ୟଜୀତ ସାହୁ (୧୪)। ସେ ଜଣେ ନବମ ଶ୍ରେଣୀର ଛାତ୍ର ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ଗୁରୁବାର ଭୋର ପ୍ରାୟ ୩ଟାରୁ ୪ଟା ମଧ୍ୟରେ ଏହି ଦୁର୍ଘଟଣା ଘଟିଥିଲା। ହାଇୱା ଉପରେ ପାଲ ଢାଙ୍କୁଥିବା ବେଳେ ସୌମ୍ୟଜୀତ ହଠାତ ଉପରେ ଯାଇଥିବା ହାଇଭୋଲ୍ଟେଜ ବିଦ୍ୟୁତ ତାର ସଂସ୍ପର୍ଶରେ ଆସିଯାଇଥିଲେ। ପରିବାର ଲୋକ ଓ ହାଇୱା ମାଲିକ ତାଙ୍କୁ ଉଦ୍ଧାର କରି ପ୍ରଥମେ ଶାଳଣିଆଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ମାତ୍ର ଅବସ୍ଥା ଅଧିକ ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ଼ ଡାକ୍ତରଖାନା (SCB)କୁ ସ୍ଥାନାନ୍ତର କରାଯାଇଛି। ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ସୂଚନା ମିଳିଛି।
ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜଣେ ୧୪ ବର୍ଷର ନାବାଳକଙ୍କୁ କିଭଳି ଭାରୀଯାନ ପରି ବିପଦପୂର୍ଣ୍ଣ କାର୍ଯ୍ୟରେ ନିୟୋଜିତ କରାଗଲା, ସେ ନେଇ ହାଇୱା ମାଲିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଗ୍ରାମବାସୀ ଦାବି କରିଛନ୍ତି।
ଗତ ଜାନୁଆରୀ ୨୫ରେ ବିଷ୍ଣୁପୁର ଗ୍ରାମର ଆନନ୍ଦ ଜେନାଙ୍କର ହାଇୱା ଚାପରେ ମୃତ୍ୟୁ ହୋଇଥିଲା। ଏହାପରେ ଉପଜିଲାପାଳଙ୍କ ନିଷ୍ପତ୍ତି କ୍ରମେ ଏହି ରାସ୍ତାରେ ଭାରୀଯାନ ଚଳାଚଳ ବନ୍ଦ ଥିଲେ ମଧ୍ୟ ପ୍ରଶାସନିକ ଶିଥିଳତା ଯୋଗୁ ବାଲି ଚୋରା ଚାଲାଣ ଜାରି ରହିଛି। ସ୍ଥାନୀୟ ପୋଲିସ, ଖଣି ବିଭାଗ ଓ ଜିଲା ପ୍ରଶାସନ ସବୁ ଜାଣିଶୁଣି ନିରବ ରହୁଥିବାରୁ ବାଲି ମାଫିଆମାନେ ଅତି ବିପଦପୂର୍ଣ୍ଣ ଭାବେ ଗାଡ଼ି ଚଳାଉଥିବା ଅଭିଯୋଗ ହେଉଛି। ଏହି ଦୁର୍ଘଟଣା ପାଇଁ ହାଇୱା ମାଲିକ ଓ ପ୍ରଶାସନିକ ଅବହେଳା ସମ୍ପୂର୍ଣ୍ଣ ଦାୟୀ। ନାବାଳକଙ୍କୁ ବିପଦପୂର୍ଣ୍ଣ କାମରେ ଲଗାଇବା ଏକ ଅପରାଧ ବୋଲି ସ୍ଥାନୀୟ ବାସିନ୍ଦା ପ୍ରକାଶ କରିଛନ୍ତି।
