ଚଣ୍ଡିଗଡ଼, ୨୫ା୫ (ପି.ଟି.)- କୋଭିଡ୍ରେ ପୀଡ଼ିତ କିମ୍ବଦନ୍ତୀ ଭାରତୀୟ ସ୍ପ୍ରିଣ୍ଟର ମିଲ୍ଖା ସିଂ ସୋମବାର ହସ୍ପିଟାଲରେ ଭର୍ତ୍ତି ହୋଇଛନ୍ତି। ତାଙ୍କ ପୁଅ ତଥା ବିଶିଷ୍ଟ ଗଲ୍ଫ ଖେଳାଳି ଜିଭ୍ ମିଲ୍ଖା ସିଂ ଏ ବିଷୟ ସୂଚନା ଦେଇଛନ୍ତି। ବୁଧବାର କରୋନା ପଜିଟିଭ୍ ଜଣାପଡ଼ିବା ପରଠାରୁ ୯୧ ବର୍ଷୀୟ ମିଲ୍ଖା ଚଣ୍ଡିଗଡ଼ସ୍ଥିତ ତାଙ୍କ ବାସଭବନରେ ଆଇସୋଲେଶନରେ ରହି ଆସୁଥିଲେ। ସେ ଦୁର୍ବଳ ଅନୁଭବ କରିବା ସହ ଖାଦ୍ୟ ଗ୍ରହଣ ନ କରିବାରୁ ତାଙ୍କୁ ମୋହାଲିସ୍ଥିତ ଫୋର୍ଟିସ୍ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ତାଙ୍କୁ ଚିକିତ୍ସା କରୁଥିବା ଡାକ୍ତରମାନେ କହିଛନ୍ତି। ମିଲ୍ଖା କିଛିଦିନ ପୂର୍ବରୁ କହିଥିଲେ, ତାଙ୍କ ଘରେ କାର୍ଯ୍ୟ କରୁଥିବା ଦୁଇଜଣ ସହକାରୀ କରୋନା ସଂକ୍ରମିତ ଜଣାପଡ଼ିବା ପରେ ପରିବାରର ସମସ୍ତ ସଦସ୍ୟଙ୍କର କୋଭିଡ୍ ଟେଷ୍ଟ କରାଯାଇଥିଲା। କିନ୍ତୁ ତାଙ୍କୁ ଛାଡ଼ି ତାଙ୍କ ସ୍ତ୍ରୀ ନିର୍ମଳ କୌର (ଭାରତର ପୂର୍ବତନ ଭଲିବଲ୍ ଅଧିନାୟିକା)ଙ୍କ ସମେତ ଅନ୍ୟ ସମସ୍ତଙ୍କ ଫଳାଫଳ ନେଗେଟିଭ ଆସିଥିଲା। ଏହା ତାଙ୍କୁ ବିସ୍ମିତ କରିଥିଲା। ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂ ‘ଫ୍ଲାଇଂ ଶିଖ’ ମିଲ୍ଖା ସିଂଙ୍କ ଦ୍ରୁତ ଆରୋଗ୍ୟ କାମନା କରି ଟୁଇଟ୍ କରିଛନ୍ତି।
