ଢେଙ୍କାନାଳ ଅଫିସ,୨୬ା୧: ଢେଙ୍କାନାଳ ସଦର ମହକୁମାରେ ୭୪ତମ ଜିଲାସ୍ତରୀୟ ସାଧାରଣତନ୍ତ୍ର ଉତ୍ସବ ଗୁରୁବାର ପାଳିତ ହୋଇଯାଇଛି। ସ୍ଥାନୀୟ ଷ୍ଟାଡିୟମଠାରେ ସକାଳେ ସାଢ଼େ ୮ ଟାରେ ପରେଡ ଅନୁଷ୍ଠିତ ହୋଇଥିଲା। ଏଥିରେ ମୁଖ୍ୟ ଅତିଥି ଖାଦ୍ୟ ଯୋଗାଣ, ଖାଉଟି କଲ୍ୟାଣ ଓ ସମବାୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଯୋଗ ଦେଇ ଜାତୀୟ ପତାକା ଉତ୍ତୋଳନ କରି ଅଭିବାଦନ ଗ୍ରହଣ କରିଥିଲେ। କରୋନା ଯୋଗୁ ୩ ବର୍ଷ ପରେ ଆୟୋଜିତ ଏହି ପରେଡ୍ରେ ମୋଟ୍ ୩୪ଟି ଦଳ ଅଂଶଗ୍ରହଣ କରିଥିଲେ। ଏହା ପରେ ବିଭିନ୍ନ ବିଦ୍ୟାଳୟର ଛାତ୍ରୀଛାତ୍ରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ପରେଡ ଉତ୍ସବରେ ଚଳିତ ବର୍ଷ ଢେଙ୍କାନାଳ କଲେଜ ମହିଳା ସିନିୟର ଡିଭିଜନ ଏନ୍ସିସି ଦଳ ପ୍ରଥମ ସ୍ଥାନ, ଆନନ୍ଦ ମାର୍ଗ ସ୍କୁଲ ଦ୍ୱିତୀୟ, ଦିଲୀ ପବ୍ଲିକ ସ୍କୁଲ ତୃତୀୟ ଏବଂ ସରସ୍ବତୀ ଶିଶୁ ବିଦ୍ୟାମନ୍ଦିର ବାଳିକା ଦଳ ଶ୍ରେଷ୍ଠ ସ୍କାଉଟ ଓ ଗାଇଡ ଦଳ ଭାବରେ ପୁରସ୍କୃତ ହୋଇଛନ୍ତି। ପରେଡ ଉତ୍ସବରେ ବିଧାୟକ ସୁଧୀର କୁମାର ସାମଲ, ଜିଲାପାଳ ସରୋଜ କୁମାର ସେଠୀ, ଏସ୍ପି ଜ୍ଞାନରଞ୍ଜନ ମହାପାତ୍ର ଓ ଜିଲା ପରିଷଦ ସଭାପତି ଅର୍ଚ୍ଚନା ପୁହାଣ ପ୍ରମୁଖ ଉପସ୍ଥିତ ଥିଲେ।
