ଭୁବନେଶ୍ୱର,୧୧ା୧୨ (ସରୋଜ ଜେନା): ନୂଆଦିଲ୍ଲୀରେ ଅନୁଷ୍ଠିତ ଖେଲୋ ଇଣ୍ଡିଆ ପାରା ଗେମ୍ସରେ ଓଡ଼ିଶାକୁ ସଫଳତା। ପ୍ରଥମ ଦିନରେ ଜୟନ୍ତୀ ବେହେରା, ପଙ୍କଜ ଭୁଏ ଓ ମଙ୍ଗତ ହେମରାମ ପଦକ ବିଜୟୀ ହୋଇଛନ୍ତି। ମହିଳା ୧୦୦ ମିଟର ଦୌଡର ଟି-୪୭ ବର୍ଗରେ ଜୟନ୍ତୀ ସ୍ବର୍ଣ୍ଣ, ପୁରୁଷ ଟି -୧୩ ବର୍ଗରେ ପଙ୍କଜ ସ୍ବର୍ଣ୍ଣ ଓ ମଙ୍ଗତ ବ୍ରୋଞ୍ଜ ଜିତିଛନ୍ତି।
ପଙ୍କଜ ୧୨.୪୧ ସେକେଣ୍ଡ ଟାଇମିଂ ସହିତ ସ୍ବର୍ଣ୍ଣ ହାସଲ କରିଥିବା ବେଳେ ମଙ୍ଗତ ମାତ୍ର ୦.୧ ସେକେଣ୍ଡର ଫରକରେ ରୌପ୍ୟରୁ ବଞ୍ଚିତ ହୋଇଥିଲେ। ଅବ୍ନିଲ୍ କୁମାର ୧୨.୬୩ ସେକେଣ୍ଡର ଟାଇମିଂ ସହିତ ରୌପ୍ୟ ପାଇଥିଲେ। ଟି-୪୭ ବର୍ଗରେ ଜୟନ୍ତୀ ୧୩.୪୦ ସେକେଣ୍ଡର ଟାଇମିଂ ସହ ସ୍ବର୍ଣ୍ଣ ହାସଲ କରିଥିଲେ। ନିଜ ରାଜ୍ୟର ପ୍ରତିନିଧିତ୍ୱ କରି ସ୍ବର୍ଣ୍ଣ ହାସଲ କରିବା ମୋ ପାଇଁ ଅତ୍ୟନ୍ତ ଗୌରବର ବିଷୟ ବୋଲି କହିଛନ୍ତି ଜୟନ୍ତୀ। ଖେଲୋ ଇଣ୍ଡିଆ ପାରା ଗେମ୍ସର ପ୍ରଥମ ସଂସ୍କରଣରେ ଆମ ଆଥଲେଟ ମାନେ ପଦକ ହାସଲ କରିବା ବେଶ ଗୁରୁତ୍ୱପୂର୍ଣ୍ଣ ବୋଲି କହିଥିଲେ କ୍ରୀଡା ସଚିବ ଆର. ଭିନିଲ କ୍ରିଷ୍ଣା।
