ଭୁବନେଶ୍ୱର, (ବ୍ୟୁରୋ)/ ବାଲେଶ୍ୱର ଅଫିସ, ୧୯।୮: ବ୍ରାଉନସୁଗାର କାରବାର କରୁଥିବା ଜଣେ ଏମ୍ବିଏ ଛାତ୍ରଙ୍କୁ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଟିମ୍ ସୋମବାର ରାତିରେ ବାଲେଶ୍ୱର ବସ୍ଷ୍ଟାଣ୍ଡରୁ ଗିରଫ କରିଛି। ତାଙ୍କ ନିକଟରୁ ୧ କେଜି ୩୨୦ ଗ୍ରାମର ବ୍ରାଉନସୁଗାର ସମେତ ୧୪ ହଜାର ଟଙ୍କା, ମୋବାଇଲ ଫୋନ୍, ଏଟିଏମ୍ ଏବଂ ଡେବିଟ୍ କାର୍ଡ ଜବତ କରିଛି। ଜବତ ବ୍ରାଉନସୁଗାରର ମୂଲ୍ୟ ପ୍ରାୟ କୋଟିଏରୁ ଊର୍ଦ୍ଧ୍ୱ ଟଙ୍କା ହେବ ବୋଲି ଏସ୍ଟିଏଫ୍ କହିଛି। ଗିରଫ ଛାତ୍ର ହେଲେ ବାଲେଶ୍ୱର ଜିଲା ଟାଉନ ଥାନା ଅନ୍ତର୍ଗତ ସୁନହଟ ବଙ୍କାଖଜୁରି ଅଞ୍ଚଳର ସେକ୍ ରିୟାଜୁଦ୍ଦିନ। ସେ ଭୁବନେଶ୍ୱରସ୍ଥ ଏକ ଘରୋଇ କଲେଜର ଶେଷ ବର୍ଷ ଏମ୍ବିଏ ଛାତ୍ର। ବହି ଭିତରେ ବ୍ରାଉନସୁଗାର ରଖି ପୋଲିସକୁ ଚକ୍ମା ଦେଇ ସେ ଧଳା ଜହର କାରବାର ଚଳାଇଥିଲେ। ରିୟାଜୁଦ୍ଦିନ ବାଲେଶ୍ୱରରୁ ବସ୍ ଯୋଗେ ଭୁବନେଶ୍ୱର ଆସିବାକୁ ଅପେକ୍ଷାରତ ଥିବାବେଳେ ଏସ୍ଟିଏଫ୍ ଟିମ୍ କୌଣସି ସୂତ୍ରରୁ ସୂଚନା ପାଇ ତାଙ୍କୁ ଗିରଫ କରିଥିଲା। ଏ ନେଇ ଏସ୍ଟିଏଫ୍ ପକ୍ଷରୁ ୨୧(ସି) ଏନ୍ଡିପିଏସ୍ ଆକ୍ଟ ୧୯୮୫ ଅନୁଯାୟୀ କେସ୍ ନଂ. ୨୨/୨୦ ରୁଜୁ ହୋଇଛି। ଅଭିଯୁକ୍ତଙ୍କୁ ଭୁବନେଶ୍ୱର କ୍ରାଇମବ୍ରାଞ୍ଚ କାର୍ଯ୍ୟାଳୟକୁ ଅଣାଯାଇ ପଚରାଉଚରା କରାଯିବା ପରେ ମଙ୍ଗଳବାର ବାଲେଶ୍ୱର କୋର୍ଟ ଚାଲାଣ କରାଯାଇଛି। ଏହି କାରବାରରେ ସମ୍ପୃକ୍ତ ଥିବା ଅନ୍ୟମାନଙ୍କୁ ଧରିବା ପାଇଁ ତଦନ୍ତ ଜାରି ରହିଛି ବୋଲି ଏସଟିଏଫ୍ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ଚଳିତବର୍ଷ ଏପର୍ଯ୍ୟନ୍ତ ଏସ୍ଟିଏଫ୍ ରାଜ୍ୟର ବିଭିନ୍ନ ଜିଲାରେ ଚଢାଉ କରି ମୋଟ ୧୬ କେଜି ୭୧୧ ଗ୍ରାମ ବ୍ରାଉନସୁଗାର ଜବତ କରିଛି। ଏ ନେଇ ୨୧ଟି ମାମଲା ରୁଜୁ ହୋଇଥିବାବେଳେ ୪୧ଜଣଙ୍କୁ ଗିରଫ କରାଯାଇଛି।
