ନୂଆଦିଲ୍ଲୀ,୧।୭: ଗ୍ରାମୀଣ ରୋଜଗାର କ୍ଷେତ୍ରରେ କେନ୍ଦ୍ର ସରକାର ଆଜି ଅର୍ଥାତ୍ ୧ ଜୁଲାଇ ୨୦୨୬ରୁ ଏକ ଐତିହାସିକ ତଥା ବଡ଼ ନୀତିଗତ ପରିବର୍ତ୍ତନ କାର୍ଯ୍ୟକାରୀ କରିଛନ୍ତି। ଦେଶର ସବୁଠାରୁ ବଡ଼ ଗ୍ରାମୀଣ ରୋଜଗାର ଗ୍ୟାରେଣ୍ଟି ଯୋଜନା ‘ମନରେଗା’ (MGNREGA) ଆକ୍ଟ, ୨୦୦୫କୁ ରଦ୍ଦ (Repeal) କରି ସେହି ସ୍ଥାନରେ ସମ୍ପୂର୍ଣ୍ଣ ନୂଆ ଆଇନ ‘VB-G RAM G’ (ବିକଶିତ ଭାରତ – ଗ୍ୟାରେଣ୍ଟି ଫର୍ ରୋଜଗାର ଆଣ୍ଡ ଆଜୀବିକା ମିଶନ – ଗ୍ରାମୀଣ) ଲାଗୁ କରିଛନ୍ତି।
ଏହି ନୂଆ ଆଇନ ଅଧୀନରେ କେବଳ ଯୋଜନାର ସ୍ୱରୂପ ବଦଳି ନାହିଁ, ବରଂ ଗ୍ରାମୀଣ ଶ୍ରମିକମାନଙ୍କ ପାଇଁ ଦୈନିକ ମଜୁରୀ (Daily Wages) ହାରରେ ମଧ୍ୟ ବଡ଼ ସଂଶୋଧନ କରାଯାଇଛି।
ନୂଆ VB-G RAM G ଆକ୍ଟ ଅଧୀନରେ ସରକାର ସାରା ଦେଶରେ ଗ୍ରାମୀଣ ଶ୍ରମିକମାନଙ୍କ ପାଇଁ ଦୈନିକ ମଜୁରୀ ହାରକୁ ସଂଶୋଧିତ କରିଛନ୍ତି। ଏବେ ଏହି ଯୋଜନାରେ କାମ କରୁଥିବା ଶ୍ରମିକମାନଙ୍କୁ ପ୍ରତିଦିନ ₹୩୨୭.୪ ହିସାବରେ ମଜୁରୀ ଦିଆଯିବ। ଏହି ନିଷ୍ପତ୍ତି ଦ୍ୱାରା ଗ୍ରାମାଞ୍ଚଳରେ ରହୁଥିବା ପରିବାରଗୁଡ଼ିକର ଦୈନିକ ଆୟରେ ସୁଧାର ଆସିବ ଏବଂ ସେମାନଙ୍କ ଜୀବନଧାରଣର ମାନ ଉନ୍ନତ ହୋଇପାରିବ।
କଣ ଏହି ନୂଆ VB-G RAM G ଆକ୍ଟ ଏବଂ ଏଥିରେ କଣ ବଦଳିଛି?
-
୧୨୫ ଦିନର ରୋଜଗାର ଆଇନଗତ ଗ୍ୟାରେଣ୍ଟି: ପୁରୁଣା ଯୋଜନାରେ ଯେଉଁଠି ବର୍ଷକୁ ୧୦୦ ଦିନର କାମ ଗ୍ୟାରେଣ୍ଟି ମିଳୁଥିଲା, ନୂଆ ଆଇନ ଅଧୀନରେ ଏବେ ଗ୍ରାମୀଣ ପରିବାରଗୁଡ଼ିକୁ ଏକ ଆର୍ଥିକ ବର୍ଷରେ ଅନ୍ୟୂନ ୧୨ ଦିନର ଅଣକୁଶଳୀ ରୋଜଗାରର ଆଇନଗତ ଗ୍ୟାରେଣ୍ଟି ଦିଆଯିବ।
-
ବଜେଟ୍ ଏବଂ ଫଣ୍ଡିଂର ୬୦:୪୦ ଫର୍ମୁଲା: ଏବେ ଏହି ଯୋଜନାର ଖର୍ଚ୍ଚ କେବଳ କେନ୍ଦ୍ର ସରକାର ଏକାକୀ ବହନ କରିବେ ନାହିଁ। ନୂଆ ନିୟମ ଅନୁଯାୟୀ, ସାଧାରଣ ରାଜ୍ୟଗୁଡ଼ିକରେ ଫଣ୍ଡିଂ ପ୍ୟାଟର୍ନ ୬୦:୪୦ ରହିବ (ଅର୍ଥାତ୍ ୬୦% କେନ୍ଦ୍ର ଏବଂ ୪୦% ରାଜ୍ୟ ସରକାର ଦେବେ)। ପୂର୍ବୋତ୍ତର ଏବଂ ପାର୍ବତ୍ୟ ରାଜ୍ୟଗୁଡ଼ିକ ପାଇଁ ଏହି ଅନୁପାତ ୯୦:୧୦ ରଖାଯାଇଛି।
-
କୃଷି ଋତୁରେ ବ୍ଲାକଆଉଟ୍ ପିରିୟଡ୍ (Blackout Period): ଚାଷ ସମୟରେ (ତଳି ରୋପଣ ଓ ଅମଳ) ଯେପରି ଚାଷୀମାନଙ୍କୁ ଶ୍ରମିକ ଅଭାବର ସମ୍ଭୁଖୀନ ହେବାକୁ ନପଡ଼େ, ସେଥିପାଇଁ ରାଜ୍ୟଗୁଡ଼ିକୁ ବର୍ଷସାରା ସମୁଦାୟ ୬୦ ଦିନର ‘ପଜ୍ ପିରିୟଡ୍’ (Pause Period) ରଖିବାକୁ ଅନୁମତି ଦିଆଯାଇଛି। ଏହି ସମୟ ମଧ୍ୟରେ ଯୋଜନା ଅଧୀନରେ କାମ ବନ୍ଦ ରହିବ, ଯଦ୍ୱାରା ଶ୍ରମିକମାନେ ବିଲରେ କାମ କରିପାରିବେ।
-
ସ୍ଥାୟୀ ସମ୍ପତ୍ତି ସୃଷ୍ଟି: ଏବେ କେବଳ ଆଖିଦୃଶିଆ କିମ୍ବା ଗାତ ଖୋଳିବା ଭଳି ଅସ୍ଥାୟୀ କାମ ହେବ ନାହିଁ। ନୂଆ ଯୋଜନା ଅଧୀନରେ ଗାଁଗୁଡ଼ିକରେ ଜଳ ସୁରକ୍ଷା (Water Security), ଗ୍ରାମୀଣ ଭିତ୍ତିଭୂମି ଏବଂ ଜୀବିକା ସହ ଜଡ଼ିତ ସ୍ଥାୟୀ ତଥା ହାଇଟେକ୍ ସମ୍ପତ୍ତି ପ୍ରସ୍ତୁତ କରାଯିବ।
ପୁରୁଣା ଜବ୍ କାର୍ଡଧାରୀମାନେ କଣ କରିବେ?
ମନରେଗା ଅଧୀନରେ ତିଆରି ହୋଇଥିବା ପୁରୁଣା ଜବ୍ କାର୍ଡ ଧାରୀମାନେ ବ୍ୟସ୍ତ ହେବାର ଆବଶ୍ୟକତା ନାହିଁ। ସରକାରଙ୍କ ସୂଚନା ଅନୁଯାୟୀ, ଯେପର୍ଯ୍ୟନ୍ତ ନୂଆ ଗ୍ରାମୀଣ ରୋଜଗାର ଗ୍ୟାରେଣ୍ଟି କାର୍ଡ ଜାରି କରାଯାଇ ନାହିଁ, ସେପର୍ଯ୍ୟନ୍ତ ପୁରୁଣା ଏବଂ ଇ-କେୱାଇସି (e-KYC) ଯାଞ୍ଚ ହୋଇଥିବା ଜବ୍ କାର୍ଡଗୁଡ଼ିକ ହିଁ ବୈଧ ବୋଲି ବିବେଚନା କରାଯିବ ଏବଂ ସେହି ଆଧାରରେ ହିଁ ନୂଆ କାମ ଓ ବର୍ଦ୍ଧିତ ମଜଦୂରି ମିଳିବ।
