ବେଙ୍ଗାଲୁରୁ,୨୫ ।୭: କର୍ନାଟକ ମୁଖ୍ୟମନ୍ତ୍ରୀ ବିଏସ୍ ୟେଦୁରପ୍ପା ରବିବାର ଇସ୍ତଫା ଦେଇପାରନ୍ତି ବୋଲି ଅନୁମାନ କରାଯାଉଛି । ଯଦିଓ ଭାରତୀୟ ଜନତା ପାର୍ଟି(ଭାଜପା) ପକ୍ଷରୁ ଏନେଇ ଅଫିସିୟାଲି କୌଣସି ଘୋଷଣା କରାଯାଇ ନାହିଁ ତଥାପି ୟେଦୁରପ୍ପାଙ୍କ ବୟାନ ଏହାହିଁ ସୂଚନା ଦେଉଛି । ୟେଦୁରପ୍ପା ଯଦି ଇସ୍ତଫା ଦିଅନ୍ତି ତେବେ କର୍ନାଟକର ନୂଆ ମୁଖ୍ୟମନ୍ତ୍ରୀ ଭାବେ କେନ୍ଦ୍ରମନ୍ତ୍ରୀ ପ୍ରହଲ୍ଲାଦ ଯୋଶୀଙ୍କ ନାଁ ଚର୍ଚ୍ଚାକ୍ୁ ଆସିଛି । ଏହାସହ ଏମ୍ଆର୍ ନିରାନିଙ୍କ ନାଁ ବି ଚର୍ଚ୍ଚାରେ ରହିଛି । ଏହାକୁ ନେଇ ଯୋଶୀ କହିଛନ୍ତି ଶୀର୍ଷ ନେତୃତ୍ୱ ତାଙ୍କ ପାଇଁ ସେଭଳି କୌଣସି ସୂଚନା ଦେଇ ନାହାନ୍ତି । ଏପଟେ ନିରାନି କହିଛନ୍ତି ଦଳ ଯାହା ଦାୟିତ୍ୱ ଦେବ ସେ ତାହା ପାଳନ କରିବେ । ଯୋଶୀ କହିଛନ୍ତି ୟେଦୁରପ୍ପାଙ୍କ ଉତ୍ତରାଧିକାରୀ ହେବାକୁ ତାଙ୍କ ସହ କେହି କଥା ହୋଇନାହାନ୍ତି । କେବଳ ଯାହା ଗଣମାଧ୍ୟମରୁ ଏହି ସୂଚନା ମିଳୁଛି । ସୂଚନାଯୋଗ୍ୟ, ରବିବାର ୟେଦୁରପ୍ପାଙ୍କ ସରକାରକୁ ୨ ବର୍ଷ ପୂରଣ ହେଉଥିବା ବେଳେ ବୟସାଧିକ୍ୟ ଓ ଅସୁସ୍ଥତା କାରଣ ଦର୍ଶାଇ ସେ ଇସ୍ତଫା ଦେବାକଥା ପୂର୍ବରୁ କହିଥିଲେ । ଏହାସହ ଦଳ ଯାହା ନିଷ୍ପତ୍ତି ନେବ ତାହା ସେ ମାନି ନେବେ ବୋଲି ମଧ୍ୟ ସୂଚନା ଦେଇଥିଲେ ।
