ଭୁବନେଶ୍ୱର, ୧୧।୧(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକର ବାରବାଟୀ ଷ୍ଟାଡିୟମରେ ଚାଲିଥିବା ଏମ୍ଜିଏମ୍ ଟି୨୦ କ୍ରିକେଟ ଲିଗ୍ର ରବିବାର ଅନୁଷ୍ଠିତ ପ୍ରଥମ ମ୍ୟାଚରେ ଓଡ଼ିଶା ଲାୟନ୍ସ ୨୨ ରନରେ ଚିତାସ୍କୁ ପରାସ୍ତ କରିଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଲାୟନ୍ସ ୨୦ ସଭରରେ ୬ ଉଇକେଟ ହରାଇ ୧୩୩ ରନ କରିଥିଲା। ଦଳ ପକ୍ଷରୁ ଓପନର ସ୍ବସ୍ତିକ ସାମଲ ସର୍ବାଧିକ ୪୦(୩୯ ବଲ, ୪ ଚୌକା, ୧ ଛକା), ଶୁଭ୍ରଜ୍ୟୋତି ମିଶ୍ର ୩୦, ଅଂଶୁମାନ ତ୍ରିପାଠୀ ୨୫ ଓ ରାକେଶ ପଟ୍ଟନାୟକ ୨୦ ରନ କରିଥିଲେ। ବିପକ୍ଷ ଦଳର ଅଭିଷେକ ରାଉତ ୨ଟି ଏବଂ ମୃଣ୍ମୟ ତ୍ରିପାଠୀ, ମନୋଜ ବାରିକ ଓ ମନୀଷ ରାଉତ ଗୋଟିଏ ଲେଖାଏ ଉଇକେଟ ନେଇଥିଲେ। ୧୩୪ ରନ ବିଜୟ ଲକ୍ଷ୍ୟନେଇ ପଡ଼ିଆକୁ ଓହ୍ଲାଇଥିବା ଚିତାସ୍ ପୂରା ୨୦ ଓଭର ଖେଳିଥିଲେ ହେଁ ୯ ଉଇକେଟ ହରାଇ ୧୧୧ ରନ କରି ପାରିଥିଲା। ବାଦଲ ଭୋଳ ସର୍ବାଧିକ ୨୨ ଓ ମାରୋଜୁ ପ୍ରଶାନ୍ତ ୨୧ ରନ କରିଥିବାବେଳେ ବିଜୟୀ ଦଳର ନଉତ୍ତମ ଭଞ୍ଜ ଓ ବିକାଶ ରାଉତ ୨ଟି ଲେଖାଏ ଏବଂ ଶିବାଶିଷ ସାହୁ, ଦୀପକ ବେହେରା, ରାକେଶ ପଟ୍ଟନାୟକ ଓ ଅଭିଷେକ ଗିରି ଗୋଟିଏ ଲେଖାଏ ଉଇକେଟ ନେଇଥିଲେ। ହଂକଂ ଜାତୀୟ କ୍ରିକେଟ ଦଳର ପୂର୍ବତନ ଅଧିନାୟକ ଅଂଶୁମାନ ରଥ ଅତିଥିଭାବେ ଯୋଗଦେଇ ସ୍ବସ୍ତିକ ସାମଲଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ପ୍ରଦାନ କରିଥିଲେ।
