ପିଜିଏ ଟୁର୍ନାମେଣ୍ଟ ଜିତିବାରେ ମିକେଲସନ ସବୁଠାରୁ ବୟସ୍କ
9:08 amMay 25, 2021May 25, 2021 / 21

କିଓ୍ବା ଆଇଲାଣ୍ଡ (ୟୁଏସ୍‌), ୨୫ା୫ (ଏପି)- ଆମେରିକାନ ଗଲ୍ଫର ଫିଲ୍‌ ମିକେଲସନ ତାଙ୍କ ୩୦ ବର୍ଷ କ୍ୟାରିୟରରେ ଅନେକ ଥର ପ୍ରଭାବୀ ପ୍ରଦର୍ଶନ କରି ଖେଳପ୍ରେମୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ୫ଥର ପ୍ରମୁଖ ଟୁର୍ନାମେଣ୍ଟ ଜିତିସାରିଥିବା ମିକେଲସନ ଦିନେ ଏଭଳି ଏକ କୀର୍ତ୍ତିମାନ ଅର୍ଜନ କରିବେ ବୋଲି କେହି କଳ୍ପନା କରି ନ ଥିଲେ। ରବିବାର ୫୦ ବର୍ଷ ବୟସରେ ଏକ ପ୍ରମୁଖ ଟୁର୍ନାମେଣ୍ଟ ଜିତି ସେ ସମସ୍ତକୁ ଚମକାଇ ଦେଇଛନ୍ତି। ସବୁଠାରୁ ବୟସ୍କ ଖେଳାଳି ଭାବେ ସେ ଏକ ପିଜିଏ ଚାମ୍ପିୟନଶିପ୍‌ ଜିତି ନୂଆ ରେକର୍ଡ ପ୍ରତିଷ୍ଠା କରିଛନ୍ତି। ପୂର୍ବରୁ ଏହି ରେକର୍ଡ ଜୁଲିଅସ୍‌ ବୋରୋସଙ୍କ ନାମରେ ରହିଥିଲା। ୧୯୬୮ରେ ସାନ ଆଣ୍ଟୋନିଓଠାରେ ବୋରୋସ ୪୮ବର୍ଷ ବୟସରେ ଏକ ପିଜିଏ ଚାମ୍ପିୟନଶିପ୍‌ ଜିତିଥିଲେ। ବୋରୋସ ୫୩ ବର୍ଷ ଧରି ଏହି ରେକର୍ଡର ଅଧିକାରୀ ଥିଲେ। ମିକେଲସନ ରବିବାର ୬ ଅଣ୍ଡର ୨୮୨ ସହ ତାଙ୍କ ଖେଳ ଶେଷ କରିଥିଲେ। ଟୁର୍ନାମେଣ୍ଟ ଜିତିବା ପରେ ଖୁସିରେ ହାତ ଉପରକୁ ଉଠାଇବା ସହ ତାଙ୍କ ପାଇଁ କ୍ୟାଡି ଭାବେ କାମ କରୁଥିବା ନିଜ ଭାଇ ଟିମ୍‌ଙ୍କୁ ସେ ଖୁସିରେ କୁଣ୍ଢାଇ ପକାଇଥିଲେ। ଓସେନ କୋର୍ସଠାରେ ବହୁ ସଂଖ୍ୟାରେ ଖେଳପ୍ରେମୀ ଉପସ୍ଥିତ ଥିଲେ। ସେମାନେ ମିକେଲସନଙ୍କ ପ୍ରଦର୍ଶନରେ ଉତ୍‌ଫୁଲିତ ହେବା ସହ ଭୂରିଭୂରି ପ୍ରଶଂସା କରିବାରେ ଲାଗିଥିଲେ।
୩ ମାସ ପୂର୍ବେ ୪୩ ବର୍ଷୀୟ ଟମ୍‌ ବ୍ରାଡି ୭ମ ସୁପର ବାଓଲ ଜିତି ଅନ୍ୟମାନଙ୍କର ଦୃଷ୍ଟିଆକର୍ଷଣ କରିଥିଲେ। ମାତ୍ର ମିକେଲସନ ତାଙ୍କୁ ଟପି ଯାଇଥିଲେ। ପିଜିଏ ଟୁର୍‌ରେ ମିକେଲସନ ପ୍ରଥମ ଖେଳାଳି ଭାବେ ୩୦ ବର୍ଷ ଧରି ଟୁର୍ନାମେଣ୍ଟ ଜିତି ଆସୁଛନ୍ତି। ସେ ଏପର୍ଯ୍ୟନ୍ତ ୪୫ ଟାଇଟଲ ଜିତିସାରିଲେଣି। ୧୯୯୧ରେ ସେ ଜଣେ ଜୁନିୟର ଖେଳାଳି ହିସାବରେ କ୍ୟାରିୟରର ପ୍ରଥମ ଟାଇଟଲ ହାସଲ କରିଥିଲେ। ୩ ଦଶନ୍ଧି ମଧ୍ୟରେ ପ୍ରମୁଖ ଟୁର୍ନାମେଣ୍ଟ ଜିତିିଥିବା ଖେଳାଳି ତାଲିକାରେ ମିକେଲସନ ୧୦ମ ସ୍ଥାନରେ ରହିଛନ୍ତି। ଏଲିଟ୍‌ ତାଲିକା ଆରମ୍ଭରେ ହ୍ୟାରି ଭାର୍ଡନ ରହିଛନ୍ତି। ନିକଟରେ ଟାଇଗର ଉଡ୍ସ ଏହି ସଳଫତା ହାସଲ କରିଛନ୍ତି। ଓସେନ କୋର୍ସଠାରେ ମିକେଲସନଙ୍କ ମୁଖ୍ୟ ପ୍ରତିଦ୍ୱନ୍ଦ୍ୱୀ ଥିଲେ ବ୍ରୁକ୍ସ କୋପ୍‌କା ଓ ଲୋଇସ୍‌ ଓଷ୍ଟହୁଇଜେନ। ସୂଚନାଯୋଗ୍ୟ, ଦୁଇବର୍ଷ ହେଲା କୌଣସି ବିଜୟ ହାସଲ କରି ନ ଥିଲେ। ସପ୍ତାହକ ପୂର୍ବେ ବିଶ୍ୱର ୧୧୫ ନମ୍ବର ଖେଳାଳି ହୋଇଥିଲେ ମଧ୍ୟ ମିକେଲସନ ସ୍ବତନ୍ତ୍ର ରିହାତିରେ ୟୁଏସ୍‌ ଓପନରେ ଭାଗ ନେଇଥିଲେ। ଗତ ୯ ମାସ ମଧ୍ୟରେ ସେ ୧୭ଟି ଟୁର୍ନାମେଣ୍ଟ ଖେଳିଥିଲେ। ହେଲେ ସେ ଟପ୍‌ ୨୦ରେ ରହିବାରେ ସମର୍ଥ ହୋଇ ନ ଥିଲେ। ଫଳରେ ଓଭର ୧୮ ହୋଲ୍‌ ଉପରେ ସେ କିପରି ଫୋକସ୍‌ କରିବେ ସେ ନେଇ ସେ ଚିନ୍ତିତ ଥିଲେ।